ಬೆನ್ನಿ ಪಂಡ ಕಂಡದ ಸಾಗೋಲಿದ ಬೇಲೆ, ಏನೆಲ್, ಸುಗ್ಗಿ ಸುಗ್ಗಿ, ಇಡೆಕೊಳಕೆ, ಕೊಳಕೆ, ಪಟ್ಲ, ಪಂಡ್ದ್ ಬೇತೆ ಬೇತೆ ಬೆನ್ನಿ (ಬೇಸಾಯ) ಮನ್ಪೆರ್.
ಕಂಡೊಡು ಏನೆಲ್ದ್ ನೇಜಿ ಪಡುನ. ನಂಬಿನ ದೈವ ದೇವೆರೆನ್ ನೆನೆತ್ತೊಂದು ಏನೆಲ್ದ ಬುಲೆ ಮಲ್ಪೆರೆ ಎರ್ಲೆಗ್ ನುಗಾ ನಾಯೆರ್ ಕಟ್ಟುದು ನೇಜಿ ಪಾಡ್ಯೆರೆ ದಪ್ಪೆರೆ ಸುರು ಮಲ್ಪುವೆರ್. ದತ್ತ್ ದಾದ್ ಪಲಯಿ ಮುಟ್ಟಾದು ಕಂಜಿ ಒಯಿಪುವೆರ್. ಅಟ್ಟೊಡು ದೀತಿನ ಬಿತ್ತ್ ನ್ ದೆತ್ತ್ ದು ಒಂಜಿ ದಿನ ನೀರ್ಡ್ ದೀದ್ ದೆತ್ತ್ ದ್ ಅಂಬಿಡ್ ಮೊರೆಂಕಾದ್ ಈಟ್ದ ತಪ್ಪು ಪಾಡ್ದ್ ಮುಂಗೆ ಬರ್ಯೆರೆ ದೀಪೆರ್. ಮುಂಗೆ ಬತ್ತಿನ ಬಿತ್ತ್ ನ್ ದಿನ ಕಂಡಡ್ ಬಿತ್ತುವೆರ್ ನೆಕ್ ನೇಜಿ ಪಾಡುನಿ ಪನ್ಪೆರ್. ಪಾಡಿನ ನೇಜಿಗ್ ಯೆರ್ನಲ ಕಣ್ಣ ದ್ರಸ್ಟಿ ಬೂರುನ ಬೊರ್ಚಿ ಪನ್ತ್ದ್ ಕಂಡದ ನಡುಕ್ ಕಾಯರ್ದ ತಪ್ಪು ಕುತ್ತುವೆರ್.
ನೇಜಿಗ್ ೨೦ ರ್ದ್ ೨೫ ದಿನ ಕಡಪುನಗ ನೇಜಿ ದೆತ್ತ್ ದು ನಡ್ಪುನ ಬೇಲೆ ಸುರುವಾಪುಂಡು ಮಾತಾ ಕಂಡಲೆನ್ ದತ್ತುದು ಅದ ಮಲ್ಪುವೆರ್ ನೇಜಿ ದೆತ್ತುದು ನಡ್ಪೆರ್. ನೇಜಿ ನಡ್ಪುನ ಅಕೇರಿದಾನಿ ಬೇತೆ ಬೇತೆ ಬಗೆತ ಕಜಿಪು ಮಲ್ತುದು ಗಮ್ಮತ್ತ್ ಮಲ್ಪುವೆರ್ ನೆಕ್ ಕಂಡದ ಕೋರಿ ಪನ್ಪೆರ್.
ನಿಚ್ತಿ ಅತುಂಡಾ ಮಾರ್ನೆಮಿದ ಪೊರ್ತುಗು ಕೈ ಬಲತ್ ಪಾಯಾದ್ ಬುಲೆವುಂಡು. ಕುರಲ್ ದ ರೂಪೂಡು ಧಾನ್ಯಲಕ್ಷ್ಮಿನ್ ನ್ ಇಲ್ಲದ ಉಲಯಿ ಕೊನೊಪುನ ಕ್ರಮಕ್ ಇಲ್ಲ್ ದಿಂಜಾವುನಿ ಪನ್ಪೆರ್. ಆನಿದ ದಿನ ಪುಲ್ಯ ಕಾಂಡೆ ಇಲ್ಲದ ಯಜಮಾನ್ಯೆ ತರೆಕ್ ಮೈಕ್ ಮೀದ್ ಕಂಡದಡೆ ಪೋದು ಮೂಡಾಯಿಗ್ ಮೋನೆ ಪಾಡುದು ನಂಬಿ ದೈವ ದೇವೆರೆನ್ ನೆನೆತೊನ್ದು ಒಂಜಿ ಪುಂಡಿ ಕುರಲ್ ಕೈಟ್ ಎಗ್-ತ್-ದ್ ಕನತ್. ತುಲಸಿ ಕಟ್ಟೆದ ಎದುರು ಅರೆತಿನ ಗಂಧಡ್ ಗೆರೆ ಪಾಡಿನ ಮನೆ ದೀದ್ ಐತ ಮಿತ್ ಕೊಡಿ ಇರೆ ಪಾಡುದು ಕುರಲ್ ನ್ ದೀಪೆರ್. ಐತ ಮಿತ್ ಕುಕ್ಕು ತಪ್ಪು, ಪೆಲತ ತಪ್ಪು, ಬೆದುರುದ ತಪ್ಪು, ಹಿಟ್ಟೆವುದ ತಪ್ಪು, ಪೊಲಿಬಲ್ಲುದ ತಪ್ಪು, ದಡ್ಡಲ್ ದ ನಾರ್, ತೆಕ್ಕರೆ, ಪದ್ಪೆ, ಪುದ್ದಾರ್ ತೇವು, ಅನ್ಚೆನೆ ಇಲ್ಲಡಾಪುನ ಕಾಯಿಕಜಿಪುಲೆನ್ ಕೋಡಿ ಎದುರಾದ್ ದೀದ್ ಒಂಜಿ ತಾರಾಯಿನ್ ಗಡಿ ಮಲ್ತುದು ಕುರಲ್ ದ ದತ್ತ್ ಬಲತ್ತ್ ಗ್ ದೀದ್ ಐಟ್ ನಿನೆ ದೀದ್ ಬೊಲ್ಪು ಪೊತ್ತಾವೆರ್.ಇಲ್ಲಡ್ ಉಪ್ಪುನ ಕಳಸೆ, ಸೇರ್, ಕೊದಂಟಿಲೆನ್ ಬರಿಟ್ ದೀಪೆರ್. ಈತಾಯಿನೆ ಇಲ್ಲದ ಯಜಮಾನ್ಯೆ ಮನೆ ಸಮೇತ ಕುರಲ್ನ್ ಪತೊಂದು ಇಲ್ಲ್ ಪೊಗ್ಗುವೆರ್. ಅಪಗಾ ಬಾಕಿಲ್ದಲ್ಪ ಉಂತಿನ ಯಜಮಾನ್ದಿ ಕುರಲ್ಗ್ ಪೇರ್, ಅರಿ ಪಾಡುದು ಎದುಕೊನುವಲ್. ದೇವೆರೆನ ಎದುರುಡು ದೀನ ಕುರಲ್ಗ್ ಮಾತೆರ್ಲಾ ಮೂಜಿ ಸಲ ಅರಿ ಪಾಡುದು ಕೈಮುಗಿವೆರ್. ಬೊಕ್ಕ ಕುರಲ್ ದೆತ್ತುದು ಕ್ರಮವಾದ್ ಹಿಟ್ಟೆವು, ಕುಕ್ಕು, ಪೆಲ, ಕುರಲ್, ಬೆದುರು, ಪೊಲಿಬಲ್ಲುದ ಇರೆ ದೀದ್ ದಡ್ಡಲ್ದ ನಾರ್ ಡ್ ಸುತ್ತುದು ದೈವ, ದೇವೆರ್, ಇಲ್ಲು, ಬೆನ್ನಿದ ಆಯುದೊಲು, ಕುಕ್ಕು ಪೆಲ ತಾರೆ ಕಂಗು ದ ಮರಕ್ ಕಟ್ಟುವೆರ್. ಇಲ್ಲ್ ಪೊಗ್ಗಿನ ಲಕ್ಷ್ಮಿ ಪಿದಾಯಿ ಪೊಪುನ ಬೊರ್ಚಿನ್ದ್ ಆನಿದ ದಿನ ಇಲ್ಲರ್ದ್ "ಧನ ದಾನ್ಯ" ಪಿದಾಯಿ ಕೊರ್ಪುಜೆರ್.
ಪೊಲಿ ಪಂಡಾ ಸಮ್ರದ್ದಿ. ಬುಲೆಯಿನ ಕೈನ್ ಕೋಯ್ದ್ ಜಾಲ್ಗ್ ಕನತ್ ನೋತುದು ಬಾರ್ ನ್ ರಾಸಿ ಮಲ್ಪುವೆರ್ ಒಂತೆ ಬೊನ್ಯ ಪತೂನ್ದು ಬಾರ್ ದ ರಾಸಿದ ಮಿತ್ತ್ ೩-೫ ನಾಮದಲೆಕ ಗೆರೆ ಪಾಡುವೆರ್ ನೆಕ್ ಪೊಲಿ ಪಾಡುನಿ ಪನ್ಪೆರ್. ಅನ್ಚೆನೆ ಬೈತ ಮುಟ್ಟೆ ಕಟ್ಟುನಗ ಮುಟ್ಟೆದ ಮಿತ್ತ್ ಉಂತುದು ಕದಿಕೆ ದಿಂಜಡುಂದು ಪೊಲಿ ಲೆಪ್ಪುವೆರ್. "ಪೊಲಿ ಪೊಲಿ ಆ ಜಾಲ ಪೊಲಿ ಈ ಜಾಲ ಪೊಲಿ ಎಲ್ಪತ್ತೇಳ್ ಜಾಲ ಪೊಲಿ, ಪಂಚ ಪಾಂಡೇರ್ಕೆಲೆ ಪೊಲಿ, ನಿತ್ಯ ದೇವೇರ್ಕೆಲೆ ಪೊಲಿ. ಅಪ್ಪೆ ಬೆರಿಯೆ ಬಾಲೆಲು ಬನ್ನೆಂಗೆ ಬರೊಡು ಪೆರಡೆದ ಬೆರಿಯೆ ಕಿನ್ನಿಲು ಬನ್ನೆಂಗೆ ಬರೊಡು ಪೇರ್ ಉರ್ಕರಿನೆಂಗೆ ಉರ್ಕರೊಡು ಕಡಲಸೆರೆ ಮಗುರುನೆಂಗೆ ಮಗುರೂಡು ಬಲಿಪ ಬೀಲೋಡು ಬರೋಡು ಕುದುಕ ಕೂಲಿಡ್ ಬರೊಡು ಮದ್ಮಲ್ ಪೊಣ್ಣಗ್ ತರೆ ಬನ್ನೆಂಗೆ ಬರ್ಒಡು ಕೆರ್ಮೆಲ್ ಪೊಣ್ಣಗ್ ಮಿರೆ ಬನ್ನೆಂಗೆ ಬರೊಡು ಎಂಕಲ್ನ ಜಾಲ್ಗೇ ಪೊಲಿ ಬರೊಡು ಪೊಲಿ ಪೊಲಿ ಪೊಲಿ"
ಕದಿಕೆ ಸೇರಿನ ಬಾರ್ ನ್ ಬೈಪಾದ್ ನುಂಗಾದ್ ಕುಟ್ಟುದು ಅರಿ ಮಲ್ಪುವೆರ್ ಪೊಸ ಅರಿ ಉನ್ಪುನೆಕ್ ಪುದ್ದಾರ್ ಪನ್ಪೆರ್. ಕರಕ್ ಗಂದ ಪೂಜಿದ್ ಪೊಲಿಬಲ್ಲ್ ಸುತ್ತುದು ನೀರ್ ಪಾಡುದು ದಿಕ್ಕೆಲ್ಗ್ ದೀಪೆರ್ ಐತ ಮಿತ್ತ್ ಅರು ಬುಡ್ಪಿಲೆಕ ಕುಡುಪು ಕೈಸಟ್ಟಿ ದೀಪೆರ್ ಮಾತೆರ್ಲಾ ೩ ಸಲ ಅರಿ ಪಾಡುದು ಕೈ ಮುಗಿದು ಬೈಯೆರೆ ದೀಪೆರ್, ನಾನಾ ಬಗೆತ ಕಾಯಿಕಜಿಪು ಅಡ್ದ್ ಮಾತೆರ್ಲಾ ಒಟ್ಟಿಗೆ ಒನಸ್ ಮಲ್ಪುವೆರ್
This article uses material from the Wikipedia ತುಳು article ತುಳುನಾಡುದ ಬೆನ್ನಿ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.