مرید عارف

فاضل پور راجن پور وچ ٧ جون ١٩٩٠ء کوں جمے۔

• کَھرّے اَکھّر

حاتم بلوچ دے طرح مصرعے تے کجھ لایناں

ہَن٘جوں دے شَپکار تے کِھلݨ نی بَݨدا

مُون٘جھ مَتام کوکار تے کِھلݨ نِی بَݨدا

مَاء دَھرتی دا ݙُکھ نَئ جین٘دے جِیڑے وِچ

اِین٘جھے وی بےکار تے کِھلݨ نی بَݨدا؟

ہُݨ مَقتول دِیاں دِھّیاں رووَݨ آگیاں ہِن

قاتِل دے اَگواڑ تے کِھلݨ نی بَݨدا

ہر اِنسان آزاد فطرتوں ڄَایا ھے

ݙُوجھے دے تَہوار تے کِھلݨ نی بَݨدا

ݙاݙھے دے وَن٘ج پِڑ پُو تِیکوں ݙیکھاں مَیں

ہِیݨے دِی کَڈھ مَار تے کِھلݨ نی بَݨدا

چُوچک دا مَپ مَار وَن٘ڄݨ وی غیرت نَئ

کَیدو دے کِردار تے کِھلݨ نی بَݨدا

وَسبے دی کوئی چُنڈ نَئ خالی ݙُکھاں تُوں

ݙُکھاں دے وچکار تے کِھلݨ نی بَݨدا

شادی عید برات تے عارفؔ کِھلدا رَہ

ݙاہویں دے ݙینہہ ، وار تے کِھلݨ نی بَݨدا