L'odori Di Bastia
L'odori di Bastia hè una puesia di Petru Lucciana, dettu Vattelapesca.
L'odori di Bastia
- Un grand'omu, orgogliu è bantu
- Di a nostra isula, dicia:
- "S'è cun l'ochji ùn la vidissi
- Eo cù u nasu a senteria."
- Vere sò queste parolle
- Sopratuttu per Bastia.
- Quandu a notte da Livornu
- U stranieru à u nostru portu
- S'abbicina, sente cum'è
- Un odor' di cane mortu :
- È a cità che u so prufumu
- Manda in guisa di cunfortu.
- S'è sbarcate à u Molu Vechju
- Duve sbocca ogni cunduttu,
- Hè una pesta chì v'assale
- È v'affoca dapertuttu.
- Quì, ùn val'acqua di Culogna :
- Tuppa u nasu, o resti bruttu !
- Poi muntendu pe Terazze,
- Di biscotti è canistrelli
- Scende, hè veru, una dulcezza;
- Ma frà mezu à questi è quelli
- Ghjunghje u sisu d'agliu è trippe,
- Di cantine è di macelli.
- À a Traversa, dicerete,
- Si rispira ? - Nò, signore !
- Ch'è ad ogni passu ci hè un tufone
- Chì vi manda u so fetore;
- È un parlu di i purtoni
- Ch'hanu tutti un trist'odore.
- Visitaste forse mai,
- Dite, e Scale di Serone,
- Ghjesù, Cherughju drittu,
- U Puntettu c'u Mughjone ?
- Ne u mulizzu è frà i pidochji
- Quante vivenu persone !
- Dapertuttu è un melingheghju
- Di Lucchesi è criature,
- Di furmagliu cù scappinu
- È di trippe è di frittura,
- È Burdelli! Chì ùn ci schiatta
- Pò bè dì ch'è hà l'osse dure!
- Terranova è San Ghjiseppu
- È Sant'Anghjuli è S'u Collu,
- Cosa sò ? - Stalle è purcili.
- È a Punta ?... Quandu collu
- Per i Zeffari à u Mercatu
- Dò a mio vita per un sollu.
- Un odor di stoccafissu,
- Baccalà è anchjuve vechje,
- Di cipolle è pesci merzi
- U respiru toglie, è à sechje
- Score fangu ed altra cosa,
- Qui, per tutte e catapechje...
- O Bastia, prega u Signore
- Ch'è ùn ti mandi qualchì pesta !
- S'ella vene, tuttu strughje;
- Mancu mosca viva resta...
- No, speremu ch'è a spazzola
- Piglierai...Ma spazza lesta !
This article uses material from the Wikipedia Corsu article L'odori di Bastia, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Corsu (DUHOCTRUNGQUOC.VN) is an independent company and has no affiliation with Wiki Foundation.