D Andrea Štaka (* 1973 z Lozärn) isch e Schwyzer Filmreschiseeri un Draaibuechautori.
D Andrea Štaka isch z Lozärn uf d Wält chuu un z Züri ufgwagse. Iri Mueter stammt vu Sarajevo, Bosnie, ire Vater vu Dubrovnik, Kroazie un ire Stiefvater vu Serbie. Aagfange met si mit Fotografy. Vu 1992 bis 1993 het si am London College of Printing gleert. Schließli isch si aber zu Film un Reschy gwägslet un het vu 1993 bis 1998 an dr Hochschuel fir Gstaltig un Chunscht (hite ZHdK) z Züri studiert. Ab 1999 het si zytwys z New York gläbt.
Mer chännt si syt irem Film Das Fräulein, wu si anne 2006 mit em Guldeni Leopard am Internationale Filmfeschtival vu Locarno derfir uuszaichnet wooren isch.
Anne 2015 het si fir ire Film Cure – Das Leben einer Anderen dr Preis für den gesellschaftlich relevanten Film bim Max-Ophüls-Feschtival iberchuu.
Ire dritt Langspiilfilm Mare isch 2020 in dr Sekzioon Panorama vu dr Berlinale urufgfiert woore. Dr Film isch an verschiidene Feschtiwäl zaigt woore. Bim Sarajevo Film Festival isch er mit zwee Bryys uuszaichnet woore un 2021 het er an dr Soledurner Filmdääg dr Prix de Soleure gwunne.
2022 isch si yyglaade woore, fir s Projäkt Postcards from the Future e Chuurzfilm z draaie, wu im Rame vum Filmfeschtiwäl Locarno uf dr Piazza Grande zaigt wooren isch.
Zäme mit em Christian Johannes Koch het si d Reschy vu dr 2. Stapfle vu dr TV-Seerie Neumatt gfiert, wu aafangs 2023 im Schwyzer Fäärnsee uusgstraalt wooren isch.
D Andrea Štaka schafft hite as Reschiseeri, Draaibuechautori un Produzänti. Si läbt mit irem Partner, em Filmmacher Thomas Imbach, un irem gmainsame Suhn z Züri. In verschidene Projäkt het si au mit irem Mann scho zämegschafft. Anne 2007 hän si zäme d Firma „Okofilm Productions“ grindet.
This article uses material from the Wikipedia Alemannisch article Andrea Štaka, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Dr Inhalt isch verfiegbar unter CC BY-SA 4.0, wänn nyt andersch aagee isch. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Alemannisch (DUHOCTRUNGQUOC.VN) is an independent company and has no affiliation with Wiki Foundation.