Константин Паустовскый, русс. Константи́н Гео́ргиевич Паусто́вский; *31. май (19. май Юл. кал.) 1892, Москва, Россия – †14. юл 1968, Москва, СССР — русскый совѣтскый писатель и новинарь, найлѣпше познатый своима повѣданями, котры принесли дореволучны традиции русского романтизму до литературы совѣтской добы.
Константин Паустовскый | |
---|---|
Уроджѣня | мая 31, 1892 Москва, Россия |
Умертя | юла 14, 1968 (76 р.) Москва, СССР |
Погреб | Таруса |
Занятя | писатель, новинарь |
Язык творох | російскый |
Горожанство | Російска імперія, СССР |
Праца | Літературний інститут імені Горького |
Час творбы | 1910–1968 |
Жанры | роман, повість, повіданя, п'єса, приповідка, нарис |
Тренд | романтизм |
Вызначны роботы | Повѣсть о животѣ (1945–1963) |
VIAF:15507; GND:118592262; LCCN:n79076435; FAST:38913; BNF:11918543n; NLKR/NLC:jn19990210482; OL:OL324606A, OL5691674A; |
Мав предкы меджи украинскыма козаками. Учив ся в Киевѣ, Санкт-Петербургу и Одессѣ. Перед тым, як зачав писати, робив на многых и вшелиякых роботах, ай ку тому вельо путовав, як по Совѣтской Унии, так и в заграничу.
В рокы Первой свѣтовой войны — санитар на санитарных потягах, пак выпробовав вельо професий на фабриках, в рыболовской артели идр. В домовой войнѣ 1917–1922 — новинарь в Киевѣ, Одессѣ, на Кавказѣ.
Первов публикациев было повѣданя На водѣ (1912), котре гимназист Паустовскый подав в алманах Огнѣ (Киев), и на его зачудованя было опубликоване.
В роках 1945–1956 преподавав в Литературном инштитутѣ А. М. Горького. В добѣ «помягку» активно ся ангажовав за регабилитацию репресованых писательох и заступав ся за политично гоненых особ; быв в числѣ ушорительох литературного либералного алманаха Тарусскы сторонкы (1961), котрый влада по публикации заказала.
„ | Паустовскый нигда не быв членом партии, ни даякым посланцьом, ани урядником в Сполку писательох СССР. В добѣ култа особы Сталина не написав ани еден шорик на хвалу великого вождя... не подписав ани едну колективну вызву против даякого гоненого. Але, як судили писательох Синявского и Даниела, котры опубликовали свои творы на Западѣ, Паустовскый въедно з К. Чуковскым отворено ся за них заступив и дав суду свои доводы на хосен обвиненых. | ” | |
|
В року 1963 в социологичной анкетѣ о найпопуларнѣйшом писателю Паустовскый быв первый, а за ним далеко заостав протекчный «партийный писатель» Михаил Шолохов. Не было в моци партии з тым нич зробити, а за то ся му помстили. В року 1965 коли уже быв вызначеный як лавреат Нобела, дипломатичныма интригами влада СССР домогла ся, жебы Нобеловскый комитет змѣнив свое рѣшѣня и дав награду Шолохову.
В первых творах писателя мрѣи о далекых сторонах, путованях, встрѣчах и розлуках занимають головне мѣсто. З роками его проза значно ся мѣняеть, але писатель нигда ся не зрѣкать того общого ей колорита, через котрый называють тоту прозу романтичной.
Писав романы, повѣсти, повѣданя, историчны и биографичны творы. Повѣсти Кара-Бугаз (1932) и Колхида (1934) принесли му широку знамость. В его творбѣ читатель находить лиричный погляд на природу и силный интерес ку людьом; его называють едным из найлѣпшых майстрох слова меджи писателями 1920-х и 1930-х рокох. Его главна робота Повѣсть о животѣ (1946–1963; подтитулок История едного живота) складена зоз шѣстьох книг, являть из себе циклус автобиографичных споминок.
В историчных и биографичных повѣстях Паустовскый не кладе собѣ задачу точной реконштрукции историчных фактох, главнѣ ся усилуе притягти читателя емоционално, знае заразити го чутьом родинства з минулостьов свойой земли, дояти го мужностьов и жертвеностьов геройох. Все веце пише о творчости, о людях умѣлства — малярях, музикантах, писателях: Орест Кипренский (1937), Исаак Левитан (1937), Тарас Шевченко (1939), Повѣсть о лѣсах (1949), Золота ружа (1956) — повѣсть о литературѣ, о «прекрасной сущности писательского труда», о цѣнности точно найденого слова. За тоту послѣдну од Польской Академии Наук заслужив награду ай быв номинованый на Нобла.
Автобиографична епопея Повѣсть о животѣ — доимаючый литературный документ живота России в зачатку XX. стороча. Книгы Паустовского перекладены многыма языками.
На честь Паустовского названа планетка (5269) Paustovskij (1978 SL6).
This article uses material from the Wikipedia Русиньскый article Константин Паустовскый, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Обсяг є доступный під CC BY-SA 4.0, кідь не є вказане інше. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Русиньскый (DUHOCTRUNGQUOC.VN) is an independent company and has no affiliation with Wiki Foundation.