Муско Дыр

Та дыр Россилэн Европаысь люкетысьтыз уноез улосъёсын кутӥське. 26-тӥ октябрьысен 2014-тӥ арысен со UTC+3 дырлы кельшэ, 27-тӥ мартысен 2011-тӥ арысен 25-тӥ октябрёзь 2014-тӥ арозь UTC+4 дырлы кельшиз.

• Уйпал-Шундыпуксёнпал федерал округысь: Карелия, Коми Республика, Архангельск улос, Ненец автономной округ, Вологда улос, Ленинград улос, Мурманск улос, Новгород улос, Псков улос, Санкт-Петербург кар.
• Центральной федерал округысь: Муско кар, Белгород, Брянск, Владимир, Воронеж, Иваново, Калуга, Кострома, Курск, Липецк, Муско, Орёл, Рязань, Смоленск, Тамбов, Тверь, Тула, Ярославль улосъёс.
• Приволжской федерал округысь: Киров улос, Нижний Новгород улос, Марий Эл, Татарстан, Чувашия, Мордовия, Пенза улос.
• Лымшорпал федерал округысь: Адыгея, Калмыкия, Краснодар шаер, Ростов улос.
• Уйпал-Кавказ федерал округысь: Дагестан, Ингушетия, Кабардино-Балкария, Карачаево-Черкесия, Уйпал Осетия, Ставрополь шаер, Чечня.

2010-тӥ арозь Удмуртия муско дыръя ноку но ӧз улы. Нош 12-тӥ шуркынмонэ 2009-тӥ арын Федерал ӧтчамлы вазиськон дырын Россилэн Президентэз Д. А. Медведев ӵектӥз Россиын час поясъёслэсь лыдзэ ӧжытатыны. Самара дырлэн час поясэз ичиёмытон понна умой кандидат вал — та поясын кык гинэ улосъёс вал: Самара улос но Удмуртия. Озьы бере та час поясэз капчи быдтыны луэ вал. 2010-тӥ арын толшорын ини но Удмуртиысь властьёс ӝутӥзы юанэз муско дыре выжон ласянь. Кун телеканалъёс вераллязы туж трос плюсъёс сярысь, кудъёссэ муско дыр, пе, Удмуртие ваёз. Шаерлэн Президентэз А. А. Волков, муско дыр понна шуыса, чӧлскиз олокытын ортчытэм юалляськон вылэ, кудӥзлэн результатъёсызъя Удмуртиын улӥсьёс пӧлысь сизьымдон процент, пе, муско дыре выжон понна луэ. Та юалляськонлэсь зэмлыксэ эскерыны нокызьы но уг луы вал. Соин ик 16-тӥ тулыспалэ ни Удмуриысь Кун Кенеш Россиысь Правительствое курон келяз республикаез Мусколэн час поясаз пыртыны. Россиысь премьер-министр В. Путин та куронэз удовлетворить кариз но, 28-тӥ южтолэзе 2010-тӥ арын Удмуртия но Самара улос гужем дыре ӧз выжелэ, муско дыре пырыса.

Нырысь пал муско дыр Удмуртиын вожпотон ӧз кылдыты. Нош толлань трос адямиос валазы, муско дыръя пеймыт одӥг часлы вазьгес вуылэ шуыса. А инвожое куазь ӟардылэ уйшор бере ни. Соин сэрен адямиос, кинъёслы муско дыр ярамтэ, тросазы. Шуркынмонэ 2010-тӥ арын соос огазеяськизы неформальной организацие — «Время по Москве — жизнь во тьме» («Муско дыр — пеймытын улон»).

Шуркынмонэ — толсуре ини 2010-тӥ арын Ижын Шор площадьын ӝыт пал кӧня ке флэш-мобъёс ортчизы. Со флэш-мобъёс ӵоже люкаськем адямиос площадь вылтӥ тэк ветлылӥзы, фонарьёсын югыт карыса. 1-тӥ толсуре, 15 сюрс манет люкаса, активистъёс Карл Маркс урамын ошизы «Время по Москве? Жизнь во тьме!» рекламной баннерез. Однако 3-тӥ толсуре ини рекламной фирма та билборд васькытӥз, мугъёсты валэктытэк. Собере та баннер трос полъёс эшшо кутӥськиз мукет акциос дыръя. Озьы, 11-тӥ толсуре 2010-тӥ арын но 26-тӥ тулыспалэ 2011-тӥ арын Ижысь Шор площадьын та баннер улын кык пикет ортчытэмын вал. Соосты ортчытыкузы, активистъёс гражданъёслэсь гожъянъёссэс бичаллязы Самара дыре берытскон понна. Ваньмыз 2010—2012 аръёсын муско дырлы пумит петиция улын гожтӥськизы сюрслэсь трос адямиос.

1-тӥ куартолэзе 2012-тӥ арын муско дырлы пумит нюръяськисьёс пыриськизы первомай ветлонэ Ижын.

Таки 2014-тӥ арын гинэ Удмуртиысь властьёс кылзӥзы калыклэсь верамзэ но берен сётӥзы республикалы час пояссэ. 26-тӥ коньывуонысен 2014-тӥ арысен Удмуртия выльысь Самара дыръя улэ.

• Шонерез муско дыр