Jean Rode

Jean-Louis Rode (1897-1980), pus sovint lomé Djihan Rôde, c' esteut on scrijheu d' arimés et d' pîces di teyåte e walon.

I skepia li 11 d' avri 1897 a Hesta, dins ene famile di shijh efants. I n' fijha ses scoles ki disj' a doze ans, la k' i cminça tot djonne a-z ovrer dins l' minme mestî ki s' pa, ki fjheu des moulaedjes di såvlon.

E 1914, tins del prumire guere daegnrece, adon k' i n' aveut k' 17 ans; i s' egadja come volontaire a l' årmêye, po disfinde li payis; i fjha tote li guere eyet rçuva bråmint des medayes. I fourit dismobilijhî li 20 d' awousse 1919.

Rivnou al veye civile, i rataca a l' oujhene, mins ene miete après, e 1922, i moussa-st al police di Hesta; il î divna sicretaire di police e 1934, eyet prinde di pinsion e 1957.

Il a morou e 1980.

I cminça pa scrire bråmint des pîces di teyåte, ene dijhinne inte 1924 et 1928. Cénk did zeles ont stî eplaideyes. Li restant si pierda dins on målfeu.

Ces cénk pîces la ont stî djouwêyes bråmint des côps.

E 1929 i s' djoke di scrire e walon, ”po råjhons d' mestî” et n' riprindra ki nouv ans après si pinsion, e 1966, po on concours metou so pîs på Royå Cavå Lidjwès, soce k' il end esteut mimbe dispoy des razans. I wangna l' prumî pris.

I fjha eplaidî deus ramexhnêyes d' arimés “Claire aiwe et vert mossea” et “Rimeas dal vesprêye”.

Il a eto ratourné Maurice Carème (“Mame”) et Lafontinne “Poes d' trokes”.

Il esteut mimbe do Rweyål Cåvea Lidjwès, des soces La Wallonne, Auteurs Wallons eyet Dicipes da Jules Claskin.

On relijhaedjes dis ses ouves fourit eplaidî pol «wallonne» e 1977, po les ûtante ans d' l' oteur. Il est eto rprin dins l' antolodjeye Scrire.

Les pîces di teyåte sicrîtes pa Djhan Rode

• en èn ake
  • "Titene djåze l' inglès"
  • "Li vî tchestea"
  • "I m' plait"
  • "Nenete mareye si feye"
• e deus akes
  • "Cwand les cours s' etindèt"
  • "Les martchoteus".
• e troes akes
  • "Li bribeu d' amour",
  • "Les pawoureus",
• e cwate akes
  • Les leus el biedjreye

eto, ene rivuwe e 3 akes ey on prologue: ”Kéla-Fêra-Hesta” (djeu d' mot: kéle afwaire a Hesta)

Li pådje Djihan Rode