香港 風球: 由香港天文台發出嘅天氣警告
風球，簡稱波，正式名稱叫熱帶氣旋警告信號，係香港天文台當發現有熱帶氣旋影響香港嗰陣向市民發出嘅警告。
而家風球分為1號（波）、3號（波）、8號（波）、9號（波）同10號（波）五種。
因為夜晚睇唔到風球，所以會掛信號燈代替。
隨住時代進步，市民可以由唔同途徑攞到詳細嘅風球同有關嘅天氣信息，呢啲重要嘅信息都係信號站唔能夠提供。所以香港天文台亦由2002年起唔再「懸掛」同「除下」風球同埋信號燈，改為透過其他途徑「發出」同「取消」風球。
現行風球
香港用緊嘅風球如下：
| 名 | 標誌 | 夜間燈號 (由上至下) | 意義 | 應變措施 |
|---|---|---|---|---|
| 一號戒備信號 |  | 白白白 | 有一個颱風喺香港800公里入面，陣間可能影響香港。 | 如要出街，應記得有嗰颱風而家喺度接近香港，晏啲可能影響你嘅出街計劃。 留意最新嘅颱風消息。 |
| 三號強風信號 |  | 綠白綠 | 香港近海平面處而家或可能會普遍吹強風， 持續風力每小時41至62公里，陣風可能超過每小時110公里，而且風勢可能持續。 風球發出之後12嗰鐘入面香港風力會普遍加強， 離岸海域同埋高地風勢更可能達烈風程度。 | 應該將易被吹倒嘅物件嘅嘢縛緊。 將易被吹走嘅物件嘢搬回室內。 檢查同保持坑渠暢通。 留意進一步嘅風暴消息。 |
| 八號烈風或暴風信號 |     | 白綠綠(西北) 綠白白(西南) 綠綠白(東北) 白白綠(東南) | 香港近海平面處而家或可能會普遍吹烈風或暴風， 並且由風球（東北、東南、西北、西南）所指方向吹埋黎， 持續風力去到每小時63至117公里，陣風可能超過每小時180公里，同埋風勢可能持續。 | 應該喺烈風出現之前搞掂防風措施。 鎖實門窗，整牢窗板同大閘。 喺當風嘅大玻璃後面貼膠紙。 遠離當風嘅窗，揀間房喺嗰窗爆個陣用黎躲避。 停止一切水上活動。 |
| 九號烈風或暴風風力增強信號 |  | 綠綠綠 | 烈風或暴風風力嚟緊會加強得好明顯。 | 唔好出街，保持喺室內安全地方，遠離當風嘅門窗，以免被碎片擊中而整親。 如果門窗爛咗，應該等喺安全情況之下先去整。 如果已身在戶外，應該搵個安全嘅地方躲避，直至颱風過後為止。 |
| 十號颶風信號 |  | 紅綠紅 | 風力而家或就嚟加強至颶風程度， 持續風力每小時118公里以上，陣風可能達每小時220公里。 | 颱風將正面吹襲香港。 當風眼經過嗰陣，風勢可能會突然平靜，維持數分鐘至數小時； 然後強風突然喺另一邊吹埋黎，本來俾屏蔽嘅地區會變成食風。 停留喺安全地點，切勿出街。 |
舊風球
香港風球初時只有方位，同分三百英里內同外。方向用向上同向下圓錐，圓球同圓筒組合來表示。三百英里外用紅色，三百英里內，用黑色。另有緊急風球，係十字形。
| 方向 | 風球（三百英里外） | 風球（三百英里內） |
| 北 | 紅上錐 |  黑錐 |
| 東北 | 紅上錐及筒 | 黑上錐及筒 |
| 東 | 紅筒 | 黑筒 |
| 東南 | 紅下錐及筒 | 黑下錐及筒 |
| 南 | 紅下錐 | 黑下錐 |
| 西南 | 紅下錐及球 | 黑下錐及球 |
| 西 | 紅球 | 黑球 |
| 西北 | 紅上錐及球 | 黑上錐及球 |
當打風去到全速，會掛緊急風球，掛喺水警總部同船政司署。呢個風球，高過晒其他風球訊號。
| 風球 | 炮 |
| 黑十字 | 三下炮，隔十秒一炮。 |
夜晚掛燈號，會掛喺水警總部、船政司署同添馬艦。
| 號數 | 離 | 打直三燈 | 炮 |
| I （一） | 三百英里以外 | 綠綠綠 | |
| II（二） | 三百英里以內 | 綠紅綠 | |
| III（三） | 風力全速 | 紅綠紅 | 有炮響 |
另有七個站，日頭會掛圓錐。通知本港嘅船。
參考
This article uses material from the Wikipedia 粵語 article 風球 (香港), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈；可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.