پاکستان پنجابی ادبی بورڈ

پاکستان پنجابی ادبی بورڈ 1975ء وچ پنجابی شاعراں، ادیباں تے سوجھواناں نے پنجابی زبان تے ادب دے ودھاء لئی بݨایا۔ ایہدے قیام دا مقصد ایہ سی کہ پنجابی زبان و ادب دا اک ادارہ ہووے جیہڑا کلاسیکی پنجابی ادب، پنجاب دی تاریخ تے پنجابی زبان دی لُغت لئی کھوج کاری تے اوہناں نوں چھاپݨ دا آہر کرے۔

30 مئی 1975ء نوں شام ویلے پنجاب بَھر دے معروف ادیباں، شاعراں، تے دانشوراں دا اِک اکٹھ ہوہا جیہدے وچ پاکستان پنجابی ادبی بورڈ دا قیام عمل وچ لیاندا گیا۔ ایس پہلے اجلاس وچ بورڈ دا دستور منظور کیتا گیا۔ ایہ وی فیصلہ کیتا گیا کہ ایہدے وچ وادھا گھاٹا بورڈ دے جنرل باڈی دے اجلاس وچ ہی ہو سکے گا۔

1. پنجابی زبان تے پنجابی ادب دی ترقی تے وادھے لئی ہر مُمکن کوشش کرنا۔
2. کلاسیکی ادب دی اشاعت۔
3. دوجیاں زباناں دے معیاری ادب دا پنجابی زبان وچ ترجمہ۔
4. پنجابی لُغت دی چھپائی۔
5. پنجاب دی تریخ نوں سودھݨا تے اوہدے اُتے کتاباں لکھواݨا۔
6. پنجاب دے صوفی شاعراں دے پیغامات تے تعلیمات نوں عام کرنا تے اوہناں دے دیہاڑ مناوݨا۔

بورڈ دے 11 پکے مِمبر نیں۔ ایہدے توں علاوہ بورڈ دے ہر دو ورھے بعد چوݨ ہُندے نیں جیہناں وچ 21 نویں مِمبر چُݨے جاندے نیں۔

بورڈ نے ہُݨ تک دو سو توں وَدھ کتاباں چھاپیاں نیں۔ ایہناں توں وَکھ بورڈ ہر مہینے اک ادبی پرچہ وی چھاپدا اے تے پنجابی زبان نوں اوہدا حق دلاؤݨ لئی ہور وی کارے کردا رہندا اے۔

مہینا وار “پنجابی ادب” پاکستان پنجابی ادبی بورڈ دا عِلمی، ادبی تے ثقافتی رسالہ اے جیہڑا ہر مہینے چَھپدا اے۔

• پنجابی ادبی بورڈ