Psaniq Ru Mplaw

sraral hiya musa magal qulih ga, ini nha hmci maki qu pspung nya, ini ga cyux mbazing qulih lga ini nha ’say, baha mswa kyapun su kwara ungat qulih niqun ta babaw nya lru, baq mkayal muci qani ga nyux ta magu squ qulih. musa squ magal qulih qani ga siy ga qutux qutux niqan, hata muci lga musa kwara, ungat kya nanu qmhut qani hiya, ita ka Tayal raral hiya ga msblaq balay son nha.

ini ga musa ta ga nwahan squliq ga ini nha say uzi, ru ini ta hmci musa uzi, musa su spanga msqun lga ini nha qbaqi mnglung la, nanu yasa qutux gluw ki qutux gluw pgluw musa! baq mkayal kwara, me’a su na nwahan nha sm’bu lga kmal muci, nwahan maku lay muci lga ini nha ’say la, baha mswa nwahan squliq ga ingat iyan qu qulih nya lru, nanu yasa musa kangi squ lingay binah la. ru cyux ki’an sruyu squliq uzi ga ini ’say spanga smi uzi, musa hmkangi binah nanak ’say su!

raral uzi ga ita Tayal hiya ga maki balay inlungan nha ini ga nyux qu sruyu nha nyux ki’an qulih ga ini nha balay hmci magal, baha mswa ga psaniq na zywaw qani hiya! ana musa psabu ini ga musa tmuba tnaq lga yasa la, ini nha siy suqi magal kwara nanu yasa qu blaq balay qu gaga sraral hiya, baq balay inlungan.

bnkis sraral uzi ga qutux qalang qutux gluw qani ga qutux niqan son nha, magal ina yasa qu mkayal qu qutux niqan gluw qani lga musa ptnep qulih la. tnep ga siy tbuci tnep qulih, ga kinpsyaqan balay uzi ha mswa gi ima qu cingay nagal qulih ga blaq qu hbup son nha.

nanu yasa qu raral hiya ga musa squn tnep qulih sa llyung qani ga thkun nha kya, kmal qu bnkis nha, “ ay! tahuk cikay qulih wah! muci qu bnkis lga, yasa thkun nha, thkun nha qulih qasa lga ini ga qutux qutux kyawan mami ga thkun nha, hoqil qu mami ru qulih qasa lga syun nha babaw nqu btunux, galan nha stmwan nha ru qsugun la, isu qutux kun qutux son sqa qmasuw, ana mami uzi ga son sqa maniq ga kinblaq balay niqun baha mswa nyux ta maki squ llyung ru nyux ta ini kaki sa ska ngasal ga, ya qu kinblaq balay ru mluw squ bnkis sraral hiya ga kina pqasun balay uzi.