سائنسداناں دا انسائیکلو پیڈیا

انسانی تریخ پراݨے ویلیہاں توں سائنسی تجربات دے ذریعے ایجاداں تے ترقی نال بھری ہوئی اے۔ ایندے تے نگاہ کرݨ نال ٻہوں سارے عظیم لوگ ساݙے سامݨے آندن جنہاں نے انسانیت دی خدمت دی خاطر اپݨیاں حیاتیاں تیاڳ ݙتیاں تے سائنسی علم دے نال دنیا دا رخ موڑ ݙتا۔ انہاں سادھو منش لوڳاں نے دنیا دے جھڑکاں تے مذہبی انتہا پسنداں دے ظلم وی برداشت کیتے مگر انسانیت دی سیوا دے مشن توں ہک قدم وی پچھاں نہ ہٹے۔ سائنسداناں دی اے تریخ حضرت ادریس پیغمبر توں شروع تھیندی اے جنہاں نے انسان کوں سائنسی شعور عطا فرمایا۔ آپؑ نے تریخ وچ ٹاؤن پلاننگ تے ڈیویلپمنٹ دا فن شروع کیتا۔ سائنسی ترقی دی اے پندھ وہاݨی اتنی پراݨی اے کہ اساں ایں کتھا وچ ہزاراں ایہو جیہے سادھو طبیعت لوڳاں نال واقف تھیسوں جنہاں کوں دنیا سائنسدان آہدی اے۔ انہاں سائنسداناں نے مذہب، رنگ، نسل، قومیت تے علاقائیت دے تعصباں توں اتے تھی کے انسان دی سیوا کیتی اے، او سارے گزرے لوگ امر تھی ڳن تے جیہڑے سائنسدان اڄ دے دور وچ کم کریندے پن، او انسانیت دے سر دا تاج ہن۔ (اسماعیل بھٹہ، ٢٣ نومبر ٢٠١٨ء)