Йолана Мондичова, родж. Йолана Шинальова (*26. септембер 1902, Дюлафалва, жупа Мараморош, Австро-Мадярщина, днесь Comuna Giulești, Maramureș, Румыния – †12. марец 1975, Кошицѣ), Русинка, была перва чехословацка професионална скулпторка. Добыла собѣ знамости скулптуров Томаша Гарриг Масарика. Створила скулптурны портреты вельох вызнамных дѣячи русинского народа.
Йолана Мондичова | |
---|---|
Уроджѣня | Йолана Шинальова септембра 26, 1902 Дюлафалва (Gyulafalva), Австро-Мадярщина |
Умертя | марца 12, 1975 (72 р.) Кошицѣ, Словакия |
Погреб | Кошицѣ, Словакия |
Занятя | скулпторка |
Народность | Русинка |
Час творбы | 1926–1938 |
Свояк(ы) | Штефан Шинали (отець) Катарина Кенедичова (мати) |
Супруг(а) | Иван Мондич (1894-1974), правник |
Дѣти | не были |
Вызначны роботы | Томаш Гарриг Масарик, Ужгород Александер Духнович, Пряшов |
VIAF:2266156565689423500006; GKG:/g/12dpwp995; |
Йолана (Елена, Олена) Шинальова родила ся 26. септембра 1902 в селѣ Дюлафалва, 15 км на юг од Мараморош-Сигета, (днесь Джулешть, Румыния), в родинѣ учителя Штефана Шинали зоз села Осиков, окрес Бардеёв, котрого за его панславистичны погляды перемѣстили до далекого села. В року 1919, по роспадѣ монархии, родина вернула ся до Словакии, де отець достав мѣсто учителя в селѣ Ковачовцѣ, окрес Великый Кртиш Банско-Быстрицкого края. Йолана учила ся на гимназии в Кошицях. По матурѣ учила ся в Празѣ на Высокой школѣ умѣлецко-промысловой (UMPRUM) (1921-1922), а пак выштудовала фах скулптуры в Академии вытварного умѣлства (AVU, 1922-1925), де ей наставником быв славный Ян Штурса.
Року 1926 оддала ся за штудента Ивана Мондича з подкарпатского села Нанково, котрый в Празѣ штудовав право, и заинтересовала ся Подкарпатсков Русьов. Одтогды ей далша карьера была тѣсно звязана з тым краем: вытворила цѣлый ряд скулптурных портретох подкарпатскых дѣячи. 16. мая 1926 в Ужгородѣ святочно отворили памятник Евгению Фенцикови, первый з того ряда. Робота была высоко оцѣнена критиков, як и ей роботы, представлены на выставцѣ в Пряшовѣ в року 1927.
Року 1927, уже як добрѣ позната скулпторка выграла конкурз на зготовлѣня памятника Т.Г. Масарика, котрый робила не з фотографий, але з живого президента, а памятник быв в Ужгородѣ при ославах 10-роча отвореный в року 1928.
Есенциев ей творбы стали статуи Александра Митрака (1931) в Мукачовѣ и Александра Духновича (1933) в Пряшовѣ.
Иван Мондич быв правник и представляв интересы фирмы «Шкода» в Ужгородѣ и в Югославии. Роспад Чехословакии и Друга свѣтова война означали и особну трагедию родины Мондичох. Военны рокы перебыли в Мукачовѣ, а пак в Будапештѣ. Стратили вшитко: ательер и маеток в Празѣ, сполоченску позицию. Довгы днѣ и ночи, перебыты во вогкых пивничных бомбовых укрытах, принесли Йоланѣ гостець и ломоту в перстах, а ей карьера яко скулпторкы была закончена.
По войнѣ оселили ся в Кошицях, у Йоланиной матери. Скулпторка, котра портретовала буржоазных дѣячи была нежадана старорежимна особа. Пробовала достати роботу учителькы мальованя, але про такых, як она не было мѣста. Мусѣла приспособити ся ку новому режиму. Достала мѣсто продавачкы текстила и там таксамо ся скоро стала знама, бо каждой женѣ знала порадити, што ей буде слушити. Коли видѣли, же в продайни ся через ню дверѣ не закрывають, достала выповѣдь. Бо не смѣла выникати над середный уровень. Зостала лем помочнов роботничков. Муж мав мѣсто простого урядника на желѣзници. Умерла в Кошицях 12. марца 1975.
This article uses material from the Wikipedia Русиньскый article Йолана Мондичова, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Обсяг є доступный під CC BY-SA 4.0, кідь не є вказане інше. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Русиньскый (DUHOCTRUNGQUOC.VN) is an independent company and has no affiliation with Wiki Foundation.