تݣلمامين: ضاية فلمغريب

هي ضاية ديال الله، كاينة فجماعة أݣلمام أزݣزا و بعيدة تقريبا ب 44 كيلوميتر عن مدينة خنيفرة، لعلو ديالها 1650 ميترو فوق سطح لبحر، ف لأطلس لمتوسط. فيها ثروة كبيرة ديال لحوت، كيف ما تايجيو ليها طيور لي تايهاجرو، و ضايرة بيها غابة كبيرة و مخلطة بين لكروش ؤ لأرز د لأطلس.

ضاية تݣلمامين
لموقع
لموقع	لمغريب
لمغريب	بني ملال خنيفرة
لجيهة	خنيفرة
لإقليم	أݣلمام أزݣزا
لجغرافيا
خط لعرض	32.904711°N
خط طور	5.343513°W
لمساحة	12 هكتار
لارتيفاع	1650 متر

ضاية تيݣلمامين كاينة فجماعة أݣلمام أزݣزا، إقليم خنيفرة، جهة بني ملال خنيفرة، ف لعمق ديال جبال لأطلس لمتوسط، بعيدة تقريبا ب 44 كلم على مدينة خنيفرة، و عالية ب 1650 ميترو تقريبا على سطح لبحر.

 

ضاية تيݣلمامين كاتسمى تا بنظاظر د لأطلس لمتوسط، حيت فيها جوج ديال ضايات متقاربين و متاصلين بحال نظاظر، و تيݣلمامين سمية أمازيغية، هي لجمع ديال كلمة أݣلمام لي كاتعني ضاية.

ضاية تيݣلمامين فيها 3 ديال ضّايات لمتسلسلة، جوج منها مقاربتين و متاصلين بحال نظاظر. هاد الضايات وحدة فيهم جات ف شّمال و تّانية ف لوسط، و لخرة ف لجنوب. ضّاية لي فلوسط هي لي كبيرة، لمساحة ديالها تقريبا 7 ديال لهكطارات، و لعمق ديالها تقريبا 18 ميترو، أما ضّاية لي ف لجنوب، هي أغرق وحدة، لمساحة ديالها تقريبا 4 ديال لهكطارات، و لعمق تقريبا 40 ميترو، أما لي فشمال، بعيدة شوية عليهم، و هي الصغيرة فيهم، فيها تقريبا هكطار واحد. أما شكل ديال هاد ضايات هو شكل بيضاوي.

ضاية تيݣلمامين، منطقة سياحية، فيها السّياحة الجّبلية و لإيكولوجية، و عزيزة على لعشاق ديال التّخييم، لبنية تحتية ديال لمنطقة مزالة ضعيفة، ماكايناش طريق مزيانة ليها، و مافيهاش ؤطيل ولا ؤبيرج. النقل لهاد لبحيرة متوفر فالنقل المزدوج من مدينة خنيفرة، بضبط من حي أمالو. ناس ديال لمنطقة تايقدمو خدمات لسياح فصيف ، تايبيعو ليهم لخبز و شي مواد استهلاكية، بلخصوص لهواة تخييم لي تايجي بزاف منهم لهاد ضاية فصيف.

هاد ضّاية تايعمروها لعيون لي كاينين فيها، و تا لما ديال شّتا و تّلج لي تايطيح فيها، كيفما كاينة حدا ضّاية عين د لما لحلو، ؤ بير صالح لشرب. هاد ضّاية لأصل جّيولوجي ديالها كاريستي.^{[ماواضحش]} بخصوص تصريف لما، تانلقاو ضّاية لي فشمال كاتخوي لما ف ضّاية لي فلوسط، و لي فلوسط كاتخوي ف ضّاية لي فلجنوب، و لي فلجنوب متاصلة بواد كاتخوي فيه.

كاينين دواور صغار على هاد الضاية، و أراضي زراعية، لكن لغابة كاتسيطر على الجّناب ديالها، و بعيد عليها شوي كاين شي دواور أخرين. النّاس د لمنطقة من لأمازيغ د لأطلس لمتوسط، و لّغة لي كتيرة هي لأمازيغية، و شوي ديال دّاريجة لمغربية. و تايعيشو نّاس ف هاد لمنطقة على لفلاحة و سّرحة.

ضاية تيݣلمامين فيها شّجر ديال لأرز د لأطلس على جّهد، ؤ تا لبلوط لخضر، كيف ما فيها بزاف د أنواع د لحوت بحال ترويت، و نباتات د لما النادرة، هدشي علاش هاد لبلاصة عزيزة على الصيادة. زيد على هادشي هاد لبلاصة تايعيش فيها زّعطوط و لحلوف د لخلى، و لقنان دلخلى، و تّعلب، و بن أوى، و دياب، و نسورا، و تايزوروها طّيور لي تايهاجرو.