عوام 2010: عقد

ف هاد لفترة تزاد عدد لبشري د لعالم من 6,9 ل 7,7 مليار، ب 1,4 مليار د الزيادات و 560 مليون د لوفيات.

هاد لعقد بدا ب تعافي د لعالم من لأزمة لإقتصادية لي كانت بدات ف 2008. التضخم بقى مستاقر على طول لعقد، و الناتج لعالمي لخام تزاد مابين 2010 و 2019، الشي لي عطا حالة قتيصادية مزيانة بشكل عام. بزاف د لبلدان عرفو زديهار كبير، و أنڤيستاو مزيان ف لقلدة التحتانية ديالهوم. ف شمال إفريقيا و الشرق لأوسط، بدا لعقد ب تورات ربيع الشعوب، و هادشي خلا لبعض منها تعرف قلة ستيقرار سياسية كبيرة، بحال ف سوريا فين ناضت حرب، ليبيا، و ليامان، ف لوقت لي بلدان بحال تونس و مصر بدّلو لحكام ديالهوم.

ف لفن، بانو تطورات مهمة سبابها الرخا لإقتصادي و التطور الطيكنولوجي. بحال ف لمزيكة لي ستافدات من سرابس ديال الستريمين د لمزيكة، لي من بينهوم سپوتيفاي، ساوندكلاود و أپل ميوزيك، و بانو نواع موسيقية فرعية جديدة. و تا السينيما ستافدات من السرابس د الستريمين ف أنتيرنيت بحال نيتفليكس و أمازون پرايم، و خرجو أفلام بحال لمنتاقمين: سالات اللعبة Avengers: Endgame، لي ولّا أكتر واحد ف لمبيعات ف التاريخ ب 2,8 مليار دولار ف وقتو.

ف لمجال السياسي بقات لميريكان هيّ لقوة لعضمى، ف لوقت لي ستامرات الشينوا ف توسيع لمجال د النفود ديالها ف بحر جنوب الشينوا و إفريقيا. التنافس بينات هاد الجوج تطرجم ب لخصوص ل حرب قتيصادية. لميريكان بقات مكمّلة ف لحرب على لإرهاب ب التدخل لعسكاري ديالها ف شلا مناطق ف لعالم، و ف 2014 بانت داعش ؤلا الدولة لإسلامية ف لعراق و الشام لي ل واحد لمدة محات لحدود مابين لعراق و سوريا، و هادشي ستدعا تدخل عسكاري ديال تحالف ديال لبلدان باش يسيطرو على لوضعية. ف إفريقيا، جنوب السودان ستاقل على السودان، و لمضاهرات طيحو بزاف د لأنضمة السياسية.

ف ظل موجة ديال لقومية، طلع لبيزنيسمان لمعروف دونالد طرامپ ف لميريكان باش يولي رئيس على لحزب الجمهوري لي عندو توجه يميني. روسيا حاولات تفرض راسها على لمستوى الدولي فاش خدات قريميا ف 2014، و من داك لعام بدات نيت لحرب الروسو-ؤكرانية.

 

ف الطيكنولوجيا، بزاف د الناس ولّا عندهوم السمارتفون، و لأنتيرنيت ولّا كيكوڤري 54% د السكان د لعالم، بعدما كانت النسبة 28,9% ف لبدية د لعقد. ل4 جي بان و التحوسيب ف لكلاود Cloud computing زاد تطوّر، سيرتو فاش بانو سرابس بحال ميكروصوفت أجر Microsoft Azure و السرابس د لويب د أمازون Amazon Web Services. التسارع ديال تبادل لمعلومات و التطور ديال الصوشل ميديا نتجو عليه فينومينات جداد بحال حركة مي تو Me Too Movement و تقافة لإلغاء cancel culture. مونضامة ويكيليكس لي مترأسها الصحافي لؤسطرالي جوليان أصانج خرّجات وتائق حساسة على مواضيع بحال لحبس د ڭوانطانامو و لحرب د ميريكان ف أفغانستان و لعراق، ف لوقت لي لميريكاني إدوارد صنودن هرب ل روسيا بعدما خرّج وتائق على لاجونص د لأمن لميريكانية NSA، و نبّه لعالم بلي كاينين مونضمات حوكومية و پريڤي كاتقدر تصنّت على أي واحد ف لعالم ب تخدام طيكنولوجيا متطورة مديورة ل هاد لغاراض. سيتات د لويب بحال بايدو، تويتر و إنسطاڭرام ولّاو من أكتر السيتات لي كيتشافو ف لعالم، و ويكيپيديا طلعات ف لكلاصمة من التاسعة ل لخامسة، بعدما تّضرب لعدد د الزوار ديالها 7 د لمرات. ياهو طاحت الشعبية ديالها، ف لوقت لي ڭووڭل، فيسبوك و يوتيوب ماتبدلاتش الشعبية ديالهوم بزاف.

التبدال د لمناخ صبح باين بعدما تهرّسو الروكورات ديال أسخن نهار ف التاريخ بشكل متّابع. السياسيين و الناس لعاديين تموبيليزاو كتر ضد هاد لفينومين، و لمعاهدة د پاري د 2015 تسنات. من بين أكبر لكوارت الطبيعية لي طراو ف هاد لعقد كاين زلزال هايتي د 2010، زلزال و تسونامي د طوهوكو د 2011، و زلزال نيپال د 2015.

• ليستة د لعقود، لقرون، و لألفيات

كرونولوجيا

مقالات د لعقد د 2010: