Bêrch

C'l artìcul chè 'l è scrit in Arzân

Bêrch (Barco in italiân) l' é la pió grôsa frasiòun ed Bibiân in pruvîncia ed Rèz; l'é luntân 10 chilômeter e 7 dal cèinter ed la sitê e al gh'à 3000 abitânt.

Monumèint al Grâna

Dumènica 5 otòber 2008 a Bêrch l'é stê inavgurê al prém manumèint al Grâna, fât da trî elemèint: un blôch ed mêlmer ed Carêra da 3 mēter e mèz 'd altèsa per 32 tonelêdi ed pèiş ch' al rapreşèinta 'na pûnta ed 'na fōrma ed Grâna, un curtèil da furmâj gigânt e 'na parèida ed zulzéi sfalsêdi carateréstichi ed l' architetûra di casē arzân. Al tót l'é stê sistemê insém a un prê d'êrba vèirda, al magnêr ch' a vîn dê al vâchi ch' a fân al lât.

Al j urégin dal Grâna a 's arfân al Medioēv e in generêl a 's mèten intōren al XII sècol; al fōli a dîşen che al pôst ed l'urégin a sìa apûnt Bêrch ed Bibiân, paèiş ch' al 's é dichiarê "cûna dal Grâna", mó in realtê an gh'é nisûna prōva insém a di documèint e gnân int al testimuniânsi stôrichi.

Eşîlo ch' al và d' acôrdi cun la natûra

A Bêrch a 's câta ûn di pió grôs pôlo scolâstich'd Itâlia fât cun 'na tètnica ch' la và d' acôrdi cun la natûra: un eşîlo inavgurê al 6 setèmber 2008 ch' al sfrûta al calōr ed l'âcva ch'a gh'é sòt tèra per scaldêr j ambiĵnt 'd invêren e per linfreschêri 'd istê e l'energéia da sōl cun i panē solêr, e al gh'à ânch un impiânt ed recóper ed l'âcva piuvâna.

Personâg

Ind la localitê è nasû al cumpoşidōr, muşicésta e diretōr 'd orchèstra Iller Pattacini. 'N' eter personâg cgnusû int al câmp ed la muşica e dimòndi lighê a la frasiòun l'é stê al tenōr Ferruccio Tagliavini

Spôrt

Al gróp spurtîv ed la frasiòun l'é G.S. Boca Barco, ch' al fà al gâri int i diletânt int al balòun, int la palavōlo int al ciclîşem e da soquânt ân l'à inviê un cōrs ciamê Play Time per inviêr i ragasōl vêrs al mònd dal spôrt

Êter progèt

• Wiki Commons contiene file multimediali su Barco

Collegamèin d'ed fōra

• Inavgurasiòun ed l' Eşîlo
• Al prém monumèint al Grâna