賭枱底係種外圍賭法,指客人就賭場賭枱上嘅結果,私下同其他人對賭;例牌由疊碼仔記數,對手嘅人亦會𥄫實。要與「賭枱底」區分,指明普通對賭部分時,會講賭枱面;兩者合稱賭底面——多數客人參與「枱底賭局」時,會同時喺「枱面」押注,而用於前者嘅數額普遍係擺落後者嘅三—十倍。由於必須有人「賭枱面」,先至有人可以「賭枱底」,「賭枱底」同「賭底面」經常可以互換嚟用。賭枱底又叫拖底或托底。
呢種玩意喺澳門賭廳頗為流行,基本上唔合法,亦有逃税作用。南洋都興呢味嘢,美國就好少噉樣搞。部分人之所以參與呢種賭局,係因為嫌賭枱嘅限注額太低,唔夠過癮;亦有啲人雖然賭本唔夠,但係想贏大錢,於是噉樣做。對賭嘅另一方,通常係某啲賭廳廳主同專門撈外圍賭博嘅集團——誘因係靠莊家優勢直接獲利往往划算過轉賣泥碼。噉樣賭法會令賭場收入及政府税收少咗,亦有大把其他罪案依附於此等賭局,例如存款詐騙及洗黑錢;對比起正規賭博,莊閒雙方都有較多賴賬者,意味贏家隨時要額外花功夫追債。
This article uses material from the Wikipedia 粵語 article 賭枱底, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.