бу Күн:04-14

• 1922 сыллаахха бу күн Саха күбүөрүнэтин сэбилэниилээх күүстэрин командующайа оперативнай дааннайдарынан «баандалар» ахсааннара:

Иккис хайысха — Павловскай учаастага — Тыыллыма нэһилиэгэр 70-ча киһилээх "баанда". Үксэ нууччалар, прапорщик Шипков Иван салайааччылаах. Догдоҥо (Павловскайтан 35 биэрэстэлээх сир диэн ыйыллыбыт — ол аата билиҥҥи Бөкө бөһүөлэгэ ахтыллар быһыылаах) — 35 киһилээх этэрээт. Улуу-Сыһыы (20 биэрэстэ диэбиттэр, бу Майаттан чугас сир) — 40-ча киһилээх Скрябин (кыраайы үөрэтээччи И.Куолаһап этэринэн Скрябин-Ньылба буолуон сөп) диэн саха киһитэ хамандыырдаах этэрээт. Догдоҥо нэһилиэгэр (Хаар балаҕан диэн сир) — 50 киһи. Бу этэрээттэр штаабтара Хаптаҕай нэһилиэгин Харыйалаах диэн сиригэр баар эбит, манна өссө 200-чэ киһи.

Үһүс — Маҥан учаастага — Намсыыр күөлгэ кулун тутар 28 күнүгэр хотторон баран I Үөдэй нэһилиэгин Спасскай таҥаратын дьиэтигэр 100-чэ киһилээх этэрээт түспүт. Хамандыыр — Турнин диэн саха киһитэ.

Барыта Дьокуускай тула 1500 бандьыыт баар диэн суруллубут. Аммаҕа, Бүлүүгэ, Верхоянскайга уонна Халымаҕа хас киһи баара биллибэт диэн суруллубут.

• 1975 сыллаахха Саха АССР култууратын министиэристибэтин коллегиятын быһаарыытынан Пушкин аатынан бибилэтиэкэ иһинэн Аҕыйах ахсааннаах омуктар сиэктэрдэрэ тэриллибитэ. Пуондатын олоҕунан Г.М. Василевич бибилэтиэкэтин кинигэлэрэ буолбуттара, барыта аҕыйах ахсааннаах хотугу омуктар тылларынан 43 кинигэ этэ.
• 1986 — Франция суруйааччыта, бөлүһүөгэ Симона де Бовуар өлбүт.
• 2007 — Арассыыйа бөдөҥ куораттарыгар Сөбүлэспэттэр марштара иккис төгүлүн ыытыллыбыт.
• 2010 — Исландияҕа Эйафьадлайокудль вулкаан эстиитэ күүһүрбүтэ.
• 1995 — Сунтаар Хаҥалаһыттан төрүттээх бэйиэт, драматург, суруналыыс Иван Алексеев өлбүт.
• 2011 — Дүпсүн улууһуттан (билигин Уус Алдан улууһугар киирэр) төрүттээх Ойуунускай аатынан судаарыстыба бириэмийэтин лауреата, Дьокуускай Ытык киһитэ, Музыка оскуолатын дириэктэрэ Василий Босиков өлбүт.