Micorriza

Nel 95% de les plantes que s'estudiaron atopóse esta simbiosis.  Una esceición son les plantes de la familia de la berza (brasicacies). L'asociación de les micorrices coles plantes ta presente dende fai 400 millones d'años

Nuna asociación con micorrices los fungos colonicen los raigaños de plantes güéspede, yá sía de forma intracelular como asocede nos llamaos fungos micorrizíticos arbusculares (AMF arbuscular mycorrhizal fungi), o estracelularmente nos llamaos fungos ectomicorrizíticos. Les micorrices son un componente importante na vida y la química del suelu .

La mayoría de cogordes comestibles de los montes de pinos (robeyón,llezneru, Cantharellus cibarius, Tricholoma terreum) son esporocarpes de fungos micorrízicos. Toos estos fungos viven coneutaos a los árboles vivos, y dambos llogren beneficiu d'esa simbiosis. Delles plantes son micorrizaes artificialmente yá sía pa llograr cogordes comestibles (turmes por casu) o p'ameyorar la so crecedera ensin precisar abonos químicos (especialmente utilícense fungos del xéneru Glomus). Les micorrices amonten la resistencia de les plantes a les enfermedaes provenientes del suelu y dexen que les plantes colonicen tierres ermes.

Gracies a esta simbiosis mutualista, el fungu recibe un accesu direutu y relativamente constante a glúcidos como son la glucosa y sacarosa suministraes pola planta. Los glúcidos son tresportaos dende la so fonte (que de normal son les fueyes) al texíu del raigañu y d'ellí al interior del fungu. En compensación la planta, gracies a los micelios del fungu, gana una mayor capacidá d'absorción pel agua y los nutrientes minerales (una y bones la superficie del miceliu ye comparativamente mayor al respeutive de la de los raigaños).

Los raigaños de les plantes solos son incapaces de tomar del suelu los iones fosfatu que tean nuna forma química inmovilizada como asocede nos suelos de pH básicu como son los suelos caliares. Pero'l fungu fai que tean disponibles pa les plantes.

El mecanismu d'amontar l'absorción ye químicu y físicu coles mesmes. Los micelios de la micorriza tienen un diámetru bien pequeñu comparáu col diámetru de los raigaños y por eso pueden esplorar un mayor volume de suelu. Tamién la membrana celular del fungu ye distinta a la de les plantes y escreta ácidos orgánicos qu'ayuden nel desplazamientu de los iones del suelu

Les micorrices son especialmente favorables nos suelos probes en nutrientes.

 

Son micorrices nes que les hifes de los fungos enfusen dientro de les célules de les plantes produciendo estructures en forma de visícula (globu) o bien arbusculares (pequeños árboles). De fechu la hifa nun enfusa nel protoplastu (interior de la célula ) pero invaxina la membrana celular. Cola estructura arbuscular amóntase la superficie de contactu y por tanto la tresferencia de nutrientes ente ellos.

Les micorrices arbusculares fórmense namái con fungos de la división de fungos Glomeromycota, y esta simbiosis, según los fósiles, anicióse nel periodu Devonianu, (de 400 a 460 millones d'años atrás). Anguaño el 85% de les plantes del mundu tán colonizaes por micorrices arbusculares incluyendo munches especies cultivaes.

 

Les ectomicorrices fórmense nun 10% de les families de plantes, especialmente n'especies maderices como les families del abeduriu, l'ocalitu, l'ancina, el pinu, y la rosal. Los fungos implicaos pertenecen a los grupos Basidiomycota, Ascomycota, y Zygomycota. La ectomicorriza consiste nun mantu formáu pol hifa que cubre la punta del raigañu y una rede d'hifes qu'arrodien a les célules de les plantes dientro del córtex del raigañu. En dellos casos les hifes tamién enfusen na célula de les plantes y entós la micorriza llámase ectendomicorriza. Fora del raigañu fórmase una gran rede ente'l suelu y la virosta. Inclusive s'apreció movimientos de nutrientes ente dos especies d'árboles micorrizaos

Micorrices de les ericacies

Na familia Ericaceae fórmase el tercer tipu de micorrices. Tienen una fase de crecedera trupa nos raigaños y una fase estraradical de crecedera laxo. Nun se conoz muncho de la so reproducción Tienen una notable capacidá de recibir nutrientes de restos entá non descompuestos

• Micorriza de les orquídees

•   Wiki Commons acueye conteníu multimedia sobre Micorriza  .
• MycorWiki Archived 2010-06-16 at the Wayback Machine Bioloxía y ecoloxía d'ectomicorrices y otros fungos forestales
• Orchid mycorrhiza extraction & culture Archived 2008-06-20 at the Wayback Machine on the CultureSheet
• Mycorrhizal Associations: The Web Resource Llista de plantes con micorrices y ensin elles
• Mycorrhizas – a successful symbiosis Archived 2010-01-31 at the Wayback Machine Orde modificáu xenéticamente
• International Mycorrhiza Society International Mycorrhiza Society