Un sistema de votasion o sistema ełetorałe 'l xe l'insieme de le regołe co cui se vota par n'elesion o pà un referendum.
Vien cussita precixà come xe che xe fata ła scheda ełetorałe, quante xe e come che xe fate łe circoscrision, cossa e come se poe votare e come xe che vien fora el rixultato de ła votasion (chi xe che se toe łe careghe par na elesion e se xe passà o manco ła proposta pà un referendum).
Difarenti sistemi de votasion i voe difarenti schede ełetorałi.
Co alcuni sistemi, sóra tuto coi proporsionałi, ghe xe ła posibiłità de dare el voto de prefarensa a una o pì persone del partio che te ghè votà. Co alcuni se poe anca votare contro un candidà (cavàndoghe un voto de prefarensa che el ga ciapà da qualchedun altro) o anca contro tuti i partii (in Itałia ła roba pì visina sarìa votare scheda bianca o 'nułarla par protesta, ma no ła ga mai efeti reałi fà cavare careghe a tuti quanti).
De sołito, tra i scopi de na ełesion ghe xe queło de 'vere n'òrgano lejislativo che gàpia łe careghe spartìe tra partii difarenti, cussita che sia raprexentàe łe idee e i intaressi de tuti quanti. Sta roba ła se poe 'vere dando tute łe careghe a liveło nasionałe e spartendosełe faxendo un conto ugnoło o dividendo i ełetori in varie circoscrision a seconda de ndoe che i abita: ogni circoscrision ła poe dare soło che na carega (eora la circoscrision se ciama anca cołegio uninominałe) o pì de una (cołegio plurinominałe).
I tipi de sistemi de votasion se poe inisialmente dividare tra proporsionałi e majoritari. Par 'vere n'equilibrio tra rapresentatività (favorìa dai proporsionałi) e goernabiłità (favorìa dai secondi) se ricore de frecuente a sistemi còreti o a sistemi misti.
I sistemi proporsionałi i xe quei ndoe che ła persentuałe de careghe pà ogni partio ła xe grosomodo conpagna a quea dei voti ciapài.
Par spartirse łe careghe in modo proporsionałe tra i partii ghe xe dó fiłosofie de pensiero: ghe xe el metodo del divixore e ghe xe el metodo dei resti pì grandi. Col primo, e in particołare qua prexentemo el metodo d'Hont, se dà na carega drio chealtra (finché no łe finise) al partio che faxendo "voti ciapài / (careghe xà 'segnàe)" el ga el rixultato pì grando. Col secondo, e in particołare qua prexentemo el metodo Hare, ogni partio se tóe tante careghe quante ghe ne vien fora vardando la parte intiera de "careghe in tuto * voti ciàpai / voti bóni par tuti i partii", łe careghe restae vóde łe va ai partii co ła parte dopo ła virgoła pì granda.
El problema del sistema proporsionałe puro xe che a xe agra che un partio da soło el riesa ciapare na fracada de voti che ghe dia pì de metà de łe careghe, dasàndoghe goernare fasilmente. Se rende cussita de frecuente necesari acordi tra partii difarenti, a volte anca co partii che no i jera ne ła coalision ufisiałe prima del voto.
Par provar a jutare ła goernabiłità se ricore de frecuente a coretivi majoritari. I pì doparài i xe:
I sistemi majoritari i xe quei ndoe che łe circoscrision łe xe tute quante cołegi uninominałi. De sołito, par quanto posibiłe, se serca de fare cołegi che i sia grosomodo tuti grandi conpagni.
Co luninominałe seco', ogni cołegio el dà na carega al candidà (che el se poe prexentare ligà a un partio o fà indipendente dai partii) che ciapa anche soło un voto pì de chealtri, no inporta se quei che no lo ga votà i xe pì de quei che lo ga votà.
Co l'uninominałe a dó turni, ła carega ła va al candidà che el ga ciapà pì voti al primo turno soło se i jera almanco el 50%+1 dei voti bóni. Se no ghe xe stà candidài che i ga ciapà sta persentuałe, se fa un secondo turno (bałotajo) ndoe che se poe votare soło i candidài che i ga ciapà pì voti (almanco dó, ma a exenpio in Fransa i va al secondo turno anca quei che i xe sta votài da almanco 1 ełetore su 8, quindi ogni tanto ghe xe dei bałotaji co 3 o 4 candidài).
Col sistema col voto alternativo ogni ełetore el ga da ordinare tuti quanti i candidài, o almanco quei che ghe piaxe, secondo łe só prefarense.
I sistemi misti i xe quei ndoe che un fià de careghe se dà co un sistema majoritario e un fià co uno proporsionałe. Coi sistemi misti ghe xe quindi dei cołegi uninominałi (che i dà careghe al candidà che el vinse), ma ghe xe anca de łe circoscrision pì grande (muci de cołegi uninominałi) e che łe dà careghe proporsionalmente ai voti ciapài dal partio ne ła circoscrision stesa (eventualmente cavàndoghe i voti doparài dai só candidài par vinsare inte i cołegi uninominałi).
Controło de autorità | GND (DE) 4139210-3 |
---|
This article uses material from the Wikipedia Vèneto article Sistema de votasion, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). El contegnùo el xe disponibile soto CC BY-SA 4.0, almanco che no ghe sia scrito difarente. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Vèneto (DUHOCTRUNGQUOC.VN) is an independent company and has no affiliation with Wiki Foundation.