田中久一

田中久一響1889年3月16號喺兵庫縣出世，原本叫小金井久一，後嚟過繼咗畀田中八作，做咗佢養仔，所以改姓田中。1907年成為士官候補生，三年後陸軍士官學校（第22期）畢業，同年12月正式參軍，任職步兵少尉，附屬步兵第37連隊。1913年就讀陸軍戶山學校，重做埋嗰度嘅教官，同年12月升做中尉。響做過教育總監部幹部（1914年至1918年）之後，1918年11月，以陸軍大學校第30期畢業生嘅身份畢業。

之後先後任職過參謀本部付勤務（1919年）、參謀本部員（1920年）、步兵第1連隊付屬（1924年12月，同年升做少佐）、陸大專攻學生（1926年12月，一年之後畢業）、陸大教官（1927年）、陸軍省軍務局課員（1932年）、陸軍步兵學校教官（1933年）、近衛步兵第1連隊隊長（1935年）、陸大教官（1937年再任）。1923年亦曾經到美國出差。

1938年出任台灣軍參謀長，同年9月出任第21軍參謀長兼戶山學校校長。佢響出任第21軍參謀長期間，曾經先後帶全軍隊攻佔法屬印度支那（即佛印作戰）同埋廣州。1939年日本改組華南方面軍，一年後佢晉升到中將。同年日軍為咗更好攻佔香港，華南方面軍畀上頭撤消，附屬響華南方面軍嘅第21軍隨即解散。

1943年3月，田中接替酒井隆做第23軍司令官，由主要處理法屬印度支那變成處理對中國嘅軍事。1944年有份參加豫湘桂會戰，一年後兼任香港總督，接替被調去台灣嘅磯谷廉介。同年8月，昭和天皇宣佈日本投降，田中響冇得撈香港總督嘅同時，亦向張發奎同埋余漢謀投降。

審判

 

 

投降之後，田中畀美軍上海軍事法庭判為乙級戰犯，1946年話因為佢響出任香港總督期間涉嫌非法殺咗盟軍戰俘、美國空軍少校荷克，判佢死刑，處死方法係絞刑。後嚟美軍上海軍事法庭將呢單案轉交畀中國南京軍事法庭。5月，南京軍事法庭正式開庭審理；10月，話因為佢作戰方法好殘忍，同上海軍事法庭一樣判佢死刑。1947年3月27號，響廣州市流花橋刑場執行死刑，田中畀中華民國憲兵石光中打靶，終年五十八歲。

佢死後，條屍畀四個埋屍工埋咗響一個畀牛浸嘅水塘仔。後嚟響1972年，佢嘅骸骨畀人搬返日本。

以下係田中久一歷年嘅軍階：

• 1910年 - 少尉
• 1913年 - 中尉
• 1920年 - 大尉
• 1925年 - 少佐
• 1930年 - 中佐
• 1934年 - 大佐
• 1937年12月 - 少將
• 1940年8月 - 中將

• 田中嘅遺言係：

永年の　終りの歩み　さわやかに

恵みの途を　辿りゆく吾

粵文：

響思典嘅旅途入面 隨住我就嚟要喊出嚟（第二句）

再一次踏上咗永遠嘅終結 令人耳目一新（第一句）

• 當初接受田中久一投降嘅張發奎，響事後諗返當時嘅情況，覺得田中並唔係好似法庭所講「作戰方法好殘忍」嘅人。張認為，佢唔似酒井隆咁屠殺市民，但係全因佢冇阻止到下屬殘忍嘅行為，因為佢係軍團阿頭，所以佢先至抵死。
• 當年槍斃田中嘅憲兵石光中話，田中響畀人打靶前，淨係飲咗兩杯酒就上刑場，神情莊嚴，完全唔驚，話佢充分體現咗日本武士精神。

• 養父：田中八作
• 大仔：田中義信（陸軍大尉，戰死）