Toponimia Asturiana

D'esta mientre, dende la fundación de Conceyu Bable, en 1974, y de l'Academia de la Llingua Asturiana, en 1981, ficiéronse estudios abondo sobre esta materia.

A nivel alministrativu, la Conseyería de Cultura del Principáu d'Asturies creó la Xunta Asesora de Toponimia en 1985, y encargó-y un estudiu pormenorizáu de los topónimos tradicionales d'Asturies. Dempués de dos años de trabayu, asoleyóse una rellación de nomes de llugar que, por embargu, nun recibió sanción llegal denguna. Polo demás, esti trabayu contenía múltiples errores y, tres la so espublización, la Xunta de Toponimia disolvióse.

La situación nun camudó hasta la promulgación de la Llei autonómica 1/1998 d'Usu y Promoción del Bable/Asturianu, a valir anguaño. El so artículu 15.1 establez:

1. Los topónimos de la Comunidá Autónoma del Principáu d'Asturies tendrán la denominación oficial na so forma tradicional. Cuando un topónimu tenga usu xeneralizáu na so forma tradicional y en casteyán, la denominación podrá ser billingüe.
2. D'alcuerdo colos procedimientos que reglamentariamente se determinen, correspuende al Conseyo de Gobiernu, precedíu d'un dictame de la Xunta Asesora de Toponimia del Principáu d'Asturies, y ensin perxuiciu de les competencies municipales ya estatales, determinar los topónimos de la Comunidá Autónoma

En cumplimientu d'esti mandatu llegal, el Conseyu de Gobiernu del Principáu d'Asturies aprobó dos decretos que desendolcaben la Llei d'Usu en materia de toponimia: El Decretu 38/2002, pol que se regula la Xunta Asesora de Toponimia del Principáu d'Asturies, y el Decretu 98/2002, por el que s'afita'l procedimientu de recuperación y fixación de la toponimia asturiana.

(Ver llistáu)

Espedientes toponímicos aprobaos

El procesu de recobramientu de la Toponimia tradicional, qu'inda nun finara, escomenzó oficialmente'l mes de xunu del añu 2004, cuando se constituyó la Xunta Asesora de Toponimia del Principáu d'Asturies. De secute, los conceyos de Carreño y El Franco fueron los primeros en solicitar la restauración de la so toponimia tradicional, siendo siguíos por numberosos conceyos. A fecha de febreru de 2019, la Xunta de Toponimia actuara en 63 de los 78 conceyos asturianos, y aprobáronse 65 decretos d'oficialidá de la toponimia tradicional (ver la llista decretos).

Nestos decretos fáise oficial la toponimia tradicional asturiana, que fuera sustituyía poles diferentes alministraciones con poder n'Asturies y qu'apurrieron nomes castellanizaos, la mayor parte de les veces, frutu del caprichu del autor. Solo n'aquellos casos onde les formes castellanizaes tienen dalgún raigañu popular, establécense los dos topónimos como oficiales.

Espedientes toponímicos pendientes

• Nuna fase avanzada: Cabrales, Llanera, Castropol, y Somiedo

• Conceyos en primer fase: Allande, Caravia, Cuideiru, El Valle Baju, Ibias, Navia, Pravia, Salas

Exemplos de nuevos topónimos oficiales

• Wikiproyeutu espardimientu de la toponimia oficial d'Asturies

• Llista oficial de decretos de toponimia
• Toponimia Oficial d'Asturies. Páxina web de Softastur
• Guetador de la toponimia asturiana
• Mapa oficial d'Asturies, onde yá vien la toponimia tradicional (actualizáu a fecha d'agostu de 2009).