2012 წანაშ ფილმი ნჯარიშ ეშმაღალარეფი

თის დისტრიბუციას უკინანს Walt Disney Pictures. ფილმი გერსხილი რე კომპანია Marvel Comicsშე გიშაშქუმალირი სუპერგერგეზეფიშ ბუნა „ნჯარიშ ეშმაღალარეფიშ“ დუდსგინულირეფშა. ფილმიშ სცენარიშ ავტორი დო რეჟისორი რე ჯოს უიდონი. თარი როლეფს თის ასრულენა რობერტ დაუნი უკლაში, კრის ევანსი, მარკ რუფალო, კრის ჰემსვორთი, სკარლეტ იოჰანსონი, ჯერემი რენერი, ტომ ჰაიდელსტონი დო სემიუელ ლეროი ჯექსონი.

ფილმიშ სიუჟეტიშ მეჯინათ, ორგანიზაციაშ S.H.I.E.L.D. ლიდერი ნიკ ფიური (სემუელ ლ. ჯექსონი) რკინაშ კოჩის, ჰალკის, თორს დო კაპიტან ამერიკას მიორცხუანს ართ ბუნას, ნამუსით „ნჯარიშ ეშმაღალარეფი“ ჯოხო. ბუნაქ ოკო აჩემას ლოკიშ, თორიშ ჯიმაშ ქიმინჯალეფი, ნამუთ მემართილი რე დიხაუჩაშ ნწყუალაშო.

ფილმიშე მუშობაქ დიჭყჷ, მუჟამსჷთ მერილ ლინჩი 2005 წანაშ პირელს Marvel Comics-შ ართ-ართი მეწილექ იჸუ. ფილმიშ „რკინაშ კოჩი“ 2008 წანაშ წჷმოძინაშ უკული Marvel Studios-შე ჩინებულქ იჸუ, ნამდა „ნჯარიშ ეშმაღალარეფი“ 2011 წანაშ კვირკვეს გიშეშჷ. 2009 წანაშ მელახის ბუნას აკათჷ სკარლეტ იოჰანსონიქ. ფილმიშ რსულებაქ 2012 წანაშო გინიდუ. ფილმიშ წარმებაქ დიჭყუ 2011 წანაშ პირელს, ნიუ-მექსიკოს გინოღალეფით დო 2011 წანაშ მარაშნათუთას გინილჷ კლივლენდიშ ტერიტორიაშა. 2011 წანაშ ეკენიას გინოღალეფი ნიუ-იორკის მიშჷ.

„ნჯარიშ ეშმაღალარეფიშ“ პრემიერაქ იჸუ ჰოლივუდის (კალიფორნია, ააშ), თეატრში El Capitan, 2012 წანაშ 11 პირელს. ამდღარშო თინა 1 მილიარდი დოლარიშ მიშნაველიშ ხურგაშ გინოლახუა ჸურე რეკორდსმენი რე დო არძა ბორჯიშ მუშნაველიანი ფილმეფიშ ერკებულს წკარით მასუმა აკანი უკინებუ.

ფილმიშ გეჸვენჯი ნორთეფიშ წარმებაქ 2012 წანაშ მესის დიჭყჷ.

ასგარდალი ლოკი ხვადუ ჩიტაურეფიშ ჯოხოთ ჩინებულ უჩინებუ რასაშ მაჯღვერს. ტესერაქტიშ გამათ ურცხოპლანეტარი ლოკის მიარზიენს ჩიტაურალეფიშ დიდ არმიას, ნამუთ დიხაუჩაშ ეჭოფუას მიეხვარებუნ. ნიკ ფიური, ოთხობელუ S.H.I.E.L.D.-შ უნჩაში დო აგენტი მარია ჰილი ეჭანუაფუნა ორკვიებელ ცენტრის, სოდეთ ერიკ სელვიგი მართუნს ტესერაქტიშ რკვიებაშ პროცესის. ფილ კოულსონი ენწყჷნს, ნამდა ტესერაქტი გიშართჷნს ენერგიაშ დიდ მუდანობას. ულებუო ტესერქტი აქტიური იჸუაფუ დო ნწყუნს პორტალს, სოჸურეშეთ გიშარჩქინდუ ლოკი. თინა ტესერაქტის იხირუნს დო მუში ლაბაშათ სელვიგის დო შხვა აგენტეფს (თინეფ შქას, ქირიშთოლს (კლინტ ბერტონი) იმორჩილენს.

გამათ თეშე ფიური დუდს მუშაყარანს სუპერგერგეზეფს: რკინაშ კოჩი (ტონი სტარკი), კაპიტანი ამერიკა (სტივ როჯერსი), ჰალკი (ბრიუს ბანერი) დო უჩა ქვრიი (ნატალია რომანოვა). ქირიშთოლი იხირუნს ირიდიუმს, ნამუთ ხეს უნწყჷნს ტესერაქტიშ ნძალაშ სტაბილიზაფას, დო ლოკი შტუტგარტის რე, სოდეთ აწუდირთუ როჯერსის, სტარკის დო რომანოვას. ლოკის ჭოფუნა დო S.H.I.E.L.D.-შ შტაბ-ორენშა გინოჸუნა, მარა ეთიმწკჷმა გიშარჩჩქინდუ თიში ჯიმა, თორი დო თიში გოდუდიშულაფას ოცადჷ - თი იმენდით, ნამდა ლოკი მუში გეგმეფს თირანს დო ასგარდშა დირთუ. სტარკი დო როჯერსი ართიანს ენირზებუნა. თორი ოჸიას იჩიებუ ლოკიშ S.H.I.E.L.D.-ს ოფურინალ ბაზას, ჰელიკარიერშა გინოჸუნაფას. თექ ლოკი გიმოკილერი რე დო ბენერიშ დო სტარკიშ გესაძინებაშ გიმე რე. S.H.I.E.L.D. ოცადუ ტესერაქტიშ არდგილოჸოფელიშ რკვიებას.

ნჯარიშ ეშმაღალარეფიშ ბუნა აკირღვაფუ, ართშურუა ლოკიშ ოკითხეს აკანი ვაუღჷ. თინეფიშ ნირზიშ ბორჯის ხვამარდის გიანთხუნა ბართონი დო შხვა თხობელეფი. გილელენს ოფურინალი მექანიზმი, ბენერი ჰალკო გინირთუ, სტარკი დო როჯერსი ეცადებუნა მექანიზმიშ ემუშაფას დო თორი ჰალკიშ აგრესიაშ ჩემებას. რომანოვა ბარტონს ოლიმუ დო ათე ეკონია უგონეთ ეკირთუ. ლოკი გიმურს ოთხილარი კაბინაშე, ჸვილუნს კოულსონს დო მუშ ჯიმას მუში კაბინას ინახვილანს, ბაზაშე გითაჸოთანს. ჰალკი დანთხუ დიხას. ფიური კოულსონიშ ღურას გჷმირინუანს ნჯარიშ ეშმაღალარეფიშ აკორცხუალაშ წკარულ სამანჯელო. სტარკიშ დო როჯერსიშ არზით ლოკიშ გეგმეფშა ვემშურს ხვალე თინეფიშ მარცხება, თის ოკო დიხაუჩას პატჷნალა. ლოკი გჷმირინუანს ტესერაქტის დო სტარკიშ ჸორშიშე პორტალს ონჯანს. ჩიტაური ათე პორტალით ნიუ-იორკის ქვერსემი ფლოტით მიშულა.

ნჯარიშ ეშმაღალარეფი აკიკათუნა ნოღაშ ოთხილარო. ათე ბორჯის ფიურიშე მაღალო გჷმარინალი პიჯეფი გინოჭყვიდჷნა უჩინებუ რასაწკჷმა ბირთვულ ანჯარით რჯგინას დო მანჰეტენშა ბირთვული რაკეტაშ ჯღონას. სტარკი ჭოფუნს რაკეტას დო პორტალს მითაჸოთანს. თინა მერეხანს ემაჭოფალეფიშ თარი ხვამარდის. თორი უკული ტესერაქტის დო ლოკის ასგარდიშა ორთინუანს. ფიური შინანს, ნამდა ნჯარიშ ეშმაღალარეფი დირთუნა თიმწკჷმა, მუჟამსით ოხვილური იჸინან.

 

 

• რობერტ დაუნი უკლაში - ტონი სტარკი / რკინაშ კოჩი
• კრის ევანსი - სტივ როჯერსი / კაპიტანი ამერიკა
• მარკ რუფალო - ბრიუს ბანერი / ჰალკი
• კრის ჰემსვორთი - თორი
• სკარლეტ იოჰანსონი - ნატალია რომანოვა / უჩა ქვრიი
• ჯერემი რენერი - კლინტ ბერტონი / ქირიშთოლი
• ტომ ჰაიდელსტონი - ლოკი
• კლარკ გრეგი - ფილ კოულსონი
• ცობიე სმულდერსი - მარია ჰილი
• სტელან სკარშგორდი - ექიმი ერიკ სელვიგი
• სემიუელ ლეროი ჯექსონი - ნიკ ფიური
• გვინეთ პელტროუ - პეპერ პოტსი
• მაქსიმილიანო ჰერნანდესი - ჯასპერ სიტუელი
• პოლ ბეტანი - ჯარვისი
• ალექსის დენისოვი - შხვა
• დემიონ პუატიე - თანოსი
• სტენ ლი - ეპიზოდური როლი ახალი ამბეფიშ ბლოკიშ ბორჯის

 

ვიკიოწკარუეს^? რე ხასჷლა თემაშენ:

ნჯარიშ ეშმაღალარეფი

• ოფიციალური ვებ-ხასჷლა
• ნჯარიშ ეშმაღალარეფი — კინოფილმეფიშ ინტერნეტ-მუნაჩემეფიშ ბაზა (ინგლისური)
• ნჯარიშ ეშმაღალარეფი — Rotten Tomatoes-ს
• შნჯარიშ ეშმაღალარეფი — Box Office Mojo-ს
• ნჯარიშ ეშმაღალარეფი საიტის The Numbers