Atemptats De Miègjorn-Pirenèus De Març De 2012

Lo Ministèri Public antiterrorista de París s'ocupèt dels afars e dubriguèt tres enquèstas «per de faches qualificats d’assassinat e temptativas d’assassinat en ligam amb una entrepresa terrorista», segon François Molins, lo procuror de París.

Lo procediment emplegat per cada murtre es identic: cascat, en escotèr, equipat d'una camèra GoPro » amb un pistolet de tipe Colt 45 de calibre .45 ACP e un pistolet mitralhaire de tipe Uzi de calibre 9 mm. L’analisa balistica montrèt qu'una de las armas del crime èra la meteissa dins las tres fusilhadas. L'autor dels murtres, Mohammed Merah, foguèt tuat lo 22 de març a l'eissit de l'assalt de son apartament pels policièrs.

Assassinat d’un militar a Tolosa

 

L'11 de març de 2012, a 16h10, Mohammed Merah prononcièt «tuas meus fraires, te tui» e abatèt lo maréchal des logis-chef Imad Ibn-Ziaten del 1^èr RTP d'una sola bala dins lo cap sus un parcatge situat davant lo gimnás del Castèl de l'Ers dins lo quartièr de Montaudran, al sud-èst de Tolosa, amb una arma de calibre 45. Lo militar foguèt estat contactat abans pel tuaire dins una anoncia per la venda d’una moto sul site leboncoin.fr ; foguèt abatut al rendètz-vos fixat. De tesmònis apercebèron l'assassin fugissent en escotèr. Ibn-Ziaten foguèt enterrat dimenge 25 de març de 2012 dins lo vilage de M'diq dins lo nòrd de Marròc.

Assassinat de militars a Montalban

Lo 15 de març de 2012, a 14h10, dos militars, Abel Chennouf, 24 ans, catolic practicant d'origina cabil, e Mohamad Legouad, 28 ans, musulman, son tuats e un tresen, Loïc Liber, 28 ans, es gravament ferit, pendent que retiravan d'argent a un distribuïdor automatic de bilhets situat prèp de lor casèrna a Montalban. Lor assassin arribèt en escotèr, apartèt fèrmament una persona vièlha e tirèt dins lo cap e dins l'esquina de las victimas, prenent lo temps d'acabar una d'aquela tombada pel sòl. Los enquestaires trobèron sus plaça 13 estuges de calibre 45 similars a las municions utilizadas pendent lo primièr murtre. Lo tiraire fugiguèt en escotèr en cridant «Allah akbar».

Tuariá a l’escòla josieva Ozar Hatorah

Un atemptat al colègi-licèu josieu Ozar Hatorah situat carrièra Jules Dalou dins lo quartièr de La Roseda al nòrd-èst de Tolosa se debanèt lo 19 de març de 2012 vèrs 8 oras lo matin.

Un òme que portava una camèra cenchada al pitre arrivèt davant l'escòla sus un escotèr, un Yamaha TMAX. De pé se'n anèt cap al pati. La primièra victima es un rabin e professor de l'escòla, Jonathan Sandler, abatut fòra de l'escòla quand temptava d'aparar del tuaire sos dos mainats, Gabriel, 3 ans, e Aryeh, 6 ans. Las camèras de videovigilància mòstran que lo tuaire assassinèt un dels enfants alara que se rebalava al costat del còs dels sieus paire e fraire. Dintra puèi dins lo pati e perseguís Myriam Monsonégo, la filha del director de l’escòla, Yaakov Monsonégo, 8 ans, la trapa pels pels e punta son pistolet que s'enraia. L'assassin cambia d'arma e tira dans lo tempe de la filhòta a corta portada. Enseguida fugís en escotèr. Pendent l'ataca, lo tuaire ferís tanben un jove de 17 ans.

Los còsses de las quatre victimas son rebonduts al cementèri Har Hamenouhot de Jerusalèm lo 21 de març de 2012.

Identificacion del tuaire

Los servicis de la policia scientifica anoncièron que la meteissa arma foguèt utilizada dins los tres episòdis.

Fòrça pistas foguèron consideradas per explicar aqueles murtres. D'entre los ipotèsis citats, i a aquelas del terrorisme interior o exterior, d'un desequilibrat o d'un « lop solitari » coma Anders Behring Breivik. Tres ancians militars ligats a de movements neonazis foguèron suspectats d'en primièr puèi innocentats.

Un element decisiu venguèt lo dimars 20 de març de 2012: un revendaire Yamaha a Tolosa se remenbrèt que quinze jorns abans (lo dimars 6 de mars de 2012), un client venguèt dins sa botiga comprar una cagola e li demandèt – sens obtenir de responsa – cossí desactivar lo sistèma de geolocalizacion ( tracker ) de l'escotèr Yamaha TMAX qu'aviá panat amb lo fraire la meteissa jornada. Donèt als policièrs los noms.

Lo RAID decidiguèt alara d'intervenir per arrestar Mohammed Merah, un Francés de 23 ans e venent d'una familha argeriana . De comparasons se faguèron mercé a l'adreça IP de l'ordenador portable de la maire e de son escotèr, panat.

Operacion del RAID

L'apartament de Merah, situat dins lo quartièr tolosenc de la Còsta Pavada, al 17 carrièra del Sergent Vigné, foguèt aprochat per la polícia. Lo dimècres 21 de març de 2012, cap a 3h15 del matin, aprèp que la pòrta resistiguèsse a l'emplec d'un boçon, Mohamed Merah se revelhèt e tirèt a travèrs la pòrta subre los policièrs venguts l'arrestar. Dos foguèron ferits leugièrament. D'un autre costat, de membres de sa familha foguèron més en detencion preventiva. La maire, abitant lo quartièr del Miralh, menada suls luòcs, refusa tota discussion amb lo filh, afortissent qu'auriá pas de presa sus el. Mai tard, dins la matinada, l'immòble foguèt vojat dels sieus abitants.

Aprèp mai de 30 oras de sètge, lo RAID, aprèp aver lançat de granadas assordissentas per crear de bèrcas e manténer Merah en estat de tension, assautèt lo 22 de març de 2012 a 10h30, dintrant fin finala dins l'apartament que Merah aviá equipat de barricadas. L'assaut comencèt a 11h30, Merah sortiguèt de la sala de banh e montèt a l'assaut. Lo cap del RAID anoncièt en seguida que los policièrs recebèron l'òrdre de ripostar pas.

Dos policiers foguèron ferits. A 11h32, Merah moriguèt fin finala d'una bala dins lo cap e d'una autra dins lo ventre, Merah aviá declarat voler morir «las armas dins la man».

L'assaut final durèt en tot set minutas.

Seguidas judiciàrias

Lo 21 de març de 2012 al meteis temps que lo sètge de l'apartament de Mohamed Merah, foguèron arrestat preventivament lo fraire, Abdelkader Merah, la femna d'aquel, e la maire dels dos fraires. La femna d'Abdelkader e la maire foguèron liberadas lo dissabte 24 de mars de 2012. Alara que Abdelkader Merah foguèt inculpat per complicitat d'assassinats e associacion de malfaitors en vista de la preparacion d'actes de terrorisme, e empresonat lo dimenge 25 de març 2012.

La mòrt de Merah atuda definitivament l'accion publica jamai serà copable mas se pòt considerar segon la lei francesa coma l'autor dels actes.

Merah se revendicava d'Al-Qaida e seriá anat en Afganistan e dins las regions tribalas del Paquistan. Invocava entre autre la mòrt d'enfants palestinians dins lo Conflicte araboisraelian e la volontat de «se'n prene a l'armada francesa» per justificar son acte. Confia aver le sentiment que «tuar un soldat francés en França auriá lo meteis restontissent que tuar dètz soldats franceses en Afganistan».

(fr) Lo film dels eveniments per La Dépêche du Midi