ಭೂತಾರಾಧನೆ ತುಳುನಾಡ್ದ ಆರಾಧನೆ ಪ್ರಕಾರೊಡು ಮುಖ್ಯವಾಯಿನವು.
ಈ ಪ್ರಕಾರೊಡು ಅಗೆಲ್, ತಂಬಿಲೊ, ಕೋಲೊ, ನೇಮೊ, ಬಂಡಿ/ಜಾತ್ರೆ, ಮೆಚ್ಚಿ, ಆಯನೊ, ಮೈಮೆ, ಕೆಂಡಸೇವೆ, ದೊಂಪೊದ ಬಲಿ, ಜಾಲಾಟೊ ಇಂಚ ಬೇತೆ ಬೇತೆ ನಡಕೆಲುಂಡು. ದೇವೆರೆನ ಆರಾಧನೆದ ನಂಬಿಕೆದಂಚನೆ ಭೂತಾರಾಧನೆಲಾ ಬಲವಾಯಿನ ನಂಬಿಕೆಡ್ ಉಂತ್ದುಂಡು.
ತುಳುನಾಡ್ಡ್ ದೇವೆರೆನ ಆರಾದನೆ ಸುರು ಆಪಿನೆಕ್ ದುಂಬೇ ಮುಲ್ಪ ದೈವೊಲೆನ ಆರಾದನೆ ಇತ್ತ್ಂಡ್ ಪನ್ಪಿನವು ಮುಲ್ಪದ ಪರತಿರಿ ತೂಂಡ ತೆರಿಯುಂಡು. ಅಪ್ಪಟ ದ್ರಾವಿಡ ಸಂಸ್ಕೃತಿದ ಮರ್ಗಿಲ್ಡ್ ಈ ಮಣ್ಣ್ಡ್ ಆರಾದನೆ ಪದ್ದತಿ ಸುರುವಾಂಡ್. ನಾಗಾರಾದನೆ ಈ ನೆಲಟ್ ಸುರುಕು ಉಂಡಾಯಿನ ಆರಾದನಾ ಕ್ರಮೊ. ದಾಯೆ ಪಂಡ ನರಮಾನಿ ಕಾಡ್ ಕಡ್ತ್ದ್ ನಾಡ್ ಕಟ್ಟುನ ಪೊರ್ತುಡು ಸುರುಕು ಈ ಮಣ್ಣ್ಡ್ ಉಚ್ಚುಲೆನ ಮಿತ್ತ್ ಪೋಡಿದ್ ನಂಬೆರೆ ಸುರು ಮಲ್ತೆ. ಉಂದು ಬಜೀ ತುಳುನಾಡ್ದ ಕತೆ ಮಾತ್ರ ಅತ್ತ್, ಇಡೀ ಲೋಕೊದ ನಂಬೊಲಿಗೆ ಪ್ರಪಂಚದ ಕತೆ. ಅಂಚನೇ ತುಳುನಾಡ್ಡ್ಲಾ ನಾಗಾರಾದನೆ ಸುರುವಾಂಡ್. ಆ ಕಾಲೊಡು ದೈವೊಲೆನ ಪ್ರತಿಷ್ಠಾಪನೆ, ಬ್ರಹ್ಮಕಲಶ ಪೂರಾ ಇತ್ತಿಜಂಡ್. ಈ ಕ್ರಮೊ ತುಳುವೆರೆನವತ್ತ್. ಬಕ್ತಿಡ್ ನಂಬುದು ಕೈಮುಗಿದ್ ಒಂಜಿ ಕೋಲ್ತಿರಿ ಕುತ್ತುದು, ದೂಪ ಪತ್ತ್ದ್, ಕೂಚಿ ನೀರ್ ದೀದ್, ಪರ್ವ ಬಲಸಿನಾಡೆಗ್ ದೈವೊಲು ಒಲಿದ್ ಬತ್ತ್ದ್ ನಿಲೆಯಾಪೆದೊ. ಕೊಡಿ ಇರೆಟ್ ಬಲಸಿನ ಅಗೆಲ್, ತಂಬಿಲ, ಬಾರನೆಗ್ ಕೋರಿ, ಅಸರ್ಗ್ ಕಲಿ ಉಂದು ದೈವೊಲೆನ ಬಯಕೆ. ಬಕ್ತಿಡ್ ನಂಬಿನಾಡೆಗ್ ಇಷ್ಟಾರ್ತೊಲೆನ್ ನಡಪಾದ್ ಕೊರೊಂದಿತ್ತ ದೈವೊಲು. ನಂಬಿನಾಯನ ಬುಲೆ ಬಾಗ್ಯೊ, ಇಲ್ಲ್ ಬದ್ಕ್ನ್ ಕಾತೊಂದಿತ್ತ.
ನರಮಾನಿ ಒಂಜಿ ಊರುಡ್ದು ಒಂಜಿ ಊರುಗು ವಲಸೆ ಪೋಪಿನವು ಆ ಕಾಲೊಡು ಸಾಮಾನ್ಯ. ಅಂಚ ಪೋನಗ ತಾನ್ ನಂಬಿನ ದೈವೊಲೆನ್ಲಾ ಲೆತೊಂದು ಪೋವೊಂದಿತ್ತೆರ್. ದೈವೊಲೆನ್ ಕೊನೊಯೆರೆಗ್ಲಾ ಬಾರೀ ಸುಲಬೊದ ಸಾದಿ ಇತ್ತ್ಂಡ್. ಒಂಜಿ ಅಗೆಲ್ ಬಲಸ್ದ್ ಕೈಮುಗಿದ್ ಅರಿಕೆ ಮಲ್ತೊನುವೆರ್. ಅಯಿಡ್ದ್ ಬೊಕ್ಕ ಒಂಜಿ ಪೊಸ ಸಾನಾದಿಗೆನ್ ದೀದ್ ಆ ದೈವೊಲೆನ ಪುದರ್ ಪಂಡ್ದ್ ಪೊಸ ನಿನೆ ಪೊತ್ತಾದ್ ಆ ಸಾನಾದಿಗೆಡ್ ದೀಪೆರ್. ಬೊಕ್ಕ ಪೊಸ ಸಾನಾದಿಗೆನ್ ಪತೊಂದು ಪೊಸ ಊರುಗು ಪೋಪೆರ್. ಅಂಚ ಪೋನಗ ದೈವೊಲೆನ ಬಾಲ್ ಬಂಡಾರೊನುಲಾ ಪತೊಂದು ಪೋಪೆರ್. ದೈವೊಲು ಮಾಯ ರೂಪೊಡು ಪೋವೊಂದಿತ್ತ. ಇಂಚ ನಂಬಿನ ಕುಟುಮೊದೊಟ್ಟಿಗೆ ದೈವೊಲು ಏಪಲಾ ಬೆರಿಸಾಯ ಆದ್ ಬರೊಂದಿತ್ತ. ಅಯಿಕೇ ದೈವೊದ ನುಡಿಕಟ್ಟ್ಡ್ ಒಂಜಿ ಪಾತೆರ ಉಂಡು- ‘ಆನ ತರೆ, ಪೊಣ್ಣ ನೆರಿ ಪತೊಂದು ಏನಿ ಕಾಲೊಡು ಈ ಬೈದನಾ ಎಂಕ್ಲೆಗ್ ತೆರಿಯಂದ್. ಒಂಜಿ ತೆರಿಂಡ ಒಂರ್ಬ ತೆರಿಯಂದ್. ಎಂಕ್ಲೆನ ಚರ್ಮ ದೃಷ್ಟಿ. ನಿನ್ನ ಮಾಯ ದೃಷ್ಟಿ ’.
ತುಲುನಾಡ್ಡ್ ಬೊಕ್ಕ ಉಂಡಾಯಿನ ಆರಾದನೆ ಪಂಡ ಬೆರ್ಮೆರೆನ ಪೂಜೆ. ಬೆರ್ಮೆರ್ ಪಂಡ ವೈದಿಕ ಸಂಸ್ಕೃತಿದ ಚತುರ್ಮುಖ ಬ್ರಹ್ಮೆ ಅತ್ತ್. ಬೆರ್ಮೆರ್ ಉಂಡಾಯಿನ ಬಗ್ಗೆ ತುಲು ಪಾಡ್ದನೊಡು ವಿವರವಾಯಿನ ಕತೆನೇ ಉಂಡು. ಬೆರ್ಮೆರೆನ್ ತುಲುನಾಡ್ದ ಆದಿ ದೇವೆರ್ ಪಂಡ್ದ್ಲಾ ಲೆಪ್ಪುವೆರ್. ಬೆರ್ಮೆರೆನ ಆರಾದನೆಲಾ ಅಪ್ಪಟ ತುಲು ಸಂಸ್ಕೃತಿದ ರೂಪೊಡೇ ಮುಲ್ಪ ಸುರುವಾಂಡ್. ಈ ಪೂಜೆ ಮಲ್ತೊಂದಿನಕುಲ್ಲಾ ತುಲುವೆರೇ. ಕ್ರಮೇಣ ನಾಗ ಬೊಕ್ಕ ಬೆರ್ಮೆರೆನ ಆರಾಧನೆ ಒಂಜಾದ್ ನಾಗಬೆರ್ಮೆರ್ ಪನ್ಪಿನ ಶಕ್ತಿದ ಉಪಾಸನೆಲಾ ಸುರುವಾಂಡ್. ಈ ಹಂತೊಡು ನಮ್ಮ ನೆಲಟ್ ಸುರುವಾಯಿನ ನನೊಂಜಿ ಆರಾಧನಾ ಕ್ರಮೊನೇ ಭೂತಾರಾಧನೆ. ಕನ್ನಡೊಡು ಭೂತರಾಧನೆ ಪಂಡ್ದ್ ಲೆಪ್ಪುವೆರ್. ಆಂಡ ತುಲುವೆರೆನ ಪಾಲ್ಗ್ ಬೂತೊ ಪಂಡ ದೈವೊ. ಅಂಚನೇ ದೈವೊ ಪಂಡ ಸತ್ಯೊ. ಈ ಸತ್ಯೊನೇ ದೈವೊ- ದೈವೊನೇ ಸತ್ಯೊ ಪಂಡ್ದ್ ನಂಬಿಯೆರ್. ಸಾರತ್ತೊಂಜಿ ದೈವೊಲು ಪನ್ಪಿನ ಪಾತೆರ ಮುಲ್ಪ ಉಂಡು. ಮುಲ್ಪದ ಪ್ರತೀ ಕುಟುಮೊಲಾ ದೈವೊಲೆನ್ ನಂಬುವೆರ್. ದೇವೆರೆಡ್ದ್ಲಾ ಒಂಜಿ ತೂಕ ಎಚ್ಚನೇ ದೈವೊಲೆಗ್ ಕೊರ್ತೆರ್ ತುಲುವೆರ್. ದಾಯೆ ಪಂಡ ದೇವೆರೆನ ಆರಾಧನೆ ಮುಲ್ಪ ಸುರುವಾಯಿನಿ ಬೊಕ್ಕ, ಗಟ್ಟ ಜತ್ತ್ದ್ ದೈವೊಲು ಬತ್ತ ಪನ್ಪಿನವು ಮುಲ್ಪದ ಜನಜನಿತ ಪಾತೆರ. ಅಂಚ ಬತ್ತಿನ ದೈವೊಲೆನ್ ಇಲ್ಲ್ ದೈವೊ, ಕುಟುಮೊ ದೈವೊ, ಗ್ರಾಮ ದೈವೊ, ರಾಜನ್ ದೈವೊ ಇಂಚಿತ್ತಿನ ಬೇತೆ ಬೇತೆ ಪುದರ್ ಬೊಕ್ಕ ಬೇತೆ ಬೇತೆ ಸ್ತಾನಮಾನೊಡು ಆರಾದನೆ ಮಲ್ಪೆರೆ ಸುರು ಮಲ್ತೆರ್.
ತುಳುನಾಡ್ ಭೂತೊಲೆನು ಸತ್ಯೊಲುಂದೆ ನಂಬುವೆರ್.
ಪಾರ್ತನೊಲು ಭೂತೊಕ್ಲೆನ ಪುಟ್ಟು, ಪ್ರಸರಣೊ, ಕಾರಣಿಕೊನು ನಿರೂಪಣೆ ಮಲ್ಪುನ ಪದ್ಯೊರೂಪೊದ ಕತೆಕುಲು. ಪಾಡ್ದನ, ಸಂದ್, ಸಂದಿ, ಇಂಚ ಬೇತೆಬೇತೆ ರೂಪೊಡು ಬಳಕೆಡ್ ಉಂಡು.
ದೈವದ ಪದಿನಾಜಿ ಕಟ್ಟ್ ಕಟ್ಲೆಲು ಪಂಡ ದೈವ ಲಕ್ಕ್ದ್ ಉಂತುನೆಕ್ ದುಂಬು ಬೊಕ್ಕ ಬಿರಿಪುನಡೆ ಮುಟ್ಟದ ಕ್ರಮೊಕುಲು.
ವಾದ್ಯೊಲೆನ ಬಗೆಕುಲು
This article uses material from the Wikipedia ತುಳು article ಬೂತಾರಾದನೆ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.