ಮಿಝೋರಂ

	ಉಂದೊಂಜಿ ಎಲ್ಯ ಲೇಕನೊ. ಈ ಲೇಕನೊನು ದುಂಬರಿಪೆರೆ ಸಹಾಯೊ ಮಲ್ಪುಲೆ.

ಮಿಝೋರಂ (ಮಿಜೋರಂ, ಮಿಝೋರಮ್ ಪಂದ್‌ಲಾ ಲೆಪ್ಪುವೆರ್) ಈಶಾನ್ಯ ಭಾರತಡ್ ಇಪ್ಪುನ ಒಂಜಿ ರಾಜ್ಯ. ಉಂದೆತ ರಾಜಧಾನಿ ಐಝ್ವಾಲ್. ಈ ರಾಜ್ಯೊದ ಸುತ್ತ ತ್ರಿಪುರ, ಅಸ್ಸಾಂ ಬುಕ್ಕ ಮಣಿಪುರ ರಾಜ್ಯೊಲು ಉಲ್ಲ. ಅತ್ತಂದೆ ಸುಮಾರ್ ೭೨೨ ಕಿಲೋಮೀಟರ್ ಗಡಿನ್ ಬಾಂಗ್ಲಾದೇಶ ಬುಕ್ಕ ಮ್ಯಾನ್ಮಾರ್ ದೇಸೊದೊಟುಗು ಪಟ್ಟೊಂದುಂಡು. ಮಿಝೋರಂ ರಾಜ್ಯವಾದ್ ಉದಿಪರ ದುಂಬು ೧೯೭೨ನೇ ಇಸವಿ ಮುಟ್ಟ ಅಸ್ಸಾಂ ರಾಜ್ಯೊದ ಒಂಜಿ ಬಾಗವಾದಿತ್ತ್ಂಡ್. ೧೯೮೬ನೇ ಇಸವಿಡ್ ನಮ ದೇಸೊದ ಸಂಸತ್ತ್ ಭಾರತೀಯ ಸಂವಿಧಾನೊಡು ೫೩ನೇ ತಿದ್ದಿಪಾಟ ಮಲ್ತ್‌ದ್, ಐತ ಮೂಲಕ ಮಿಝೊರಂ ರಾಜ್ಯೊನು ಉಂಡು ಮಲ್ತೆರ್. ಅಂಚ ಫೆಬ್ರುವರಿ ೨೦ನೇ ತಾರೀಕ್ ೧೯೮೭ನೇ ಇಸವಿಡ್ ಮಿಝೋರಂ ರಾಜ್ಯೊ ಉದಿತ್ ಬತ್ಂಡ್. ಮಿಝೋರಂ ರಾಜ್ಯೊದ ಒಟ್ಟು ಇಸ್ತೀರ್ನೊ ೨೧,೦೮೧^೨, ಇಸ್ತೀರ್ನೊನು ಲೆಕ್ಕ ಪತ್ತಿಂಡ, ಈ ರಾಜ್ಯೊ ೨೬ನೇ ಸ್ತಾನೊಡು ಉಂಡು. ಮಿಝೋರಂ ರಾಜ್ಯೊಡು ಒಟ್ಟು ೧೧ ಜಿಲ್ಲೆಲು ಉಲ್ಲ. ೨೦೧೧ನೇ ಕಾನೇಸ್ಮಾರಿಡ್ ತೆರಿಲೆಕ್ಕ ಈ ರಾಜ್ಯೊದ ಒಟ್ಟು ಜನಸಂಖ್ಯೆ ೧೦,೯೧,೦೧೪ ಉಂಡು.

ಮಿಝೋರಂ ರಾಜ್ಯೊಡು ಇಪ್ಪುನ ಒಟ್ಟು ಜನೊಕುಲೆಡ್ ಎಚ್ಚ ಜನಕುಲು ಬುಡಕಟ್ಟ್ ಪಂಗಡೊಗು ಸೇರ್ದಿನಕುಲು. ಮುಲ್ಪ ಇಪ್ಪುನ ಬುಡಕಟ್ಟುಲು ಬೇತೆ ಬೇತೆ ಆಂಡಲ, ಸಾಂಸ್ಕೃತಿಕವಾದ್, ಇಜ್ಜಿಂಡ ಒಂಜೇ ಬಾಸೆನ್ ಪಾತೆರುನೆಡ್ದಾವರ ಈ ಬುಡಕಟ್ಟ್‌ಲೆಗ್ ಪರಸ್ಪರ ಅಂತರ ಸಂಬಂದೊ ಉಂಡು. ಮೊಕ್ಲೆನ್ ಮಾತ ಒಟ್ಟಾದ್ ಮಿಝೋ ಜನಕುಲು ಪನ್ಪೆರ್. ಈ ರಾಜ್ಯೊದ ಪುದರ್‌ಡ್ ರಡ್ಡ್ ಸಬ್ದೊ ಉಂಡು. ಮಿಝೋ ಬುಕ್ಕ ರಮ್. ಮಿಝೋ ಬಾಸೆಡ್ ರಮ್ ಪನ್ನಗ ನಿಲ, ಬೂಮಿ ಪನ್ಪಿನ ಅರ್ತೊ ಉಂಡು. ಅಂಚಾದ್ ಮಿಝೋ ಜನಕುಲು ಇಪ್ಪುನ ನಿಲಕ್ಕ್ ಮಿಝೋರಂ ಪನ್ಪಿನ ಪುದರ್ ಬತ್ಂಡ್ ಪನ್ಪೆರ್.

ನನೊಂಜಿ ಮೂಲದ ಪ್ರಕಾರ, ಮಿ ಪಂಡ ಜನ, ಝೋ ಪಂಡ ಲುಶಾಯ್ ಬೊಟ್ಟ ಪ್ರದೇಸೊಡು ಇಪ್ಪುನ ಜನ, ಬುಕ್ಕ ರಮ್ ಪಂಡ ನೆಲ, ಭೂಮಿ. ಪನ್ನಗ- ಲುಶಾಯ್ ಬೊಟ್ಟಪ್ರದೇಸೋಡು ಇಪ್ಪುನ ಜನೊಕುಲು ವಾಸ ಮಲ್ಪುನ ಭೂಮಿ ಪಂದ್ ಅರ್ಥ.