Adelayida De Suisa: Margrâva (marquisa) de Suisa et de Turin et pués comtèssa et règenta de Savouè

Cél articllo est ècrit en arpetan supradialèctâl / ORB lârge.

Por los articllos homonimos, vêde Adelayida.

Adelayida de Suisa [a.dla.ˈiː.da də ˈswi.za], des côps mencionâye desot la fôrma Adelayida de Turin, surnomâye « la Grant-Comtèssa »^,, nèssua vers 1020 a Turin et môrta lo 19 de dècembro 1091 a Canischio, est na princèssa du Moyen Âjo, felye d’Oldèric-Manfrèd II d'Oriata (aprés 991-1036), margrâvo (marquis) de Suisa, et de Bèrta d’Ivrèa (vers 976 - aprés 1029), margravena de Suisa et comtèssa de Turin. El est yona de les femèles les més importantes et ben cognues de l’histouère de la Savouè.

Origina et premiér mariâjo

Adelayida de Suisa est n’héretiére des Ardouinidos, qu’ant de biens en Piemont^,. El est la felye de Oldèric-Manfrèd II, marquis d’Étalia, et de sa fèna Bèrta d’Ivrèa (vers 976 - aprés 1029), que vint de la mêson d’Ivrèa. Cela dèrriére est margravena de Suisa et comtèssa de Turin. La mârche de Turin contint les principâles veles de Suisa, Turin, Ivrèa ou ben Pignerol. La vela de Suisa contrôle notament lo passâjo de la pèninsula a la France, per lo col du Mont-Cenis.

Los historiens s’acôrdont por la fâre nêtre vers 1020, a Turin.

Mârie Hèrman IV (1014-1038), duc de Souabe, avouéc qui el at doux enfants, pués lo marquis de Montfèrrat Hanri (môrt vers 1045), fely de Guilyômo III de Montfèrrat — cela cobla réste sen postèritât.

Comtèssa et règenta de Savouè

U més târd vers 1045^, ou ben 1046^,, mârie Odon, fely d’Humbèrt, comto en Môrièna.

A la môrt d’Odon I^ér en 1060, tint la règence por sos jouenos felys. Mêtrèssa-fèna, consèrve grant-temps la tutèla. Semble étot avêr na sé-quinta grant-mange dessus l’emperor du Sant-Empiro romen gèrmanico Hanri IV, que sa felye Bèrta mârie en 1066.

Règenta, Adelayida ôtorise lo passâjo de les Ârpes per lo Mont-Cenis a son biô-fely per aliance, l’emperor Hanri IV, por que sè pouésse rendre a Canossa en 1077^,. La comtèssa l’acompagne d’alyor uprés du pape Grègouèro VII. En èchanjo du passâjo, la comtèssa et son fely ariant nègociyê l’obtencion de cinq èvèchiês étaliens. L’emperor los rècompense, d’aprés Guichenon, per la cèssion du Bugê a Amèdê II et pués en recognessent los drêts et l’enfèodacion du marquisât d’Ivrèa a Adelayida de Suisa.

Quand son petiôt-fely, Humbèrt, vint aprés son pâre, los historiens supôsont que mantint sa grant-mange dessus la politica de la comtât.

La granta comtèssa môrt en 1091, probâblament a Canischio, a coutâ de la vela de Cornèx, en Piemont.

Portant los Humbèrtiens consèrvont ren que la vela de Suisa de la dota qu’Adelayida avéve aportâye.

 

Adelayida de Suisa mârie en premiéres noces Hèrman IV de Souabe (1014-1038) qu’el at doux enfants :

• Gèbârd I^ér, comto de Sulzbach (1035 - 1071) ;
• Hèrman de Souabe (1034 - v.1056).

Mârie en secondes noces lo marquis de Montfèrrat Hanri, que môrt dês 1044/1045, sen postèritât^,.

Veva oncor un côp, mârie lo fely d’Humbèrt, comto en Môrièna, Odon (1023-1060), comto de Savouè a vegnir (1051) et pués en Môrièna, qu’el ut :

• Pierro, comto de Savouè a vegnir (1048-1078) ;
• Amèdê, comto de Savouè a vegnir (1050-1094) ;
• Bèrta de Turin (ou ben Bèrta de Savouè, Bèrta de Môrièna) (1051-1087) mariat en 1066 Hanri IV de Franconia, emperor des Romens, èlu en 1084 ;
• Adelayida (1052-1079), premiére fèna de Guigo III d’Arbon (de la legnâ qu’engendrerat los dârfins du Viènês).

La premiére de les felyes pôrte lo petiôt nom de la « grant-mâre matèrnâla », tandis que la seconda « [reléve celi] de sa mâre ». Lo petiôt nom d’Adelayida sè mantint dens los usâjos de la mêson de Savouè puésqu’entre-mié los « XI^émo et XII^émo siècllos, quatro de les huét premiéres princèsses savoyârdes [...] portâvont adés cél nom », pués « ressortét u XVII^émo siècllo, aprés que lo duc Victor-Amèdê I^ér l’ut balyê, en 1636, a la dèrriére de ses felyes ».

Adelayida de Suisa est yona de les femèles reprèsentâyes dedens l’ôvra monumentâla The Dinner Party per l’artista Judy Chicago.

 

Wiki Commons propôse de documents multimèdiâ sus Adelayida de Suisa.

Bibliografia

• (fr) Bernard Demotz, Le comté de Savoie du XI^e au XV^e siècle : Pouvoir, château et État au Moyen Âge, Geneva, Slatkine, 2000, 496 p. (ISBN 2-05101-676-3)  .
• (en) Charles William Previté-Orton, The Early History of the House of Savoy: 1000-1233, Cambridge, Cambridge University Press, 512 p. (en legne).  
• (fr) Laurent Ripart, « La tradition d’Adélaïde dans la maison de Savoie », dedens Patrick Corbet, Monique Goullet, Dominique Iogna-Prat, Adélaïde de Bourgogne. Genèse et représentations d’une sainteté impériale, Comité des travaux historiques et scientifiques / Éditions universitaires de Dijon, col. « CTHS Histoire », 2002, 230 p. (ISBN 2-7355-0497-2, en legne).  
• (it) Francesco Cognasso, « Adelaide », dedens Dizionario Biografico degli Italiani, vol. 1, 1960, p. 249–251.
• (it) V. Fumagalli, « Adelaide e Matilde, due protagoniste del potere medievale », dedens La contessa Adelaide e la società del secolo XI, 1992, p. 243-257.

Articllos liyês

Lims de defôr

• Dossiérs sus lo seto de les arch·ives dèpartamentâles de la Savouè-d’Avâl et de la Savouè-d’Amont - Sabaudia.org :
  • André Palluel-Guillard, « La Maison de Savoie » (viu lo 7 de septembro 2016)  , que la fiche « Othon (Odo, Oddon) » pâge 6 ;
  • Guido Castelnuovo, « La Savoie au Moyen-Âge, 1032-1536 » (viu lo 7 de septembro 2016) (8 pâges et raponses).

Notes