Гелена Сивч

октобер">22. октобер 1922, Руски Керестур, Войводина, Кральовство Сербох, Хорватох и Словенцьох – †4. новембер 2016, Нови Сад, Войводина, Сербия — академична малярька, педагог и сполоченска активистка меджи войводянскыма Русинами.

Гелена Сивч Гелена
фото
Чинность	малярька
Горожанство	Сербія
Уроджѣня	октобра 22, 1922(1922-10-22)
Руски Керестур, Войводина, Кральовство Сербох, Хорватох и Словенцьох
Упокоеня	новембра 4, 2016 (94 р.)
Нови Сад, Войводина, Сербия

Гелена Сивч в Руском Керестурѣ закончила основну школу, а гимназию и учительску школу в Зомборѣ и Новом Садѣ (1933–1941). Высшу педагогичну школу закончила в Новом Садѣ (1941–1943).

Педагогичну роботу зачала в Керестурѣ, де при концю Другой свѣтовой войны робила як учителька, а по войнѣ як административно-политичный роботник. Куртый час, 1946/1947. року робила як учителька математикы и рисованя в руськой гимназии в Руском Керестурѣ.

В часѣ войны была участна в илегалном руху одпору и ослободжѣня, вступила до комунистичной партии. Ещи в штудентской добѣ была на куртый час арештована окупачнов мадярсков владов за свои лѣвы пересвѣдчѣня.

По войнѣ абсолвовала Вытварну академию в Загребѣ, а дипломовала в Београдѣ 1951. року, в класѣ професора Неделька Гвозденовича, де зыскала титул академичной малярькы. По закончѣню академии ей далшыма мѣстами роботы были Баня Лука и Сараево, де была прията до Здружѣня вытварных умѣлцьох Босны и Герцеговины.

До Нового Саду ся вернула в року 1960, де выучовала вытварну културу на гимназиох, а найвецей в Гимназии „Моша Пияде“, одкаль пошла и до пензии. Активно ся ангажовала в Дружствѣ вытварных педагогох Войводины, была инициаторков и организаторков вельох его акций. Членка Здружѣня вытварных умѣлцьох Войводины и Новосадского салону. За свою професийну роботу вецей разы вызнаменана, а як сполоченска активистка в року 1980 достала Орден заслуг про народ зоз стрибернов звѣздов.

Гелена Сивч во свойом малярьском выявѣ выразна акварелистка, а свою тематику напрямила на пейзаж ровнины и темы зоз свойого родного валалу. Ей акварелы мають субтилну лиричну штруктуру.

Окрем акварелох робила тыж малюнкы и гобелены. Попри колективных выставках (Сараево, Баня Лука, Београд, Нови Сад, Зомбор, Руски Керестур, Коцур, Дюрдьов), мала и вецей самостойных в Новом Садѣ и Руском Керестурѣ. Была тыж и една зоз основательох и перва предсѣдателька Клубу вытварных умѣлцьох при Дружствѣ про руськый язык, литературу и културу, котрый основали 10. апрѣля 1996 в Новом Садѣ. Представлена в монографии „Подобова творчосц Руснацох“, выдаватель: Дружтво за руски язик, литературу и културу, Нови Сад, 2003.

• Paul Robert Magocsi. Sivch/Sivč, Helena. in Paul Robert Magocsi, Ivan Pop. //Encyclopedia of Rusyn History and Culture (Revised and expanded ed.). Toronto Buffalo London: University of Toronto Press, 2005. p. 461. doi:10.3138/9781442674431. ISBN 0-8020-3566-3. англ.
• ипа/дюл/зам (7. новембер 2016). Умарла Гелена Сивч, нєшка хованє. РУТЕНПРЕС, НВУ РУСКЕ СЛОВО. https://www.ruskeslovo.com/умарла-гелена-сивч-нєшка-хованє/. [перевірено 2022-10-28]. 
• НАР-админ (28. децембер 2017). Гелена Сивч, подобова педаґоґиня, малярка. НАР, Новинарска Асоцияция Руснацох. https://nar.org.rs/rue/gelena-sivcova/. [перевірено 2022-10-28].