Operacion Bagration

A l'origina, èra solament una operacion sovietica de diversion destinada a favorizar una ofensiva majora en Ucraïna. Pasmens, la superioritat numerica de l'Armada Roja en òmes e en armaments li permetèt de rompre lo front alemand en Bielorussia. Puei, totei lei fòrças sovieticas ataquèron e, sus un front d'aperaquí 1 000 km, avancèron de 600 km entraïnant la destruccion dau Grop d'Armadas Centre alemand, l'enceuclament dau Grop d'Armadas Nòrd dins lei regions balticas e l'abandon de la màger part dei Balcans per lo Grop d'Armadas Sud. Isoladas, Finlàndia, Romania e Bulgaria foguèron obligats d'arrestar lo combat avans la fin de l'annada e de jónher lo camp aliat.

A la fin de l'ofensiva, leis Alemands avián perdut 560 000 soudats (tuats, bleçats ò presoniers), çò que representa la desfacha alemanda pus grèva de tota la guèrra. Lei pèrdas sovieticas èran de 178 500 tuats e de 590 000 bleçats e malauts.