فلسفة

لفلسفة (ب ليونانية φιλοσοφία، ؤ كتّقرا فيلوصوفيا، و كاتعني حب لحكمة) هي دراسة ديال لأسئلة لأساسية ديال لوجود، لمعرفة، لأخلاق، اللوجيك، لعقل، و لوغة. هاد لأسئلة غالبا كاتكون على شكل پروبليمات لي خاصك تحلهم. أول واحد لي يمكن ستعمل لمصطلح ديال فلسفة هو پيطاݣوراس (لي عاش ف جوايه ما بين 570 و 475 قبل لميلاد).

لمناهج ديال لفلسفة فيها لمنهج السقراطي ديال لإستجواب، الدياليكتيك، و التقديم لمنهجي.

لأسئلة لفلسفية لكلاسيكية ممكن تكون شي حاجة بحال: "واش ممكن نعرفو؟" يلا كان لجواب أه "واش ممكن نتأكدو؟"

لفلاسفة كايطرحو بزاف ديال لأسئلة لخرة لي متعلقة ب لواقع، متلا: "واش كاينة شي طريقة لي باش نعيشو لماكسيموم د لحياة؟"، "واش ممكن يتسمى لواحد بنادم مزيان يلا قدر يدير حاجة خايبة بلا ما يعرف تا شي واحد؟"، "واش بنادم عندو حرية لإرادة؟".

شحال هادي، لفلسفة كانت كاتشمل ݣاع نواع لمعرفة. من أرسطو حتال لقرن 19، كانت لفلسفة الطبيعية فيها لفلك، الطب، و لفيزيك. متلا، إسحاق نيوتن كتب واحد لكتاب ف 1687 سميتو الركايز د لماط د لفلسفة الطبيعية. هاد لكتاب من بعد تكلاصا مع لكتوبا د لفيزيك. ف لقرن 19، فاش ولاّ لبحت لعلمي كتير فهاد لفروع ديال لفلسفة، بدات هاد لفروع كاتخصص، و شوية شوية بدات كاتنفاصل من لفلسفة. ليوم، تخصصات بحال لپسيكولوجيا، الصوسيولوجيا، اللانڭويستيك، و ليكونومي، ولاو كولهم مستاقلين على لفلسفة. من جهة خرة، كاينين شي تخصصات لي مازالين قراب من لفلسفة، بحال لفن، و السياسة. متلا، واش الزين (ب لعربية الجمال) داتي ولا موضوعي؟ واش كاينين بزاف ديال لمناهج د الصيونص ولا غير واحد؟ واش ليوطوپيا شي حاجة ممكنة ولا غير خيال ما يمكنش يتحقق؟