Artìculu in LSC
Charles Bukowski (Andernach, 16 austu 1920 – San Pedro, 9 martzu 1994), est istadu unu iscritore e poeta de sos Istados Unidos. S'opera sua fiat caraterizada de una forte cumponente autobiogràfica e duncas de su raportu suo cun s'alcol, cun sas fèminas e cun totu sa sotziedade.
Gioventude
Heinrich Karl Bukowski naschet in Andernach, Germània, de Katarina Fett, tedesca, e de Heinrich Bukowski, americanu de origine polaca e tedesca. Issu affermaiat de èssere figiu illegitimu, ma is documentus anagràficos de Andernach narant ca su babbu e sa mamma si fiant cogiados unu mese in antis de sa nàschida sua.
Sa famillia sua emigrat in Amèrica cando issu tenet duos annos, pro ite in Germània a pustis de sa I Gherra Mundiale s'economia est a su collassu, e andat a bivere in antis in Baltimora, Maryland, ma in su 1930 si trasferit in Los Angeles, Califòrnia.
In su romanzu 'Ham on Rye', issu contat ca su babbu fiat fatufatu chentza triballu e meda malu cun sos figios.
A pipiu est meda birgunzosu, peus prus a mannu cando si immalaidat de acne, e creschet solu pro ite sos canteapares ddu istorchent pro s'atzentu tedescu chi tenet e pro comente benet obligadu a si bestire.
Est pitzocheddu cando comintzat a buffare alcol impare a s'amigu fidau William 'Baldy' Mullinax, figiu de unu silurgianu alcolizadu.
A pustis de su diploma istùdiat cursos de arte, giornalismu e literadura in s'universidade pro duos annos, ma lassat sos istudios cun su comentzu de sa II Gherra Mundiale, e movet a New York pro comintzare sa carriera de iscritore.
Bukowski no andat in gherra pro ite est giuigadu non idoneu.
Primos Iscritos
Su primu contu benit pubricadu cando tenet 24 annos in sa rivista Story, su segundu contu benet pubricadu duos annos a pustis in una ragorta de Portfolio III. A coa lassat s'iscritura pro deghe annos e abarrat in Los Angeles o in àteras partes de sos Istados Unidos, triballende pagu. In sos annos '50 agatat traballu comente posteri chi però abandonat tres annos a pustis.
In su 1955 est a curtzu de mòrrere pro una liaga in s'istomogo e comente sanat torrat a iscriere poesias. In su 1957 cògiat Barbara Frye, una poeta de su Texas chi no at mai bida in antis. A pustis de su divortziu in 1959, issu torrat a buffare.
Annos Sessanta
Torrat a traballare in s'offìtziu postale de Los Angeles in ue abarrat pro deghe annos. In su 1962 morit Jane Cooney Baker, primu amore suo, cunsiderada de sos biografos de Bukowski ispiradora de sa produtzione de Bukowski. Issu ddi dèdicat una regorta de poesias chi nde pranghent sa morte.
In su 1964 sa cumpanza Frances Smith ddi dat s'unica figia, Marina Louise.
In su 1967 Bukowski incomintzat a iscriere More Notes of a Dirty Man, chi pùbricat in puntadas in 'Open City' revista de Los Angeles. Cun sa serrada de 'Open City' sos contos sighint a bènnere pubricados in su 'Los Angeles Free Press'e in su NOLA Express de New Orleans, Louisiana. In su 1969 si dedicat a una revista literaria sua chetza de tènnere fortuna.
Sos annos Black Sparrow
In su 1969 atzetat s'oferta de John Martin, editore de sa Black Sparrow: 100 dollaros a chida pro totu sa vida. Detzidit duncas de lassare su triballu a sas postas pro si dedicare a s'iscridura. Tenet barantanoe annos. Comente espricat in una litera "tenia isceti duas possibiliadades - abarrare a s'ofitziu postale e m'amachiare... o mi nch'andare e giogare a faghere s'iscritore e morrere de famine. Detzidia de morrere de famine". Passat prus agu de unu mese cando agabat su primu romanzu, Post Office, chi ddu faghet famadu. Bukowski, pro respetu e riconnoschéntzia a sa fidùtzia chi ddi ant dadu, pubricat giai totus sos romanzos a sighire cun sa Black Sparrow.
In su 1976 connoschet Linda Lee Beighle, e bivet impare a issa prus de duos annos, mancari fatufatu si lassant pro ite issu s'istracat de sa relatzione e da bogat de domu. Bukowski, iscriende de Linda, narat ca issa ddi at regaladu deghe annos in prus (pro ite ddu obrigat a buffare prus pagu e isceti binu). Si cògiant in su 1985.
Morte
In su 1988 si malàidat de tisichéntzia, ma sighit a iscriere e pubricare liburos fintzas a cando, su 9 martzu 1994, morit pro una leucemia fulminante in San Pedro, pagu a pustis chi at agabadu s'urtimu romanzu Pulp. S'interru est fatu de mongios buddistas.
Sa tumba sua narat: "Don't try", chi cheret narrere non proves, frasa chi aiat usadu in una poesia cunsigende sos aspirantes iscritores e poetas.
Bukowski at pùbricadu iscritos meda numerosos de sos primos '40 fintzas a sos primos '90.
Issu reconneschiat ca s'iscritura sua fiat influentzada Anton Chekhov, James Thurber, Franz Kafka, Knut Hamsun, Ernest Hemingway, Henry Miller, John Fante, Louis-Ferdinand Céline, Robinson Jeffers, Fedor Dostoevskij, D. H. Lawrence, Antonin Artaud, E. E. Cummings.
Fatufatu su nòmene suo est istadu assotziadu a su movimentu de sa beat generation, essende s'istile suo de iscriere informale e anticunformista, issu però non s'est mai identificadu comente "beat".
Los Angeles est su logu chi faghet de isfundu a manna parte de sos iscritos suos, in ue sos tratos de sa sotziedade e de s'umanidade postos a lughe sunt prusatotu sos prus miseros e contraditorios, contados cun ironia e marigore.
Est de su 1981su film de su diretore de pellicula Marco Ferreri, Storie di Ordinaria Follia, chi umprit de sa regorta de contos de Bukowski. Sa parte de Bukowski est interpretada de Ben Gazzara.
In su 1987 bessit Barfly, unu film semi-autobiograficu iscritu de Bukowski e interpretadu de Mickey Rourke, in su rolu de s'àlter-ego Henry Chinaski e de Faye Dunaway in su rolu de sa fantzedda Wanda Wilcox. Bukowski bi cumparet fintzas in unu cameo comente cliente de unu bar.
Semper de su 1987 Crazy Love, unu film de su Bèlgiu, unu acontzu de iscritos de Bukowski.
De su 2003 su film-documentariu Bukowski: Born Into This, chi contat da sa vida de s'iscritore. A su film ant contribuidu Sean Penn, Tom Waits, Harry Dean Stanton and Bono.
In su 2005 bessit una acontzadura pro tzinema de su romanzu Factotum, cun interpretes Matt Dillon, Lili Taylor, e Marisa Tomei.
Controllu de autoridade | VIAF (EN) 64002815 · ISNI (EN) 0000 0001 1405 9853 · BIBSYS (EN) 90112958 · BNC 000334631 · BNE (ES) XX1156455 (data) · BNF (FR) cb11894503x (data) · CANTIC (CA) a1005506x · CiNii (JA, EN) DA04241723 · Europeana agent/base/60588 · GND (DE) 11851735X · LCCN (EN) n79091866 · LNB (LV, EN) 000042706 · MusicBrainz 1ad1c7db-cf3f-46c8-96e9-24be0a29e027 · NDL (EN, JA) 00463977 · NKC (EN, CS) jn20000720038 · NLA (EN) 36355649 · NLG (EN) 259461 · NLK (KO) KAC199603878 · NLP (PL) https://dbn.bn.org.pl/descriptor-details/a0000001182838 · NSK (HR) 000001415 · NTA (EN) 068522355 · OL OL31084A · RERO 02-A027232552 · SBN (IT) CFIV004032 · SELIBR (SE) 174402 · SNAC (EN) w6sx8g8p · SUDOC (FR) 026758725 · Trove (EN) 1250347 · WorldCat Identities (EN) n79-091866 |
---|
This article uses material from the Wikipedia Sardu article Charles Bukowski, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Su cuntenutu est a disponimentu suta de sa litzèntzia CC BY-SA 4.0 francu chi non bi siat àteru inditadu. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Sardu (DUHOCTRUNGQUOC.VN) is an independent company and has no affiliation with Wiki Foundation.