Haddaway

Quist artichel es scrit in rumauntsch puter

El dvantet renumno dal 1993 culla chanzun What is Love ("Che es amur"), chi vet fich success in tuot il muond.

Biografia

Ils inizis

Naschieu da bap ollandais oceanograf e da mama da Trinidad e Tobago fliunza, get Haddaway a viver in Europa a l'inizi dals Auns Setaunta cun sieu bap zieva'l divorzi traunter sieus genituors. Zieva qualche aun get el a viver culla mama i'ls Stedis Unidis.
Dal 1989 turnet el a viver in Europa, exactamaing in Germania, a Cologna, inua ch'el cumanzet a lavurer scu choreograf e venditur da tapetas ed a fer musica düraunt il temp liber.

Carriera

Haddaway/The Album

Dal 1992 signet el ün contrat culla chesa discografica tudas-cha "Coconut Records".
Dal 1993 gnit our sieu prüm album, Haddaway/The Album; sia prüma chanzun publicheda, What is Love, vet ün terribel gross success in tuot il muond; ella guadagnet la prüma posiziun illas parada da hits da bgers stedis: Svizra, Austria, Irlanda, Danemarc, Finlanda, Norvegia, Germania, Frauntscha, Spagna, Italia, Belgia, Pajais Bass, Lettonia, Israel e Mexico. What is Love es considereda eir hoz scu üna da las megldras chanzuns da musica da disco dals Auns Nonaunta.
Eir las otras chanzuns publichedas da Haddaway/The Album vettan fich success: Life ("Vita"; prüma posiziun in Spagna e Svezia, seguonda in Svizra), I Miss You ("Eau at perd"; 17. in Svizra) e Rock Your Heart ("Mouva ferm tieu cour"; 10. in Svizra).
L'album vendet a la fin bgers milliuns da copias.

The Drive

Dal 1995 gnit our il seguond album da Haddaway, clamo The Drive ("La guida"). La prüma chanzun extracta da quist DC, Fly Away ("Svula davent"), vet ün bun success: in Svizra ragiundschet'la la 14. posiziun da la parada da hits.
Oters chanzuns da quist album eiran eir Catch a Fire ("Piglia ün fö"; 20. in Svizra) e Lover Be Thy Name ("Amant saja tieu nom").

Let's Do It Now

Dal 1998 publichet Haddaway ün nouv album, Let's Do It Now ("Fain el uossa"), chi eira cumplettamaing divers dals duos precedaints: pelvaira eiran las chanzuns da quist DC na da musica da disco, ma da musica soul; uschè nu vet el fich success.

Ültimas activiteds

Haddaway apparet darcho sülla scena dal 2004 i'l program da la televisiun tudas-cha Comeback reality television show e dal 2005 i'ls simils programs ingles ed americaun da listess nom, Hit Me Baby One More Time.
Ils meg 2008 publichet el la chanzun I Love the 90's ("Eau d'he gugent ils Auns Nonaunta"), chanteda insembel cun Dr. Alban, oter renumno chantadur da musica da disco dals Auns Nonaunta.

Sias lavuors

Albums

1993 Haddaway/The Album
1995 The Drive
1998 Let's Do It Now
1999 All The Best His Greatest Hits
2001 My Face
2002 The Greatest Hits
2002 Love Makes
2004 What Is Love - The Greatest Hits
2005 Pop Splits
2007 Crucified

DC singuls

1993 What Is Love
1993 Life
1993 I Miss You
1994 Rock My Heart
1995 Fly Away
1995 Catch A Fire
1995 Lover Be Thy Name
1997 What About Me
1998 Who Do You Love
1998 You're Taking My Heart
2001 Deep
2002 Love Makes
2003 What Is Love Reloaded
2005 Spaceman
2005 Missionary Man
2007 Follow Me
2008 I Love The 90's (cun Dr. Alban)

Colliaziuns

Website da Haddaway in ingles e tudas-ch

This article uses material from the Wikipedia Rumantsch article Haddaway, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il text è disponibel sut la licenza Creative Commons Attribution/Share-Alike; ulteriuras cundiziuns pon esser applitgablas. Detagls chattas ti en las cundiziuns d'utilisaziun. Vichipedia è ina marca registrada da la Wiki Du học, ina organisaziun senza finamira da profit. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Rumantsch (DUHOCTRUNGQUOC.VN) is an independent company and has no affiliation with Wiki Foundation.