Regìna Di Sîg

Regìna di sîg (da 'l ingléś scream queen) l'è na manéra 'd dir druàda in dal mónd dal cìnema 'd scarésa par badśàr gl'atōri ch'i lavóran da spés da prutagunìsta in dal pelìculi dal gènar “horror”, pròpria parchè lè i sìgan dimóndi.

La prima parsòna ch'la s è bcada cal scutmàj chè l'è stada la Fay Wray, prutagunìsta dal film King Kong dal 1933 pò in di an Ssanta a gh'è stada la Barbara Steele, stéla di horror gòtic. In di an Utànta 'l è stâ 'l tùran dla Jamie Lee Curtis par la saga 'd Halloween (1978-2018) in du la gh'iva da difénd'r-as da 'l ciucâ in dla suca Michael Myers. In di an Nuànta la s è fata strada in cal camp chè la Neve Campbell impgnàda in Scream ad Wes Craven e in di sò tri séguit.

Atri regìni di sîg famóśi i èṅ la Mary Elizabeth Winstead, la Scout Taylor-Compton, la Shawnee Smith, prutagunìsta ad Saw - L'enigmista e di sò séguit di an Dumìla, e la Sarah Michelle Gellar mént'r in Itàglia a gh'è l'Asia Argento e, prim' incóra, sò madar, la Daria Nicolodi.