Quintu Cúrciu Rufu

Cúrciu Rufu preteneció a la gens Curtia, sigún se puei entendel del su nombri. Hueraparti destu, ná mas se conoci desti autol. Es possibri que trebahara de hablaol pol estilu la su obra i que viviera en epoca emperial. Se conoci que vivió en tiempus emperialis pol un passahi la su obra (X 9 1-6), ena que hazi una alabáncia al emperaol, quiziá Cláudiu. De sel ciertu estu, lo situaria pal sigru I ed. C.

L’obra Cúrciu qu’abemus s’entitula Historiae Alexandri Magni "Estórias Alehandru el Grandi". Namás mos án llegau ochu librus, haltandu los dos primerus, polo qu’el relatu escomiença nel tercel libru, cona toma las Celenas, nel 333 e. C. Amás halta tamién el testu entri los librus V i VI i la parti central el IX.

Estas estórias cuentan los hechus i via Alehandru el Grandi tomandu cumu huenti prencipal los escritus Clitarcu, biógrafu del mesmu sigru en que vivió Alehandru. Con tó i con essu, el estilu retólicu, garifu i con heribequis narrativus hazin desta obra mas qu’una estória u una biografia, una via novelá, andi dessistin cartas, diálogus, escenas tráhicas i otrus repeñicus própius el hablaol que decora quantu dis. Nesti sintiu, s’opón a Arrianu, quien escrebió tamién al tentu Alehandru pero de holma chana i lisa.

Dalcuerdu con el catálogu el iciónariu Oxford, esti autol alcibi l’abreviatura Curt.

• Oxford Latin Dictionary, Oxford, OUP, 1968.
• Quinto Curcio Rufo, Historia de Alejandro Magno, entrod. i trad. F. Pejenaute Rubio, Gredos, Mairil, 1982.

•   En Commons ai conteníu multimedia sobre Quintu Cúrciu Rufu.