Page:Kutenai Tales.djvu/79

“ta′x̣as hułʼι′łwa; ta′x̣as kutsx̣a′łʼe·k, kuhu·′was.” neᵢsts k.ła′x̣am neᵢ łu′kpo nasqasa′se·ts kmι′tx̣a· skι′n·ku·ts. ta′x̣as nʼιłwa′n·e· neᵢs yaₐqakqa′pske· qawυłe·ι′t.se· skιkts!łanu′kse·. ta′x̣as qaox̣ałʼιsaknu′n·e· neᵢs aₐʽkιkts!ła′ₐnoᵤks. qa·nqa′me·kts nʼιła′n·e·. słiła′x̣ₐne· tιłnamu′ʼe·s neᵢs k!ι′łwa. qawunekι′t.se·. nʼuk!unłhutska′se· ka′ₐkens. yunaqa′pse·. nʼuk!unłʼι′kᵢne· neᵢs k!ιłwana′m·e·s. qałwi′yne· kts!o′ᵤwuk skιn·ku·ts; t!aptse·kpu′k!ᵘne·. nʼupsłatwιtsno·tex̣a′ʼmne·ts qa‵tał·ałux̣u′se· aₐʽkιkpu′k!ᵘe·s. ta′x̣as nʼι′kᵢne· neᵢ ka′ₐkeᵢn neᵢs iya′muʼs. q!a′px̣ₐne·. ta′x̣as łało′ᵤse·. tsin saqno′ᵤne· skι′n·ku·ts, nawo·′kᵤne· sł·ałox̣u′se· aₐʽkιkpu′k!ᵘe·s. qake′ᵢne· skι′n·ku·ts: “t!aptse·kpu′k!ᵘso, t!aptse·kpu′k!ᵘso·!” qaox̣a′x̣e·, tsιn ma·′k!s nʼιnqapta′kse·. qałwi′yne·: “ta′x̣as hułʼyaq!ax̣a′me·k.” ta′x̣as nʼιt!qaox̣akι′n·e· neᵢs maₐk!s. ta′x̣as sιłʼyaq!a′ₐne·. qakełι′ne·: “paₐt!, at ma kuqa·ʼqanła′łtse·s maₐk!.” qake′ᵢne·: “mι′kₐ ma kqanι′ke·.” tseᵢka′te·ts nʼι′n·se na′łme·t!s. qak,ła′pse·: “huts!ιsιnłyaq!a′ₐne·.” qak.ła′pse·: “hιntsx̣ałhawιtsqatkna′pᵢne·.” Ta′x̣as nawιtsqatι′n·e·. qak.ła′pse·: “maₐts tsmak!wιtskι′n·e·; hιnłna′łmιt!qatkι′na·p.” ta′x̣as qakna′ₐne·. qatsma·k!wιtskι′n·e·. tsukᵘa′te· na·′łmιt! aₐʽkuktsι′keᵢns; qan·akι′n·e· neᵢs aₐʽknu·′łma·ks, neᵢs k!ałmanu·′łma·ks. qakiłι′łne· skι′n·ku·ts: “ye·‵sιnwuqoᵤkpι′tske·.” at qasakinłι′sᵢne· aₐʽk!ałma′e·s; aₐʽke· at qake′ᵢne· skι′n·ku·ts: “huye·‵sιnwu‵qoᵤkpι′tske·.” no·tsιnqkupe·kι′me·k na′łmιt!. nałkι′n·e· aₐʽknu·′łma·ks. ta′x̣as mιtya′x̣ₐne· skι′n·ku·ts, qaknu′te·. nʼupsła‵tᵢyiłʼι′kᵢne· na′łmιt!, słało′ᵤse·. neᵢs qałamanιnmι′te· neᵢs aₐʽko·ktsι′keᵢns. qakiłι′łne· skι′n·ku·ts: “ιn hιnłιnʼo′ᵤte·.” ta′x̣as ts!ιna′x̣e· na′łmιt!. tsukᵘa′te· skι′n·ku·ts neᵢs aₐʽko·ktsι′keᵢns. nʼιłta′x̣ₐne·, pał kts!a′qa·ps. qa·kqa‵nwιsqa′ₐne· skι′n·ku·ts, tsin·ιnqapta′ks·e· aₐʽq!a′n·a·ks. qałwi′yne.: “hułʼιt!qaox̣a′ke·nts kuts!aqtsa′kx̣o·.” ta′x̣as nʼιsaknu′n·e· kts!aqtsa′kx̣o· skι′n·ku·ts. qakiłι′łne·: “pa·t!, at ma kuqaqanła′łtse·s maₐk!.” tseᵢka′te· nʼa′s·e· pa·′łkeᵢs, nʼι′n·se· eᵢ′qo·łsts wa′ku·ks. qak.ła′pse·: “ta′x̣as huts!aqtsa′kx̣o·nała′ₐne·. nι′nko· ts!ι′na·nts, qo· hιntstsukᵘa′te· qa′psi·n, hιntsx̣ałhału·‵qkᵤniłx̣neᵢmu′n·e·. hιn·u‵px̣a na·qa′ski·łhanq!o·′ko·. ta′x̣as hιntsłats!ka′x̣e·.” ta′x̣as ts!ιna′x̣e· skι′n·ku·ts. nʼa‵kaʼnk!o′ᵤne·; nʼaqtsx̣o′ᵤne· nʼιtmase′ᵢte·. qaosaqa′ₐne· skι′n·ku·ts, nʼu′px̣ₐne·, tax̣′as wιłιnq!oko·′pse·. ta′x̣as łatsʼιna′x̣e·. ta′x̣as k.ła·ła′x̣a·m. ło′ᵤse· qa′psιn. tseᵢka′te· naʼs aₐʽkits!ła′e·ns swιtsq!nu′se· wa′ko·ks, nʼao·′k!we·s neᵢs łuha·‵wιtsq!nu′se· nʼao·′k!we·s nałx̣o′ᵤse· t!na′muʼs nʼao·′k!we·ʼs nałx̣o′ᵤse· hoq!kaι′se·. ta′x̣as ło′ᵤse· ke′ιk neᵢs k!ι′łwa neᵢs iya′muʼs. ta′x̣a.