Piyaway 比亞外

puqing bnkis nha ga minkahul kgogan Botunokan.qalang qaniy ga nyux maki squ To’ing Piyasan kinhangan nqu Qwilan,te kraya nya ga qalang Qwilan te yahu nya ga qalang Raga Bnay,musa 600～1200 meta kinwagq na umi,nyux te ‘law kint’an llyung,qmuzi rgyax Tlaman mkura te htgan wagi.

lalu qalangqaniy ga sazing pintke’an nha;

1.rhiyal qaniy ga hbk’an balay na qutux qerang,Piyaway san ke tayal ru si nha lhengiy nha Piyaway smlalu la.

2.sraral mga maki qutux kneril tayal blaq balay lungan nya ma,nanu s’agal nha lalu nya smlalu la.

babaw nya m’Bokusi 宋正喜 yaqeh hazi pongan Piyaway

qaniy,trang 1976 kawas lga skayal nya Gokosyo yugun Ri’an qu lalu nya la.misuw qaniy 10 kawas mtnaq kwara inlungan qalang mha aki kbzihan loziy lalu raral,ru Piyaway loziy lalu qalang qaniy.

pinsalan raral ga,maki squ’law kraya 200 meta qutux rhiyal mzyunaw.pnongan ke bnkis ga:pira kbhul kawas sraral ga kbhul msyaw ngasal minnaki kya ma.

puqing imi ke pinsalan:“rhiyal ka pinsrngyan,te sazing ga rhiyal ka pinkyalan.” pinqzyu qu bnkis:“pinsalan qasa ga,wal htgal skbahing na zyuwaw mgaw.baha hmswa kahul pinsqehan wal hqelan squliq.” mkura rgyax Qesu,kmayal loziy bnkis mha:“raral ga sazing mrhuw bnkis maki kya(ini baqiy lalu na sazing bnkis qasa,nyux baqun ga bnkis na Cyuw ka Song sazing bwan ngasal tgluw.) sazing ngasal qaniy ga mqhyaw na kinlkahan. maki qutux ryax sazing ngasal qaniy ga, zyuwaw na tamun kblayun qwaw ru msazyu la.mqqun ima qu balay nya, ru htgal na zyuwaw mkkut la,maki mhuqil saxa nha lwah. mkayal qu bnkis,rhiyal qaniy lga wiwal nyux syusan la,aring sqaniy lga iyat ki’un.nanu gluw na Cyuw hiya ga mkura te ‘law kraya Qwayux qasa tngasal.gluw na Song hiya ga mkura te ‘zil kraya Boliq qasa. mkayal mha laxiy ta pklapa, qelis qaniy ga si aki sa qsahuy lungan nha kryax.”

  babaw nya wahan tuqiy turuy lga, tgyut aki mwah kbzeh Pinsalan loziy,ana ga snyusan qu rhiyal qaniy son nha,ini swaya maki kya qu tayal. ru mwah smhzi te kyahu nya cikay sobeh squ tuqiy turuy qaniy la.

  wayal qu ryax,kibahan nha sazing ngasal qaniy lga mbbiq squliq uziy la,ini psparis inlungan nha la.iyat balay kinqeri ga,1952 kawas lga mwah qu Kyokay,aring kya msblaq mssi’ inlungan ru ‘myuw inlungan magal pinshota utux,kwara qu pinsqehan raral ga wiwal nqu wal nha qlyu’un llyung gogan kwara la.

musa kbhul msyaw hi,mmrkyas ga wal maki te hogan lingay Cyama,msthay te qalang rgyax ga wiway bbnkis ka lelaqi, ana ga trang mhngaw ga mwah maki qalang,si ptxal mkilux loziy qu qalang.

qalang ga nyux qutux Cyoro Kyokay,misuw qaniy ga Hane Taya Bokusi nyux sqaniy,tayal sqaniy ga skrangi nha “qutux ngasal ” mlahang Kyokay qaniy. mpuw gaga pincbaqan Sesyo nyux nha glgan,kwara bbnkis ga skrangi nha yaba yaya kmita.mqyanux na snhyan ka sinnlwan.mkllahang,mqasuw na qnxan.qaniy qu nyux syan inlungan na qalang.

pinbahuw na qalang ga:qwirux lipi qapu kaway ruma. 3 byacing ga mamu bway witak.4 byacing ga klahan na lipi ka ali ruma,5 byacing tehuk 8 byacing lga qwirux kaway ru kaway sbing ka krariy,9 byacing lga mamu bway qapu la.

kahul Cyama mkura tuqiy osa Girang,kahul Girang ga mluw tuqiy mkura squ Cyama,tuqiy nqu Pehng(Tay 7 Seng) te 36 Kori bniru tuqiy lga tehuk la.

1.gong Boliq

kni’an qalang kahul gogan sraral,tngasal te llingay na gong,nanu tayal ga gong ka kni’an bniks sraral son nha,puqing kni’an qalang Piyaway sraral gaw,ktan uziy hnaga tunux qnryan kbhul kawas sraral.

2.tuqiy Qesuw 

rgyax Qesuw- qaniy ga tuqiy osa rgyax Qesuw,sintqyan na lelaqi ka bbnkis.hahul tuqiy turuy (7 Seng) mkura tuqiy Uraw qmazeh, cikuy turuy ga tehuk squ qmazeh na bnkis Tomi,mzyup kya lga mhkani na kakay la.tuqiy qesuw qaniy ga blaq balay hlahuy nya, qqsinuw qqhuniq.misuw qaniy ga nyux galan wahan mqbaq na laqi.

3. Qwayux

Qwayux qaniy ga kni’an bnkis raral uziy,misuw qaniy ga yasa qu nyux galan niqan qsya na qalang Piyaway,blaq balay wahan mita qqsinuw.qlyan ga qqbhniq ktan,mhngan ga mqwas qu qpatung, mita mqu kmyap nniqun nya.

4. Uraw

lingay nya qutux b’bu rgyax ga snyan qongu na Gipun sraral, sbu’ nya qalang tayal,smngungu squ tayal- (Qwayux Bnay Raga Sbunaw Kgiran Piyaway).rgyax qaniy ga tlngayan na yulung krryax,qlyan ga baqun rm’r mita rgyax Nace Nagu Xuxu Rr’an, mhngan ga ktan qu pnilaw na hogan To’ing ru bbengah,blaq balay wahan rm’ra mita nnanu gaw.