Evangelischi Chile: Sammelbezeichnig für verschidnigi Chile, wo alli us de Reformation use entstande sind

Si werde au als proteschtantischi Chile bezeichnet.

Gschicht vom Begriff

De Begriff Evangelisch beziiht sich uf s Evangelium vo Jesus Chrischtus und di viir Evangelie, wo im Noie Teschtament vom Läbe und Stärbe vo Jesus verzälled. De Bezug uf d Bible isch daderbi bewusst chilekritisch im Gegesatz zu de katholische Chile bruucht worde, wo bis in d Noiziit de Gläubige de Zuegang zu de Bible erschwert het. De dütsch Reformator Martin Luther het de Begriff für sini Aahänger verwendet, zumal er d Bezeichnig Lutheraner nöd het welle. Wo sich im Lauf vo de Reformetion di unterschidliche Konfessione usebilded hend, isch Evangelisch zu eme Oberbegriff für di lutherische und di reformiirte Chile worde, wo mit em Weschtfälische Fride durch s Corpus Evangelicorum zu eme Verfassigsbegriff worden isch. Hüt wird de Begriff Evangelisch au vo vilne Freichile bruucht, wo ja letschtendlich au in de Tradition vo de Reformation stönd.

Lehr

Gmeinsam sind de evangelische Chile di viir Soli vo de Reformation:

Sola fide – allei durch de Glaube wird en Mönsch grechtfertiged, nöd durch gueti Werk
Sola gratia – allei durch d Gnad vo Gott wird de Mönsch gretted, nöd durch sini Leischtige
Solus Christus – allei Chrischtus, nöd d Chile, het d Autorität über di Gläubige
Sola scriptura – allei d Schrift (gmeint isch d Bible) isch d Grundlag vom chrischtliche Glaube, nöd d Tradition vo de Chile