راس امید

راس امید (انگریزی: Cape of Good Hope افریقان: Kaap die Goeie Hoop) جنوبی افریقا دے ساحلاں اُتے واقع اک راس اے۔ عام طور تے ایہنوں افریقا دا جنوبی سِرا منیا جاندا اے لیکن افریقا دا جنوبی سرا دراصل اِتھوں 150 کلو میٹر (90 میل) جنوب مشرق وچ واقع راس اگولاس اے۔ واسکوڈے گاما نے 1498ء وچ افریقا دے گرد گھم کے ہندوستان تے مشرقی ایشیا دا نواں راستا دریافت کیتا سی جیہدے توں بعد دونوں علاقے یورپی قابض قوتاں دی نو آبادیاں بݨ گئے۔ راس امید دی اصطلاح اتحاد جنوبی افریقا دے قیام توں قبل 1652ء وچ جزیرا نما کیپ دے گرد قائم کیتی گئی کیپ کالونی لئی وی استعمال ہُندی اے۔ 1910ء وچ ایہ پورا علاقا صوبا کیپ دا حِصا بݨا دِتا گیا۔ راس امید جزیرا نما کیپ دا جنوب مغربی کونا اے۔ جنوبی افریقا دا مشہور شہر کیپ ٹاؤن راس امید توں 30 کلومیٹر شمال وچ جزیرا نما دے شمالی کونے اُتے واقع اے۔ راس امید دا علاقا اپݨے قدرتی حُسن دے باعث وی مشہور اے۔ چند ماہرین سمجھدے نیں کہ یورپی جہاز راناں توں بہت پہلے چینی، عرب تے ہندی اس علاقے نوں دریافت کر چکے سی تے 1488ء توں پہلاں تیار ہوݨ آݪے چند قدیم نقشے اس امر دے شاہد نیں۔ اس علاقے وچ پہنچݨ آݪے پہلے یورپی پرتگال توں تعلق رکھݨ آݪے جہاز ران بارتھولومیو ڈیاس سی، جیہناں نے 1488ء وچ ایہنوں راس طوفان (انگریزی: Cape of Storms پرتگیزی: Cabo das Tormentas) دا نام دِتا۔ بعد وچ جان ثانی از پرتگال نے ہندوستان تے مشرق دے اس نویں راستے ناݪ وابستا امیداں دے باعث ایہنوں راس امید (Cabo da Boa Esperança) دا نام دِتا۔ ولندیزی نو آبادیاتی مُنتظم جان وان ریبیک نے ڈچ ایسٹ انڈیا کمپنی لئی 6 اپریل 1652ء نوں اک چھاؤݨی قائم کیتی جو بعد وچ کیپ ٹاؤن کہلائی۔ برطانیا نے 1795ء وچ کیپ کالونی اُتے قبضا کر لیا پَر 1803ء وچ اوہنوں ایہ علاقے چھڈݨے پئے۔ 19 جنوری 1806ء نوں برطانوی افواج نے دوبارا علاقے اُتے چڑھائی کیتی تے 1814ء دے اینگلو-ڈچ معاہدے دے تحت ایہ علاقا برطانیا نوں دے دِتا گیا۔ برطانیا دا قبضا 1910ء وچ آزاد اتحاد جنوبی افریقا دے قیام تک قائم رہیا۔