Kondupohjan muzei on Kondupohjan piirin muzei.
Kondupohjan muzei oli perustettu 28. kezäkuudu vuvvennu 1984.
Kondupohjan muzei kerdou da ozuttau Kondupohjan piirin histouriedu. Muzeis ollah kui alallizet, mugai väliaigazet ozuttelut.
Kaikkiedah Kondupohjan piirin muzeis on läs 2 000 eksponuattua.
Muzeis on kolme ozutteluzualuu alallizien ozutteluinke. Yksi alallizis ozuttelulois on ”Kui seppy Ilmoilline sulhaizikse kävyi”. Tämä ozuttelu on interaktiivine, sie suau kuulta ”iändy” da kaččuo videoloi. Iče ozuttelu kerdou lyydiläzien histouries, heijän eloksen tavois da perindölöis. Zualas ollah eriluaduzet brujat, ruadovehkehet, kalan pyvvändynevvot, kodivehkehet, kuožalit, astiet, da kai regi da aidu. On muzeis syömizien retseptukniigoi, sinne on kerätty lyydiläzis kirjutettuu ainehistuo. Täs zualas suau nähtä fotokuvua – vahnua da uuttu, kuduat ozutetah lyydiläzien nygösty da ennevahnastu elaigua. Kuvis suau nähtä lyydiläzien svuad’boigi.
Toine muzein zualu on ”Oniegantagazen piirin metallu da kivi”. Tämä ozuttelu ruadau vuvves 2009 da ozuttau Kondupohjan piirin metalluvehkehii. Niilöin joukos ollah puuškien jadrat, kello, huuhmar da petkel, vaskikopeikoin keräilemy da muudu rauduvehkehty. Sie on ozutettavannu Belogorskoin mruamoru. Se on valgei da sit mruamoras luajittih kolonnua da suveniirua, kudamii sežo suau nähtä Kondupohjan muzeis. Erähät niilöis ollah luajittu XX-vuozisuan lopus.
Muzein kolmandes zualas on Kondupohjan vezistansien da sel’l’ulouzu- da bumuagukombinuatan ”histourien vuitti”. Sie ei ole äijiä ozutteluezinehty Suuren Ižänmuallizen voinan periä. Yhtelläh siegi suau nähtä mieldykiinnittäjiä eksponuattua – 1940-luvun andilahan ruutat, čuajut gaziettukul’azes, sobien pezomuilu da fotoapparuattu. Paiči sidä muzeis on äijy vahnua dokumentua, fotokuvua, gaziettua da muudu vehkehty.
Muzein huolenpivos on Uspenskoi kirikkö.
Proletarskaja piha,13, Kondupohju, Karjalan tazavaldu, Ven'a, 186225. tel. 8 (814) 514-22-96
This article uses material from the Wikipedia Karjalan article Kondupohjan muzei, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Syväindö on käytös licenzien CC BY-SA 4.0 mugah, ei lienne toizin mainittu. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Karjalan (DUHOCTRUNGQUOC.VN) is an independent company and has no affiliation with Wiki Foundation.