Sonda Spasiałe

Se ze drio parlar de na astronave che zeneralmente ła viaja verso pianeti esterni e prinsipalmente el ze un veìcuło esplorativo, mentre un satèłite artifisałe el ze ma astronave che ła se lìmita a voltar da torno a ła Tera.

Na tìpega sonda spasiałe ła consta zeneralmente de un bloco de metało alto racuanti metri, totalmente cuerto da antene, tełecàmare, brasi mòbiłi, etc. Da na parte ła dòmena na antena parabòłega doparada par comunicasion co la Tera, da l'altra ła tobera de descargo del motore prinsipałe. I motori i ze doparai sia par canbiar la vełosità de ła sonda, par eventuałi manovre cofà l'insersion in òrbita da torno a un pianeta, sia par controłare el so orientamento inte łe tre dimension. De frecuente la sonda ła ze cuerta da un fojo de carta metàłego refletente, che el ga el fine de reflètar i raji sołari che de contràrio i la suriscaldaria.

Se la mision de ła sonda ła ze prevedesta col fin de esplorare corpi del sistema sołare interno, ła garà panełi sołari ùtiłi par prodùzar ełetrisità, se invese el fine el ze l'esplorasion de corpi cełesti del sistema sołare esterni, la sonda ła detegnarà racuante batarie, zeneralmente nucleari che łe desfruta el decadimento radioativo de sostanse cofà plutònio.

Le mision de łe sonde łe połe prevédar dei sorvołi de alta vełosità (flyby), o sanò l'insersion in òrbita da torno al corpo sełeste (la sonda ła ze de consevensa dizesta orbiter), e de łe volte l'aterajo de ła sonda o de parte de sta cuà (lander), se no par-fin el tornar de novo in Tera co canpioni de ròcia erlevai dal teren esplorà.

Na sonda no ła ze bona de erlevarse eła soła in voło ła vien de consevensa lansada par mezo de un razo vetore che la sgansa inte ła trajetòria inisiałe vołesta. Sta trajetòria ła ze sta calcołada dai controłori de voło in magnera che, movéndose solché gràsie a inèrsia e a l'influensa de ła gravità dei vari ojeti del sistema sołare, sta cuà ła rìvee a destinasion doparando el mìnemo de carburante necesàrio.

•   Wiki Commons el detien imàjini o altri file so sonda spasiałe

• (EN) space probe / deep-space probeEnçiclopedia Britannica, Encyclopædia Britannica, Inc.