གནམ་བསྐོས་དགའ་ལྡན་ཕོ་བྲང་

འདི་ནི་དེ་སྔོན་སྡེ་སྲིད་ཕག་མོ་གྲུ་པའི་སྐབས་རྡོ་ཁང་སྔོན་མོའམ་མིང་གཞན་འབྲས་སྤུངས་དཔོན་ཁང་ཡང་ཟེར་བ་སྣེ་གདོང་པའིདཔོན་རིགས་རྣམས་འབྲས་སྤུངས་སུ་ཡོང་སྐབས་འཚེར་ཤག་བྱེད་མུས་ལ་ཕག་གྲུ་སྡེ་སྲིད་ཁྲི་རབས་བཅུ་གཅིག་པ་ངག་དབང་བཀྲ་ཤིས་གྲགས་པས་སྲིད་དབང་བཟུང་རྗེས་རབ་བྱུང་དགུ་པའི་ས་སྟག་(༡༥༡༨)ལོར་ཏཱ་ལའི་བླ་མ་སྐུ་ཕྲེང་གཉིས་པ་དགེ་འདུན་རྒྱ་མཚོར་ཕུལ་ཞིང། དགའ་ལྡན་ཕོ་བྲང་ཞེས་མིང་བསྒྱུར་གནང་བ་ནས་ཏཱ་ལའི་བླ་མ་སྐུ་ཕྲེང་རིམ་བྱོན་འབྲས་སྤུངས་སུ་བཞུགས་དུས་ཀྱི་བླ་བྲང་ལྟ་བུ་ཡིན། ཏཱ་ལའི་བླ་མ་སྐུ་ཕྲེང་གསུམ་པ་བསོད་ནམས་རྒྱ་མཚོ་སོག་ཡུལ་ལ་ཕེབས་པའི་ཤུལ་དུ་སྐྱིད་ཤོད་སྡེ་པ་བཀྲ་ཤེས་རབ་བརྟན་པས་རྡོ་ཤིང་དང་འུལ་མི་སོགས་ཀྱི་འགྲོ་གྲོན་རྒྱབ་སྐྱོར་ཤུགས་ཆེན་བྱས་པའི་འོག སྐུ་སྒེར་མཛོད་པ་སྐུ་མདུན་པ་ཆོས་བཟང་འཕྲིན་ལས་ཀྱིས་རྒྱ་བསྐྱེད་གསར་བསྐྲུན་གནང་བ་མ་ཟད། ཏཱ་ལའི་བླ་མ་སྐུ་ཕྲེང་ལྔ་པས་བོད་ས་གནས་ཀྱི་སྲིད་དབང་བཟུང་བ་གནང་རྗེས་ཉམས་གསོས་དང་ལྡེབས་བྲིས་མང་པོ་གསར་བཞེངས་གནང་བ་སོགས་ཞིབ་པར་སྐུ་ཕྲེང་རིམ་བྱོན་སོ་སོའི་རྣམ་ཐར་ནང་གསལ་ཞིང། སྲིད་གཞུང་གི་མིང་ལ་ཡང་དགའ་ལྡན་ཕོ་བྲང་ཞེས་འབོད་པའི་རྒྱུ་མཚན་དེ་ལྟར་ཡིན་ཅིང། གནམ་བསྐོས་ཞེས་པ་ནི་གནམ་བསྐོས་གོང་མ་ཟེར་བའམ་དེ་སྔོན་རྒྱལ་པོ་གཉའ་ཁྲི་བཙན་པོ་ནས་རྒྱལ་པོ་ཁྲི་རལ་པ་ཅན་བར་དུ་ལོ་རྒྱུས་ཡི་གེར་འཁོད་པའི་ནང་གནམ་ལྷ་བབས་ཀྱི་བདག་པོ་ཟེར་བ་དང་འདྲ་བར་རང་ཉིད་ཀྱི་སྲིད་གཞུང་ལ་ཆེ་བསྟོད་བྱེད་པའི་མིང་ཡིན། དེ་ཡང་རང་རྒྱལ་ལོ་རྒྱུས་ཐོག་གི་གོང་མར་གནམ་བསྐོས་གོང་མ་ཟེར་བ་དང། བོད་ཀྱི་སྔ་རབས་ལོ་རྒྱུས་ནང་རྒྱལ་པོ་ལ་གནམ་ལྷ་བབས་ཀྱི་བདག་པོ་ཟེར་བ་གཉིས་ཀ་བོན་པོའི་ཆོས་ལུགས་ཀྱི་ལོ་རྒྱུས་ལྟ་ཚུལ་མ་འཐུད་རྒྱུན་འཛིན་བྱེད་པ་ཞིག་ཡིན་པ་དང། སངས་རྒྱས་ཆོས་ལུགས་པས་དེ་འདྲ་གཏན་ནས་ཁས་མི་ལེན་ཅིང། རྒྱལ་པོ་དང་འབངས་ནི་སྔོན་ལས་བསོད་ནམས་ཀྱི་སྟོབས་ཆེ་ཆུང་ལ་བརྟེན་ནས་ལས་དབང་གིས་བསྐོ་བཞག་བྱས་པ་ཞིག་ཡིན་པ་ལས་གནམ་དང་གནམ་གྱི་ལྷས་བསྐོ་བཞག་བྱས་པ་གཏན་ནས་མིན་ཟེར་རྒྱུན་ཡོད།