ಸತ್ಯಜಿತ್ ರೇ (ಮೇ ೨, ೧೯೨೧ - ಏಪ್ರಿಲ್ ೨೩, ೧೯೯೨) ಪ್ರಸಿದ್ದೊ ಬ೦ಗಾಳಿ ಚಿತ್ರೊ ನಿರ್ದೇಶಕೆರ್, ಬುಕ್ಕೊ ಭಾರತೊದ ಚಿತ್ರರ೦ಗೊದ ದಿಂಜ ಪುಗರ್ತೆದ ವ್ಯಕ್ತಿಲೆಡ್ ಒರಿ.
ಪಥೇರ್ ಪಾ೦ಚಾಲಿ, ಅಪರಾಜಿತೊ ಬುಕ್ಕೊ ಅಪ್ಪುವಿನ ಪ್ರಪ೦ಚ - ಈ ಮೂಜಿ ಚಿತ್ರೊಲೆನ ಸರಣಿ ಇಂಬೆರೆನ ಪುಗರ್ತೆದ ಸಿನೆಮೊಲು. ಅಕಿರಾ ಕುರೋಸಾವಾ, ಸ್ಟೀವನ್ ಸ್ಪೀಲ್ಬರ್ಗ್, ಮಾರ್ಟಿನ್ ಸೋರ್ಸೆಸಿ ಇಂಚಿತ್ತಿ ಮಸ್ತ್ ಪುದರ್ದ ನಿರ್ದೇಶಕೆರ್ ಸತ್ಯಜಿತ್ ರೇ ಆರೆನ ಸಿನೆಮೊಲೆನ್ ಮೆಚ್ಚೊಂದೆರ್.
ವಿಸ್ವೊ ಸಿನೆಮೊ ಲೋಕೊಡು ಮಹಾನ್ ದಿಗ್ದರ್ಶಕೆರೆಡ್ ಒರಿಯಾಯಿನ ಭಾರತರತ್ನ ಸತ್ಯಜಿತ್ ರೇ ಆರ್ ಕಲ್ಕತ್ತೆಡ್ ಮೇ ೨, ೧೯೨೧ನೆ ವರ್ಸೊಡು ಪುಟಿಯೆರ್. ಕಲ್ಕತ್ತೆದ ವಿಶ್ವವಿದ್ಯಾಲಯೊಡು ಓದಿನ ಬುಕ್ಕೊ ರವೀಂದ್ರನಾಥ ಠಾಕೂರೆರೆ ಶಾಂತಿನಿಕೇತನಡ್ ಕಲೆನ್ ಅಬ್ಯಾಸೊ ಮಲ್ತ್ದ್ ಸತ್ಯಜಿತ್ ರೇ ಆರೆಗ್ ಎಲ್ಯಡ್ದೇ ಸಿನೆಮೊದ ತಿರ್ಲ್ನ್ ತೆರಿವುನ ಬುಕ್ಕೊ ವಿಶ್ವೊ ಪ್ರಸಿದ್ದೊ ಸಂಗೀತೊನು ಕೇನುನ ಮಲ್ಲ ಆಸಕ್ತಿಯಾದಿತ್ತ್ಂಡ್.
ಸತ್ಯಜಿತ್ ರೇ ಆರ್ ನಿರ್ದೇಶಕೆ, ನಿರ್ಮಾಪಕೆ, ಚಿತ್ರಕಥೆಗಾರೆ, ಸಂಗೀತ ಸಂಯೋಜಕೆ, ಕಥೆಗಾರೆ, ಪಾತೆರೊದ ಕಲಾ ವಿನ್ಯಾಸಕೆ ಇಂಚಮಾಂತ ಒಂಜಾತ್ ಮಲ್ಲ, ಅದ್ಬುತೊ ಪ್ರತಿಬೆ. ಓಡೆಮುಟ್ಟ ಪಂಡ ಆರೆನ ಸಿನೆಮೊಲೆಗ್ ಆರೇ ಪೋಸ್ಟರ್ಲೆನ ತಯಾರ್ ಮಲ್ಪೆದೆರ್. ಅಕ್ಷರೊಲೆ ಅಚ್ಚಿವಿನ್ಯಾಸೊನು ಆರೇ ಮಲ್ಪೆದೆರ್. ಆರೆನೆ ಅಜ್ಜೆರ್ ಉಪೇಂದ್ರ ಕಿಶೋರ್ ರೇ ಬಂಗಾಳಿಡ್ ಜೋಕ್ಲೆಗಾತ್ ಆರೆನ ಕಾಲೊಡು ನಡಪಾವೊಂದಿಪ್ಪುನ ಸಂದೇಶ್ ಪನ್ಪಿ ಪತ್ರಿಕೆನ್ ೧೯೬೧ನೆ ವರ್ಸೊಡು ಪೆರ ಬೊಲ್ಪುಗು ಪಾಡಿಯೆರ್.
ಆಜಿ ಪೀಟ್ ನಾಲಂಗುಲೊ ಎತ್ತೊದ ಸತ್ಯಜಿತ್ ರೇ ಮಲ್ಲ ಜುವೊದಾರ್ ವಿಸ್ವೊ ಸಿನೆಮೊರಂಗೊಗು ಕೂಡ ಮಲ್ಲ ಗೋಪುರೊದಂಚಿತ್ತಿ ವ್ಯಕ್ತಿತ್ವೊನು ಪಡೆದಿತ್ತೆರ್. ೧೯೪೭ಡ್ ಕಲ್ಕತ್ತೆದ ಸುರುತ ಸಿನೆಮೊ ಸೊಸಾಯಿಟಿನ್ ಉಂಡು ಮಲ್ತಿನ ಕೀರ್ತಿ ಆರೆನವು. ರವೀಂದ್ರನಾಥೆರೆ ಸಾವುಡ್ದು ಬುಕ್ಕೊ ಶಾಂತಿನಿಕೇತನಡ್ದ್ ಪಿದಯಿ ಬತ್ತಿನ ಸತ್ಯಜಿತ್ ರೇ ೧೯೪೩ ಡ್ದ್ ೧೯೫೬ನೆ ಸಮಯೊಡು ವೃತ್ತಿಪರ ಕಲಾವಿದರಾದ್ ಕಾರ್ಯನಿರ್ವಹಿಸವೊಂದಿತ್ತೆರ್.
ಸೊಂತೊ ಜಾಹಿರಾತ್ ಸಂಸ್ಥೆ ಒಂಜೆನ ಉದ್ಯೋಗಿ ಆದಿತ್ತೊಂದೇ ೧೯೫೫ನೆ ವರ್ಸೊಡು ‘ಪಥೇರ್ ಪಂಚಾಲಿ’ ಚಿತ್ರೊನು ತಯಾರ್ ಮಲ್ತೆರ್. ಪೃಥೇರ್ ಪಾಂಚಾಲಿ ಪಂಡ 'ಕಿನ್ಯ ಸಾದಿತ ಪದೊ' ಪಂಡ್ದ್ ಅರ್ತೊ. ಈ ಸಿನೆಮೊಗ್ ಮಸ್ತ್ ಪುಗರ್ತೆದೊಟ್ಟುಗೆ ಕೇನ್ಸ್ ಅಂತರರಾಷ್ಟ್ರೀಯ ಉತ್ಸವೊಡು ಆ ಸಿನೆಮೊದ ಪ್ರತಿಸ್ಟಿತೊ ‘ಗ್ರಾಂಡ್ ಪ್ರಿಕ್ಸ್’ ಗೌರವೊ ತಿಕ್ಂಡ್. ಪಥೇರ್ ಪಂಚಾಲಿ ಸಿನೆಮೊದೊಟ್ಟುಗೆ ಅಪರಾಜಿತೋ (ಅಪರಾಜಿತ) ಬುಕ್ಕೊ ಅಪೂರ್ ಸಂಸಾರ್ (‘ಅಪು’ನ ಪರಿವಾರೊ) ಸಿನೆಮೊಲು ಸೇರ್ದ್ ‘ಅಪು ತ್ರಿವಳಿಲು’ ಪನ್ಪಿ ವಿಸ್ವೊ ಪ್ರಸಿದ್ದಿ ತಿಕ್ಂಡ್.
ಜಲ್ಸಾ ಘರ್( ಸಂಗೀತೊದ ಇಲ್ಲ್), ದೇವಿ, ತೀನ್ ಕನ್ಯಾ, ಚಾರುಲತ (ಒಂಟಿ ಬುಡೆದಿ), ನಾಯಕ್, ಅಸನಿ ಸಂಕೇತ್ (ದೂರೊದ ಬಿರುಗಾಳಿ), ಶತ್ರಂಜ್ ಖಿ ಖಿಲಾರಿ (ಚದುರಂಗದಾಟಗಾರೆರ್), ಘರೇ ಬಜ್ರೆ (ಇಲ್ಲ್ ಬುಕ್ಕೊ ಪರ್ಪಂಚೊ), ಗಣಶತ್ರು (ಜನೊಕ್ಲೆ ಸತ್ರು), ಶಾಖಾ ಪ್ರಶಾಖಾ (ಸಾಕೆ ಬುಕ್ಕೊ ಉಪಸಾಕೆಲು) ಬುಕ್ಕೊ ಆಗಂತುಕ್ ಇಂಚಿತ್ತಿನವು ದುಂಬರಿದ್ ಬತ್ತಿನ ಆರೆನ ಸಿನೆಮೊಲು.
ಇಂಚಿತ್ತಿ ಮಲ್ಲ ಪುಗರ್ತೆದ ಮಹಾನ್ ಸತ್ಯಜಿತ್ ರೇ ಆರ್ ಏಪ್ರಿಲ್ ೨೩, ೧೯೯೨ಡ್ ನಿದನೆರಾಯೆರ್. ಈ ಮಹಾನ್ ಮಾನವೀಯೊ ಸೂಕ್ಷ್ಮಮತೆಲೆ ತಿರ್ಲ್ ತೆರಿಪುದ ಪ್ರಾಜ್ಞೆ ಬುಕ್ಕೊ ಅಭಿವ್ಯಕ್ತಿದ ಪರಮೋಚ್ಚ ಪ್ರತಿಭಾವಂತೆರ್ ನಿತ್ಯೊ ಸ್ಮರಣೀಯರೆನಿಸದೆರ್.
This article uses material from the Wikipedia ತುಳು article ಸತ್ಯಜಿತ್ ರೇ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.