Venancio Benjamin (Pacheco) Domacassé (☆ 1 di aprel 1941 na Rincon - † 22 di mart 2022 na Kòrsou) tabata un dosente, músiko, aktor, eskritor, direktor di teatro i sine di Kòrsou.
El a ehersé gran influensia riba e mundu kultural-artístiko di Kòrsou i e otro islanan den Karibe Hulandes.
Pais di nashonalidat | Reino Hulandes |
---|---|
Nòmber den idioma propio | Pacheco Domacassé |
Nòmber di nasementu | Venancio Benjamin Domacassé |
Nòmber di dilanti | Pacheco |
Fam | Domacassé |
Fecha di nasementu | 1 aprel 1941 |
Lugá di nasementu | Kòrsou |
Fecha di fayesimentu | 22 mart 2022 |
Lugá di fayesimentu | Kòrsou |
Kasá | Diana Lebacs |
Dominio di idioma | Papiamentu |
Writing language | Papiamentu |
Okupashon | musiko, aktor, eskritor, theatrical director, sineasta |
Área di trabou | sinematografia, teatro |
Distinshon | Kabayero den Orden di Oranje-Nassau |
Pacheco Domacassé a nase na Boneiru i a lanta na Antriol i Playa Pabou. Ku 12 aña el a muda pa Kòrsou. Despues di su estudio el a bai traha komo maestro di skol. Den dékada 1960 e tabata aktivo komo kantante-gitarista i mènèger di e banda The Teenage Shadows, den kual su kasá, Diana Lebacs, tabata kanta. Na 1974, siguiendo su dedikashon na kultura, el a bai traha na Servisio di Enseñansa i Kultura di Teritorio Insular di Kòrsou. Aki el a sirbi 20 aña komo hefe di e sekshon di kultura, den kual funshon e tabata entre otro presidente di e Komishon Inougurashon Himno di Kòrsou i inisiadó di e parada seú di Kòrsou, den kua el a hinka tambe algu di e simadan di Boneiru. Despues el a fungi komo direktor di Kas di Kultura na Aruba.
Skirbimentu tabata su hobby; Domacassé a kuminsa skirbi poema pero nunca a yega di publika esakinan. E tabata skirbi na papiamentu. Na yanüari 1970 a estrená su promé obra teatral Opus I den Sentro Pro Arte na Willemstad. E obra tabata na idioma hulandes komo eksepshon sporádiko i tabata bou direkshon di Dolf de Vries. Opus I ta un meskla di teatro, músika (soul) i baile i entre su obranan tabata e promé pa trese renobashon den mundu teatral antiano. Un aña despues a sigui Tula, un obra teatral tokante e rebelion grandi di katibu di 1795 na Kòrsou i tabata e promé tokante historia di sklabitut mirá foi e perspektiva di un yu di Kòrsou pretu. E storia ta basa en general riba e investigashon di e historiadó H.J. Hamelberg (1862-1918), mientras e kantikanan di trabou di e esklabo, manera tambú i e kantika di rebelion, a wòrdu skirbi pa e etnomusikólogo Eric La Croes pa falta di konosemento di kantika di rebelion. Tula a wordu presenta pa e grupo teatral Nos Kousa ku Eddy Kelly den e papel prinsipal di Tula, e lider di katibu. Direkshon tabata den man di Tone Brulin, asisti pa Domacassé; kende mes a dirigí su propio obranan ku a sigui. Otro obranan grandi tabata Tochi (1972) i Konsenshi di un Pueblo (1974). E último obra, dediká na pueblo boneriano, a wòrdu estrená na Boneiru ku un elenko di aktornan boneriano. E ta wòrdu mirá, entre otro pa e uso fleksibel di e idioma papiamentu, komo un punto kulminante den literatura antiano.
Ku e obranan Tula en Konsenchi di un Pueblo Domacassé ta wòrdu konsiderá komo un di e eskritornan di teatro mas radikal na Antia. Su presentashon i shownan teatral tabata generalmente inspirá pa historia. El a presentá mayoria di su obranan na e otro islanan di eks-Antia Hulandes. Entre 1971 i 1981 Domacassé a lanta varios grupo di teatro na Kòrsou i Boneiru, manera Grupo Nos Kousa i Rhythm Theatre, ku tabata trese su obranan riba tarima. Den añanan ochenta e ta pasa di teatro pa televishon i sine. El a produsí alrededor di dies pelíkula.
Despues di su penshon Domacassé tabata presidente di Fundashon Kultural Seú Kòrsou, Fundashon Parkenan Nashonal i Fundashon Almirante Luis Brion.
Pacheco Domacassé a fayesé dia 22 di mart 2022, alkansando edat di 80 aña. Desde 1976 e tabata kasá ku Diana Lebacs, edukador, aktris i eskritor di buki di mucha i kende a fayesé kuater luna despues di su morto. Huntu nan tabatin dos yu hòmber.
Na 1977 el a risibí e premio Sticusa pa su obranan teatral. El a wòrdu otorgá e medaya di Orden Andres Bello, klase III di Venezuela i kondekorá komo Kabayero (Ridder) den Orden di Oranje-Nassau pa su ról komo pionero riba tereno di arte i kultura.
Fuente, nota i/òf referensia |
This article uses material from the Wikipedia Papiamentu article Pacheco Domacassé, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). E kontenido ta disponé bou di CC BY-SA 4.0, a menos ku ta unique ta alkontrario. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Papiamentu (DUHOCTRUNGQUOC.VN) is an independent company and has no affiliation with Wiki Foundation.