ಶಂಕರ್ ನಾಗ್ (೧೯೫೪-೧೯೯೦) ಕನ್ನಡ ನಾಟಕೊ ಬೊಕ್ಕ ಸಿನೆಮಾ ರಂಗೊಡು ಬಾರೀ ಪುದರ್ ಮಲ್ತಿನ ನಟೆ ನಿರ್ದೇಶಕೆ.
ಶಂಕರ್ನಾಗ್ | |
---|---|
ಪುಟ್ಟಿನ | ಶಂಕರ್ ನಾಗರ ಕಟ್ಟೆ ೯ ನವೆಂಬರ್ ೧೯೫೪ ಮಲ್ಲಾಪುರ್, ಹೊನ್ನಾವರ (ಉತ್ತರ ಕನ್ನಡ ), ಕರ್ನಾಟಕ ರಾಜ್ಯ, ಭಾರತ |
ಮರಣ | 30 ಸೆಪ್ಟೆಂಬರ್ 1990 Near Anagod, ದಾವಣಗೆರೆ, ಕರ್ನಾಟಕ | (aged 35)ವಿವರೊ ದೋಸೊ: ಗೊತ್ತಾವಂದಿನ ಚಿನ್ನೆಲು "೨".
ಬೇತೆ ಪುದರ್ಲು | ಶಂಕರ್ ಅಣ್ಣ, ಕರಾಟೆ ಕಿಂಗ್, ಆಟೋರಾಜ, ಸೂಪರ್ ಸ್ಟಾರ್, |
ವೃತ್ತಿ(s) | ನಟೆ, ನಿರ್ದೇಶಕೆ, ನಿರ್ಮಾಪಕೆರ್, ಚಿತ್ರಕಥೆಗಾರೆ, ಕಿರುತೆರೆತ ನಟೆ, ಕಿರುತೆರೆ ನಿರ್ದೇಶಕೆರ್ |
ವರ್ಷಗಳು; ಸಕ್ರಿಯ | 1977–1990 |
ಎತ್ತರ | 5 ft 7 in (170 cm) |
ಸಂಗಾತಿ | ಅರುಂಧತಿ ನಾಗ್ |
ಮಕ್ಕಳು | ಕಾವ್ಯ |
ಕುಟುಂಬ | ಅನಂತ್ ನಾಗ್ |
ಜಾಲತಾಣ | http://www.shankarnag.in/ http://www.rangashankara.org/ |
ಶಂಕರ್ನಾಗ್ ಪುಟ್ಟುದಿನಿ ೯ನೆ ನವಂಬರ್ ೧೯೫೪ಟ್, ಕರ್ನಾಟಕ ರಾಜ್ಯ ಉತ್ತರ ಕನ್ನಡ ಜಿಲ್ಲೆ ಹೊನ್ನಾವರ ತಾಲೂಕುದ ಮಲ್ಲಾಪುರ ಪುದರ್ದ ಊರುಡು. ಇಲ್ಲದ ಭಾಷೆ ಕೊಂಕಣಿ. ನಕ್ಷತ್ರನಾಮ ಅವಿನಾಶ್. ಅಮ್ಮೆರ್ ಸದಾನಂದ ನಾಗರಕಟ್ಟೆ, ಅಪ್ಪೆ ಆನಂದಿ. ಕಿನ್ಯ ಉಪ್ಪನಗ ಇಲ್ಲಡ್ ಭವಾನಿಶಂಕರ್ ಪಂದ್ ಲೆತ್ತೊಂದಿತ್ತೆರ್. ಪುಟ್ಟಿನಿ ಮಲ್ಲಪುರಡ್ ಆಂಡಲಾ ಮೊಕಲ್ನ ಸಂಸಾರ ನೆಲೆ ಆಯಿನಿ ಭಟ್ಕಳ ತಾಲೂಕುದ ಶಿರಾಲಿಡ್. ಅಕ್ಕ ಶ್ಯಾಮಲಾ, ಅಣ್ಣೆ ಪುದರ್ ಮಲ್ತಿನ ನಟೆ ಅನಂತ್ನಾಗ್
ಪ್ರಾಥಮಿಕ ವಿದ್ಯಾಭ್ಯಾಸ ಮುಗಿತ್ತ್ದ್ ಮುಂಬೈಗ್ ಪೋಯಿಬೊಕ್ಕ, ಮರಾಠೀ ಚಿತ್ರರಂಗ ಬೊಕ್ಕ ನಾಟಕ ಕ್ಷೇತ್ರೊದಡೆ ಶಂಕರ್ ಸೇರಿಯೆರ್. ದೋಸ್ತಿನಕುಲೊಟ್ಟಿಗೆ ಸೇರ್ದ್ ಕಥೆ ಬರೆಯಿನ ಮರಾಠೀ ಸಿನೆಮಾ ೨೨ ಜೂನ್ ೧೮೯೭ ರಾಷ್ಟ್ರ ಪ್ರಶಸ್ತಿ ಪಡೆಂಡ್.
ಬ್ಯಾಂಕ್ ಬೇಲೆದೊಟ್ಟುಗು ಶಂಕರ್, ತಬಲಾ, ಕೊಳಲು, ಹಾರ್ಮೋನಿಯಮ್ ಇಂಚ ಬೇತೆ ಬೇತೆ ಸಂಗೀತ ವಾದ್ಯೊಲೆನ್ ಲಾ ಕಲ್ತೆರ್.
ಶಂಕರ್, ಸುರೂತ ಸರ್ತಿ ಅಭಿನಯ ಮಲ್ತಿನ ಸಿನೆಮಾ ಒಂದಾನೊಂದು ಕಾಲದಲ್ಲಿ. ಗಿರೀಶ್ ಕಾರ್ನಾಡ್ ಈ ಸಿನೆಮಾದ ನಿರ್ದೇಶಕೆರ್. ಈ ಸುರೂತ ಸಿನೆಮೊಗೇ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಅತ್ಯುತ್ತಮ ನಟೆ ಪ್ರಶಸ್ತಿ ತಿಕ್ಕ್ಂಡ್. ಈ ಸಿನೆಮಾಡ್ದ್ ಬೊಕ್ಕ ಸುಮಾರ್ ೧೨ ವರ್ಷ, ೯೦ ಡ್ದ್ ದಿಂಜ ಕನ್ನಡ ಸಿನೆಮಾಡ್ ನಟನೆ ಮಲ್ತೆರ್. ಉಂಬೆರ್ ತ್ರಿಪಾತ್ರೊಡು ನಟನೆ ಮಲ್ತಿನ ಸಿನೆಮಾ ಗೆದ್ದ ಮಗ. ಅಣ್ಣೆ ಅನಂತ್ನಾಗ್ ಒಟ್ಟಿಗೆ ನಟನೆ ಬೊಕ್ಕ ನಿರ್ಮಾಣ ಮಲ್ತಿನ ಚಿತ್ರೊಲು: ಮಿಂಚಿನ ಓಟ, ಜನ್ಮ ಜನ್ಮದ ಅನುಬಂಧ ಬೊಕ್ಕ ಗೀತಾ. ಉಂಬೆರ್, ಕನ್ನಡ ರಂಗಭೂಮಿಡ್ ನಿರ್ದೇಶನ ಮಲ್ತಿನ ನಾಟಕೊಲೆಡ್ ಕೆಲವು: ನೋಡಿ ಸ್ವಾಮಿ ನಾವಿರೋದು ಹೀಗೆ, ಅಂಜು ಮಲ್ಲಿಗೆ. ಉಂದು ಅತ್ತಂದೆ, ದೂರದರ್ಶನಗಾತ್ರ ಮಾಲ್ಗುಡಿ ಡೇಸ್(ಆರ್ ಕೆ ನಾರಾಯಣ್ ಬರೆದಿನ) ಬೊಕ್ಕ ಸ್ವಾಮಿ ಪುದರ್ ದ ರಡ್ಡ್ ಧಾರಾವಾಹಿಲೆನ್ ನಿರ್ದೇಶಿಸಾದೆರ್. ಶಿವಮೊಗ್ಗ ಜಿಲ್ಲೆದ ಆಗುಂಬೆಡ್ ಚಿತ್ರೀಕರಣ ಮಲ್ತಿನ ಮಾಲ್ಗುಡಿ ಡೇಸ್, ನಮ್ಮ ಭಾರತೀಯ ದೂರದರ್ಶನ ಇತಿಹಾಸೊಡು ದಾಖಲೆ ನಿರ್ಮಾಣ ಮಲ್ತಿನ, ಮಾತ್ರ ಅತ್ತ್ ಪಂಡಿತೆರ್, ವಿಮರ್ಷಕೆರ್- ಮೊಕುಲು ಮಾತೆರೆಡ್ದ್ ಮೆಚ್ಚುಗೆ ಪಡೆದಿನ ಧಾರಾವಾಹಿ.
ಶಂಕರೆರ್ನ ಬುಡೆದಿ ಅರುಂಧತಿನಾಗ್. ಉಂಬೆರ್ಲಾ ಸಿನೆಮಾ ಬೊಕ್ಕ ನಾಟಕ ಕಲಾವಿದೆ. ಇರುವೆರ್ಲ ಪರಸ್ಪರ ಮೋಕೆ ಮಲ್ತ್ದ್ ಮದ್ಮೆ ಆಯೆರ್. ಶಂಕರ್ ಬೊಕ್ಕ ಅರುಂಧತಿ- ಇರುವೆರ್ ಸೇರ್ ದ್ ಸಂಕೇತ್ ಪುದರ್ ದ ಹವ್ಯಾಸೀ ನಾಟಕ ತಂಡೊನು ಕಟ್ದ್, ಪುದರ್ ಪೋಯಿನ ನಾಟಕೊಲೆನ್ ನಿರ್ದೇಶಿಸಾದ್ ಗೊಬ್ಬಾಯೆರ್. ಐಟ್ ಕೆಲವು: ಅಂಜುಮಲ್ಲಿಗೆ, ಬ್ಯಾರಿಸ್ಟರ್, ಸಂಧ್ಯಾಛಾಯಾ, ನೋಡಿ ಸ್ವಾಮಿ ನಾವಿರೋದು ಹೀಗೆ, ಆಟ ಬೊಂಬಾಟ, ನಾಗಮಂಡಲ...ಇತ್ಯಾದಿ.
ನಾಟಕೊಡು ಇತ್ತಿನ ಇಂಚಿತ್ತಿನ ಆಸಕ್ತಿಡ್ದಾವರ, ನಾಟಕ ಕಲಾವಿದೆರೆಗ್ ಸಹಾಯ ಆವರ ಬೋಡಾದ್, ಸಕಲ ಸೌಲಭ್ಯೊಲು ಇಪ್ಪುನಂಚಿನ ಒಂಜಿ ಮಾಮಲ್ಲ ನಾಟಕ ಮಂದಿರ ನಿರ್ಮಾಣ ಮಲ್ಪೊಡು ಪಂಡ್ದ್ ಎನ್ನ್ ದಿತ್ತೆರ್. ಆಂಡ ಆ ಯೋಜನೆ ಕಾರ್ಯರೂಪೊಡು ಬರ್ರೆ ದುಂಬೇ ಶಂಕರ್, ಸಾದಿ ಅಫಘಾತೊಡು ತೀರ್ದ್ ಪೋಯೆರ್! ಆಂಡ, ಆರೆನ ಬುಡೆದಿ ಅರುಂಧತಿ, ನಾಟಕ ಮಂದಿರದ ಬೇಲೆನ್ ದುಂಬರಿಪಾಯೆರ್. ರಂಗಶಂಕರ ಪುದರ್ದ ಈ ಮಂದಿರ ಇತ್ತೆ ಬೆಂಗಳೂರುದ ಜೆ. ಪಿ. ನಗರೊಡು ನಡತೊಂದು ಉಂಡು.
ಶಂಕರ್ನಾಗ್, ಡಾ. ರಾಜ್ಕುಮಾರ್ ಅಭಿನಯ ಮಲ್ತಿನ ಒಂದು ಮುತ್ತಿನ ಕಥೆ ಚಿತ್ರೊನುಲಾ ನಿರ್ದೇಶನ ಮಲ್ತ್ದೆರ್. ನಂದಿ ಬೊಟ್ಟೊಗು ರೋಪ್ ವೇ, ಬೆಂಗಳೂರುಗು ಮೆಟ್ರೊರೈಲ್- ಇಂಚಿತ್ತಿನ ಮಾತ ಕ್ರಿಯಾಶೀಲ ಯೋಜನೆಲೆನ್ ರಾಮಕೃಷ್ಣ ಹೆಗ್ಡೇರೆನ ಗಮನಗ್ ಕನದಿನಿ ಶಂಕರ್ನಾಗ್ ವೊವ್ವೆ ರೀತಿದ ಆಧುನಿಕ ಸೌಲಭ್ಯದಾಂತೆ, ಆ ಕಾಲೊಡೆ ಇಂಚಿತ್ತಿನ ಬೃಹತ್ ಯೋಜನೆಲು ಆರೆನ ಮನಸ್ಡ್ ಇತ್ತ್ಂಡ್ ಪನ್ನಗ ಶಂಕರೆರ್ ಒರಿ ಸಾಮನ್ಯ ಸಿನೆಮಾ ಕಲಾವಿದೆ ಅತ್ತ್ಂದ್ ಪಣೊಲಿ.
This article uses material from the Wikipedia ತುಳು article ಶಂಕರ್ ನಾಗ್, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.