Adolfo Suárez González (25 a viz Gwengolo 1932 – 23 a viz Meurzh 2014) a oa ur politikour spagnol.
Kentañ Ministr Spagn e voe etre 1976 ha 1981.
Studioù a reas e skol-veur Salamanca. Mont a reas e-barzh ar Movimiento Nacional, ul luskad politikel krouet gant aduidi Francisco Franco, ha tapout a reas er strollad-se a garg a sekretour meur. Ren a reas skinwel ar stad ivez, dindan ren Franco.
Pa'z eas Juan Carlos Iañ da roue Spagn, goude marv Franco, e anvas Adolfo Suárez da gentañ ministr d'ar 4 a viz Gouere 1976. Gant Adolfo Suárez e voe degaset kemmoù en aozadur ar stad, tamm-ha-tamm, da lakaat anezhi da vezañ demokrateloc'h. Klask a reas chom hep displijout d'an arme a oa feal d'an urzh kozh ha klevet war un dro galv ar c'hostezennoù a c'houlenne un adreizh a-vras da aozadur ar stad.
Sevel a reas ur strollad politikel eus ar c'hreiz, an Unión de Centro Democrático da harpañ e bolitikerezh. Trec'h e voe ar strollad-se er votadeg kentañ a voe aozet d'ar 15 a viz Mezheven 1977 hag adanvet e voe Adolfo Suárez da gentañ ministr, en un doare demokratel ar wech-mañ. Goude votadeg 1979 e chomas Suárez e penn ar gouarnamant.
E zilez a roas avat e miz Genver 1981. Kuitaat a reas ar strollad UCD e 1982, evit mont da sevel ur strollad all, ar Centro Democrático y Social, met ar strollad-se ne reas ket berzh e dilennadeg 1982. Paouez a reas Suárez da vat gant ar politikerezh e 1991.
This article uses material from the Wikipedia Brezhoneg article Adolfo Suárez, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Danvez a c'haller implijout dindan CC BY-SA 4.0 nemet ha notet e vefe ar c'hontrol. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Brezhoneg (DUHOCTRUNGQUOC.VN) is an independent company and has no affiliation with Wiki Foundation.