Marokbarok

Sa Ingles, inaapod man ini na Pongamia pinnata, Indian beech o pongame oiltree. An marokbarok yaon sa kagayonan niyang gayo kun ini nagbuburak na ta nagpupurungot ini na nalaba nin 10 pulgada, mahamot asin makolor na kun minsan puti, rosa o lila. An mga burak kaini saka an saiyang mga makintab na dahon maray na gayong ornamental, pangsangga' nin duros o nasirbing limpoy. Alagad, an mga burak asin mga bunga kaini nanguriyat na sa palibot kan poon. An mga bunga na patos sa abot duwang pulgadang laba sinasabing may hilo kaya dai bagay sa lugar na dakul mga aking nagkakarawat.

An mga pisog kaini may lanang nakukua na an apod pongam oil nagsisirbeng antiseptiko, stimulant, pampagana asin pampatunaw sa kinakan (stomachic) saka napalasaw kan apdong likido (cholagogue). An essential oil kaini nagagamit man sa paggibong sabon asin kandila, asin pwedeng ikaribay sa diesel fuel para sa mga awto.