ಇಳಯರಾಜಾ (ತಮಿಳು: இளையராஜா) (ಪುಟ್ಟು ಜೂನ್ ೨, ೧೯೪೩) ಭಾರತೊದ ಸಿನೆಮಾ ಸಂಗೀತಲೋಕೊಡು ಒಂಜಿ ಮಲ್ಲ ಪುದರ್.
ಆರೆನ ಮೂಲ ಪುದರ್ ಜ್ಞಾನದೇಶಿಕನ್. ಸಿನೆಮೊ ಸಂಯೋಜಕೆ, ಗಾಯಕೆ, ಗೀತಸಾಹಿತಿಯಾದ್ ಆರ್ ಪುಗರ್ತೆಡುಲ್ಲೆರ್. ಇಂಬೆರ್ ರಾಯಲ್ ಫಿಲ್ಹಾರ್ಮಾನಿಕ್ ಆರ್ಕೆಸ್ಟ್ರಾಕ್ಕಾದ್ ಒಂಜಿ ಸ್ವರಮೇಳನ್ ಸಂಯೋಜಿಸಯಿನ ಭಾರತೊದ ಸರೂತ ಸಂಗೀತಗಾರೆರ್. ಆರ್ ಲಂಡನ್ನ ಟ್ರಿನಿಟಿ ಕಾಲೇಜ್ ಆಫ್ ಮ್ಯೂಸಿಕ್ದ ಸ್ವರ್ಣ ಪದಕ ವಿಜೇತೆರ್. ಶ್ರೀಯುತೆರ್ ತಮಿಳು, ಕನ್ನಡ, ಮಲಯಾಳಂ, ತೆಲುಗು, ಹಿಂದಿ ಬುಕ್ಕೊ ಮರಾಠಿ ಸಿನೆಮೊಲೆಡ್ ಸಂಗೀತ ಸಂಯೋಜನೆ, ಗಾಯನೊ ಬುಕ್ಕೊ ಗೀತರಚನೆ ಮಲ್ತೆರ್.
ಸಿನೆಮೊ ಸಂಗೀತ ಲೋಕೊದ ಮಹಾನ್ ಸಾಧಕೆರಾಯಿನ ಇಳಯರಾಜಾ ಇಂಬೆರ್ ಜೂನ್ ೨, ೧೯೪೩ನೆ ವರ್ಸೊಡು ಪುಟ್ಟಿಯೆರ್. ಸುರೂತ ದಿನೊಲೆಡ್ ಬಿ.ಕೆ ಸುಮಿತ್ರ ಇಂಬೆರೆನ ಗಾನಗೊಷ್ಟಿಲೆಡ್ ವಾದ್ಯಗಾರರಾದ್, ಕನ್ನಡ ಚಿತ್ರರಂಗೊದ ಸಂಗೀತ ನಿರ್ದೇಶಕರಾದ್ ಜಿ.ಕೆ. ವೆಂಕಟೇಶ್ ಮೇರೆನ ಶಿಷ್ಯರಾದ್ ಬುಲೆಯಿನ ಇಳಯರಾಜಾ, ಇನಿ ಸಿನಿಮಾ ರಂಗೊದ ಎತ್ತರೊದ ಪರ್ವತನೇ ಆತೆರ್.
ಇಳಯರಾಜಾ ಈ ಭೂಮಿದ ಸಂಗೀತ ಲೋಕೊದ ರಾಜಂದೇ ಪುದರ್ ಪಡೆವೊಂದೆರ್. ಆರೆನ ಪ್ರಸಿದ್ಧೊ ಸಿನೆಮೊಲೆನ್ ಪಂಡೊಂದು ಪೋಂಡಾಲಾ ದಿಂಜ ಪುಟೊಲು ಬೋಡಾವು. ಆರೆಗ್ ರಾಷ್ಟ್ರ ಪ್ರಶಸ್ತಿ ಕನತ್ತಿನ 'ಸಾಗರ ಸಂಗಮಂ' (ತೆಲುಗು), 'ಸಿಂಧು ಭೈರವಿ' (ತಮಿಳು), 'ರುದ್ರವೀಣ'(ತೆಲುಗು), 'ಪಜಾಸ್ಸಿ ರಾಜ'(ಮಲಯಾಳಂ) ಸಿನೆಮೊಲೆ ಅಂಚಿಡ್ಲಾ ಆರ್ ಸಂಗೀತ ಸಂಯೋಜಿಸಯಿನ ಸುಮಾರ್ ಸಾವಿರ ಚಿತ್ರೊಲು ಪತ್ತ್ ಸಾವಿರಡ್ದ್ ಎಚ್ಚ ಪದೊಕುಲೆಡ್ ಸಂಗೀತ ಲೋಕೊದ ಮುತ್ತುರತ್ನೊಲು ವಿಶಿಷ್ಟವಾದ್ ಅರಳ್ದ್ಂಡ್. ಗೀತ ರಚನೆಕಾರರಾದ್ ಬುಕ್ಕೊ ಗಾಯಕರಾದ್ ಕೂಡಾ ಆರ್ ಅಪ್ರತಿಮೆರ್.
ಕನ್ನಡೊಡು ಕೂಡಾ ಗೀತಾ, ಜನ್ಮಜನ್ಮೊದ ಅನುಬಂಧೊ, ನಮ್ಮೂರ ಮಂದಾರ ಹೂವೇ, ಪಲ್ಲವಿ ಅನುಪಲ್ಲವಿ ಸಿನೆಮೊಲೆಡ್ ಮೂಡ್ನ ಆರೆನ ಸಂಗೀತೊ ಶ್ರೇಷ್ಠಮಟ್ಟೊದವು.
ಹಿಂದಿಡ್ ಇಂಚಪದ ವರ್ಸೊಲೆಡ್ ಬತ್ತಿನ 'ಚೀನೀ ಕಂ', 'ಪಾ' ಮುಟ್ಟದ ಸಿನೆಮೊಲೆಡ್ ಕೂಡಾ ಆರೆನ ಗಾನೊ ಗಂಗೆ ಪರಿತ್ದ್ಂಡ್.
ಇಳಯರಾಜಾ ಆರೆಗ್ ರಾಷ್ಟ್ರೀಯ ಮಟ್ಟೊದ ಸಿನೆಮಾ ಪ್ರಶಸ್ತಿಲೇ ಅತ್ತಂದೆ, ಸಂಗೀತ ನಾಟಕ ಅಕಾಡೆಮಿದ ಪುರಸ್ಕಾರೊಲಾ ಸಂದ್ದ್ಂಡ್.
This article uses material from the Wikipedia ತುಳು article ಇಳೆಯರಾಜ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.