ವಕುಲಾ ದೇವಿ

ತಿರುಮಲದ ದಂತಕಥೆತ ಪ್ರಕಾರ. ವಕುಳ ದೇವಿನ ದಂತಕಥೆ ದ್ವಾಪರ ಯುಗತವು.

ದಂತಕಥೆತ ಪ್ರಕಾರ ವಿಷ್ಣುನ ಅವತಾರವಾಯಿನ ಕೃಷ್ಣನ ತಾಂಕನದ ಅಪ್ಪೆ ಯಶೋದೆ, ಆಯನ ಒವ್ವೆ ಮದಿಮೆನ್ ಎಂಕ್ ತೂಯೆರೆ ಆಯಿಜಿ ಪಂದ್ ಬೇಜಾರ್ ಮಲ್ಪುವಳ್. ಅಯಿಕ್ ಕೃಷ್ಣ ದೇವೆರ್ ಆಳೆಗ್ ಕಲಿಯುಗೊಟ್ಟು ಅಂಚಿನ ಅವಕಾಶ ತಿಕ್ಕುಂಡು ಬರವಸೆನ್ ಕೊರ್ಪೆ.ಕಲಿಯುಗೊಟು, ವಿಷ್ಣು ವೆಂಕಟೇಶ್ವರನ ರೂಪೊನು ಪಡೆಪೆ ಬೊಕ್ಕ ಯಶೋದೆ ವೆಂಕಟೇಶ್ವರನ ತಾಂಕನದಪ್ಪೆ ವಕುಲಾ ದೇವಿಯಾದ್ ಪುನರ್ಜನ್ಮ ಪಡೆಪೆರ್. ದೇವರೆನ ವಾಗ್ದಾನದಂಚನೆ ಆಲ್ ತನ್ನ ಸಾಂಕನದ ಮಗನ ಮದಿಮೆನ್ ರಾಜ ಆಕಾಶ ರಾಜ ಬೊಕ್ಕ ರಾಣಿ ಧರಣಿ ರಾಣಿನ ಮಗಳ್ ಪದ್ಮಾವತಿನೊಟ್ಟುಗು ಏರ್ಪಾಡ್ ಮಲ್ಪುವಳ್.

ವಕುಳ ಮಾತಾ ದೇವಲ್ಯ ಆಂಧ್ರಪ್ರದೇಶದ ತಿರುಪತಿ ನಗರೊಡು ಉಂಡು. ತಿರುಮಲ ಬೆಟ್ಟಡ್ದ್ 10 ಕಿಲೋಮೀಟರ್ ದೂರೊಡು ಉಪ್ಪುನ ಈ ದೇವಾಲಯಗು 50 ಎಕರೆಗ್ಲ ಜಾಸ್ತಿ ಭೂಮಿನ್ ಉಂಬೊಲಿ ದೀತೆರ್. ಈ ದೇವಾಲಯೊನು , ದೇವಿನ ಮೋನೆನ್ಲ ಏಳು ಬೆಟ್ಟೊಗು ಎದುರಾಪಿನ ರೀತಿಡ್ ನಿರ್ಮಾಣ ಮಲ್ತ್‌ದೆರ್. ಅಲ್ಪ ಆಳೆನ ಮಗೆ ವೆಂಕಟೇಶ್ವ ದೇವೆರ್ ಉಲ್ಲೆರ್ ಪನ್ಪಿನ ನಂಬೊಳಿಗೆ .

ತಿರುಮಲ ದೇವಲ್ಯೊಡು ವೆಂಕಟೇಶ್ವರಡ್ದ್ ದುಂಬು ವಕುಲಾ ದೇವಿಗ್ ನೈವೇದ್ಯೊನು (ದೇ್ವೆರೆಗ್ ಅರ್ಪಣೆ ಮಲ್ಪುನ ತೆನಸ್ಸ್ ) ಅರ್ಪಣೆ ಮಲ್ಪುವೆರ್

ವಿನಾಶ ಬೊಕ್ಕ ನಿರ್ಲಕ್ಷ್ಯ

ಸ್ವಾತಂತ್ರ್ಯದ ಬೊಕ್ಕ ದೇವಲ್ಯೊ ತಿರುಮಲ ತಿರುಪತಿ ದೇವಸ್ಥಾನದ (ಟಿಟಿಡಿ) ವ್ಯಾಪ್ತಿಡ್ ಸೇರ್ದಿತ್ತ್ಂಡಲ ಆ ಟ್ರಸ್ಟದ ನಿರ್ಲಕ್ಷ್ಯದಾತ್ರ ವಕುಲಾ ದೇವಿ ದೇವಸ್ಥಾನ ಶಿಥಿಲಾವಸ್ಥೆಡ್ ಉಂಡು "ಟಿಟಿಡಿಡ್ದ್ ದೇವಾಲಯ ಪಿದಯಿ ಒರಿಯೆರೆಗ್ ಮೂಲ ಕಾರಣ ೧೯೮೭ತ ಸರಕಾರದ ಆದೇಶದ ಪ್ರಕಾರ "ಟಿಟಿಡಿ ತೂವೊನೊಡಾಯಿನ ದೇವಾಲಯದ ಪಟ್ಟಿಡ್ ವಕುಲಾ ದೇವಿ ದೇವಸ್ಥಾನದ ಪುದರ್ ಪಟ್ಟಿ ಮಲ್ಪೆರೆ ಬುಡ್ದ್ ಪೋತ್ಂಡ್". ಬೇತೆ ಕಡೆಟ್ ಉಪ್ಪುನ ದೇವಸ್ಥಾನೊಲೆನ ಜೀರ್ಣೋದ್ಧಾರೊಗು ಲಕ್ಷಾಂತರ ರೂ ಖರ್ಚು ಮಲ್ಪುನ ಟಿಟಿಡಿ ವೆಂಕಟೇಶ್ವರನ ಅಪ್ಪೆನ್ ದೇವಲ್ಯೊದ ಬಗ್ಗೆ ಗಮನ ಕೊರ್ತಿಜೆರ್.

ಗಣಿಗಾರಿಕೆಡ್ದ್ ತೊಂದರೆ

ರಾಜಕೀಯ, ಭ್ರಷ್ಟಾಚಾರ ಬೊಕ್ಕ ಅಧಿಕಾರೊಡುಪ್ಪುನಕುಲೆನ ಅಸಡ್ಡೆಡ್ದಾತ್ರ ದೇವಾಲಯದ ನಿರ್ವಹಣೆ ಈತ್ ಹಾಳಾಯೆರೆ ಕಾರಣ ಪಂದ್ ತಿರುಪತಿದ ಕಾರ್ಯಕರ್ತೆರ್ ಬೊಕ್ಕ ಊರುದಕುಲೆನ ಅಭಿಪ್ರಾಯ. ದೇವಾಲಯ ಉಪ್ಪುನ ಬೆಟ್ಟಡ್ ಭಾರಿ ಬೆಲೆ ಬಾಳುನ ಕಲ್ಲ್ ಉಪ್ಪುನೆಡ್ದಾತ್ರ ಮುಲ್ಪ ಅಕ್ರಮ ಗಣಿಗಾರಿಕೆ ನಡಪುಂಡು. ಅಕ್ರಮ ಕಲ್ಲುಗಣಿಗಾರಿಕೆ ನಿಧಾನವಾದ್ ಮಾತ ಕಡೆಡ್ದ್‌ಲ ಬೆಟ್ಟೊನು ಒಕ್ಕೆರೆ ಸುರು ಮಲ್ತ್‌ದ್ಂಡ್ . 80 ಭಾಗೊದಾತ್ ಬೆಟ್ಟ ಮೂಲ ಸ್ವರೂಪ ಕಳೆವೊಂದು ಅಡಿಪಾಯ ಸರಿ ಇಜ್ಜಾಂದೆ ದೇವಲ್ಯೊ ಜರಿಪ್ಪುನ ಸಾಧ್ಯತೆ ಉಂಡುಗೆ. ಶತಮಾನದಾತ್ ಪಿರಾಕ್‌ದ ದೇವಲ್ಯೊದ ರಕ್ಷಣೆದ ಬಗ್ಗೆ ಪುರಾತತ್ವ ಶಾಸ್ತ್ರಜ್ಞೆರೆ ಕೋಪೆದ ಸದಸ್ಯೆರ್ ಆತಂಕ ವ್ಯಕ್ತಪಡಿಸದೆರ್. "ಈ ಪುರಾತನ ಪರಂಪರೆದ ರಚನೆನ್ ಸಂರಕ್ಷಣೆ ಮಲ್ಪೆರೆ ಅಧಿಕಾರಿಲು ಮನಸ್ಸ್ ಮಲ್ಪೊಡು ಪಂದ್ ಪುರಾತತ್ವ ಶಾಸ್ತ್ರಜ್ಞೆರೆ ಅಭಿಪ್ರಾಯ.

ಜನೊಕುಲೆನ ಆಕ್ರೋಶ ಬೊಕ್ಕ ಪ್ರತಿಭಟನೆ

ಮಸ್ತ್ ಹಿಂದೂ ಸ್ವಾಮಿಲು ಬೊಕ್ಕ ಸಾಧುಲು ದೇವಲ್ಯೊದ ನವೀಕರಣ ಬೊಕ್ಕ ಈ ಪ್ರದೇಶದ ಅಕ್ರಮ ಗಣಿಗಾರಿಕೆನ್ ನಿಷೇಧಿಸಪಿನ ಅಗತ್ಯತೆದ ಬಗ್ಗೆ ಸರ್ಕಾರೊಗು ಮನವಿ ಕೊರಿಯೆರ್. ಶ್ರೀಪೀಠದ ಸ್ವಾಮಿ ಪರಿಪೂರ್ಣಾನಂದ ಸರಸ್ವತಿ ಬೊಕ್ಕ ಗ್ಲೋಬಲ್ ಹಿಂದೂ ಹೆರಿಟೇಜ್ ಪ್ರತಿಷ್ಠಾನದ ಕಾರ್ಯಕರ್ತೆರ್ ಪೇರೂರು ಬಂಡೆ ಗುಡ್ಡೆಗ್ ಪಾದಯಾತ್ರೆ ಮಲ್ತ್‌ದ್ ಟಿಟಿಡಿ ಬೊಕ್ಕ ಅಪಗದ ಸರ್ಕಾರದ ನಿಷ್ಕ್ರಿಯತೆಗ್ ಪ್ರತಿಭಟನೆ ಮಲ್ತೆರ್. ಸ್ವಾಮಿ ಪರಿಪೂರ್ಣಾನಂದ ಸರಸ್ವತಿಲು ಟಿಟಿಡಿ ಸಮಯೊಗು ಸರಿಯಾದ್ ಸ್ಪಂದನೆ ಕೊರ್ಜಿಂಡ ಅಲ್ಪನೆ ಉಪವಾಸ ಮಲ್ಪುವಂದ್ ಪಂಡೆರ್ . ಬೇತೆ ಬೇತೆ ಸಂಘಟನೆಲು, ಹಿಂದೂ ಧಾರ್ಮಿಕ ಮುಖಂಡೆರ್ ಬೊಕ್ಕ ಬೇತೆ ಬೇತೆ ರಾಜಕೀಯ ಪಕ್ಷೊಲೆನ ಮುಖಂಡೆರ್ ದೇವಲ್ಯೊದ ಸ್ಥಿತಿದ ಬಗ್ಗೆ ಬೇಜಾರ್ ವ್ಯಕ್ತಪಡಿಸದೆರ್ ಬೊಕ್ಕ ವಕುಲಾ ದೇವಿ ದೇವಲ್ಯೊನು ನವೀಕರಣ ಪುನಃಸ್ಥಾಪನೆಗ್ ಟಿಟಿಡಿಗ್ ಬೇಡಿಕೆ ದೀತೆರ್ .

ದೇವಲ್ಯೊದ ಜೀರ್ಣೋದ್ಧಾರಕ್ಕಾದ್ ಭಾರತೀಯ ಜನತಾ ಪಕ್ಷ ಮಸ್ತ್ ಸರ್ತಿ ಪ್ರತಿಭಟನೆ ಮಲ್ತ್‌ದ್ಂಡ್ ಬೊಕ್ಕ ಟಿಟಿಡಿ ಅಧ್ಯಕ್ಷೆರೆಗ್ ಬೊಕ್ಕ ಸಂಸ್ಥೆಗ್ ಮನವಿ ಕೊರ್ತ್ಂಡ್. ಪಕ್ಷ ನ್ಯಾಯಾಲಯ ಮಧ್ಯಪ್ರವೇಶ ಮಲ್ತ್‌ದ್ ದೇವಲ್ಯೊದ ಜೀರ್ಣೋದ್ಧಾರೊಗು ಟಿಟಿಡಿಗೆ ನಿರ್ದೇಶನ ಕೊರ್ಪಿನಂಚ ಬೇಡಿಕೆನ್ ಕೋರ್ಟುಗು ಮನವಿ ಮಲ್ತ್ಂಡ್.

ಬೇತೆ ಬೇತೆ ಸಂಘಟನೆಲೆನ ಬೇಡಿಕೆಗ್ ಸ್ಪಂದಿಸದ್ ಟಿಟಿಡಿ ವಕುಳ ಮಾತಾ ದೇವಲ್ಯೊದ ಜೀರ್ಣೋದ್ಧಾರ ಮಲ್ಪುನ ಯೋಜನೆಗ್ 2 ಕೋಟಿ ರೂ ಬೊಕ್ಕ ಗುಡ್ಡದ ಆವರಣ ಗೋಡೆಗ್ ಬೇಲಿ ಪಾಡೆರೆ 15 ಲಕ್ಷ ರೂ ಬುಡುಗಡೆ ಮಲ್ತ್ಂಡ್. ಉಂದೆತ ನಡುಟು ಸ್ಥಳೀಯ ಗಣಿ ಕಂಪನಿಲು 2010 ಡ್ ನ್ಯಾಯಾಲಯೊಗು ಪೋದು ದೇವಲ್ಯೊದ ನವೀಕರಣನೊನು ಟಿಟಿಡಿ ದೆತೊನಂದಿಲೆಕ್ಕ ತಡೆಪುನ ಆದೇಶೊನು ಪಡೆಯೆರ್.

ಆಂಡ, 2012ಟ್ ತೆಲಂಗಾಣ ಹೈಕೋರ್ಟ್ ತಡೆಯಾಜ್ಞೆ ಸಡಿಲ ಮಲ್ತ್‌ದ್ ದೇವಲ್ಯೊದ ಜೀರ್ಣೋದ್ಧಾರ ಮಲ್ಪುಲೆಕ್ಕ ಟಿಟಿಡಿಗೆ ಆದೇಶ ಕೊರ್ಂಡ್. ಟಿಟಿಡಿ ಆದೇಶೊನು ಪಾಲನೆ ಮಲ್ಪುವ ಪಂದ್ ನ್ಯಾಯಾಲಯೊಗು ಭರವಸೆ ಕೊರ್ತ್ಂಡ್ ಆಂಡ ದೇವಲ್ಯೊದ ಬೇಲೆ ಆವಂದೆ ಅಕ್ರಮ ಗಣಿಗಾರಿಕೆ ಅಭಿವೃದ್ಧಿಗ್ ಅವಕಾಶ ಆತ್ಂಡ್ .

ಉಲ್ಲೇಕೊ