Rina Penso: Aktris i kantante kurasoleño

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

Penso (☆ 26 di òktober 1927 na Kòrsou) ta èks-aktris i kantante kurasoleño. E ta un di e aktrisnan mas renombrá di Kòrsou.

Rina Penso

Pais di nashonalidat	Reino Hulandes
Fecha di nasementu	26 òktober 1927
Lugá di nasementu	Kòrsou
Dominio di idioma	Hulandes
Okupashon	aktor di sine, stage actor
Distinshon	Premio Cola Debrot

Rina Penso ta yu di Maria Leocadia Maduro de Penso i a lanta na Otrobanda. E tabata ámtenar trahando na Kranshi. Aktua i kanta tabata su pashon. E tabata pasa su tempu liber aktuando den komedia i tabata miembro di e kor miksto Orfeon Crescendo. Despues el a pasa pa e kor Vivienne Frans i Kompania.

Su trayektorio artístiko den teatro i den sine ta inisiá na aña 1960 i ta kubri mas di sinku dékada. E ta kosechá su prome éksitonan ku su aktuashon den e obranan Laiza Porko Sushi (1960), Bai bini bon mi amor (Boeing Boeing) (1964) i Maribel (1966). Tur tres tabata obranan di repertorio mundial tradusí na papiamentu pa May Henriquez. Tambe na radio Curom e tabata gosa di popularidat pa su papel den e radionovela Mujeres de la Historia i e kuentanan di Luis Daal. Na 1973 e tabata aktris invitá na Venezuela pa e obra El delito en la isla de las Cabras di Compañia Profesional de Teatro de Venezuela. E mesun aña e obra a ser presentá tambe na Kòrsou. Komo aktris e tambe a presentá riba e escenario hulandes. Asina na 1990 el a aktua den un presentashon di John Leerdam i Ad van Kempen pa Theater Cosmic: Seis den Un / Zes in één. E obra aki tabata un sekuensia di seis monólogo ku, banda di Penso, tabata wòrdu interpretá pa Laura Quast, Diana Lebacs, Anne-Marie Braafheid, Norma Cova i Greta Trapenberg.

Na 1967 e ta kofundadó di Thalia, un grupo di teatro amatùr den kual e tabata aktivo komo aktris. Komo aktris el a aparesé tambe riba senario na Hulanda. El a skirbi tradukshon di literatura teatral na papiamentu. El a aktua den diferente pelíkula, entre otro Almacita di Desolato (1986) i Ava i Gabriel (1990) i den e pelíkula kòrtiku La Dama Blanca (2021), ku ta gana e premio internashonal di filmashon karibense durante Festival ‘Tales’na Canada..

Pa televishon el a aktua den Mi Yu ta Inosente (1972), Despensa, number robes (1981) i Hartelijke Groeten (1983, seri na Hulanda) i tambe den Famia Kibrá (1981, seri den tres edishon) i Boka Sanantonio (1989) bou direkshon di Pacheco Domacassé. Aktualmente Rina Penso ta forma parti di e grupo di teater: 'Ankrá na Otro'.

 

Rina Penso a risibí vários premio den Karibe i Latino Amerika, entre nan e premio Colá Debrot (1982) i e Tapushi di oro (2008). El a yega di wòrdu premiá komo mihó aktris na vários festival teatral, entre otro na Caracas (1971, pa su papel den Sorry, wrong number) i Aruba (1976, pa su papel den The Typist).

Na 1972 el a wòrdu kondekorá ku e medaya di oro i na 2012 promove pa Kabayero (ridder) den Orden di Oranje-Nassau. Dia 26 di òktober 2021 el a risibí e Krus di Mérito Kòrsou durante un homenahe den Teatro Blou na Otrobanda. Na 2017 el a risibí un rekonosimentu na Hulanda di Vereniging Antilliaans Netwerk. Durante e Curaçao International Film Festival Rotterdam di 2016 a strena un dokumental di su bida, titulá Mi ta hasi mi kos, produsí pa Wilma Ligthart.