ߞߊ߲ ߡߊߛߙߋ ߣߴߊ߬ ߞߎ߬ߙߎ߲߬ߘߎ

ߥߟߊ߬ߘߊ߫ ߝߟߐ: {ߞߊ߲ߡߊߦߟߍ ߡߝߊߣߍ߲}

        ߞߊ߲ߡߊߦߟߍ ߡߝߊߣߍ߲ ߦߋ߫ ߛߌ߰ߙߊ߬ߟߊ߲ ߠߎ߬ ߞߊ߲߬ߞߏߙߏ߲ ߕߏ ߟߋ߬ ߘߌ߫ ߛߓߍߟߌ ߘߐ߫ ߕߋ߲߬ ߝߏߦߊ߲߫، ߊ߬ ߝߐߣߴߊ߬ ߡߊ߬ ߟߋ߬ ߞߏ߫ ߞߊ߲ߡߊߦߟߍ ߡߝߊߣߍ߲߸ ߓߺߴߊ߬ ߡߍ߲ߞߊ߲ ߘߊߡߌߣߊ ߦߋ߫ ߟߊߺߦߟߍ߬ ߟߊ߫ ߟߋ߬ ߞߣߊ߬ߕߏ߫ ߊ߬ ߟߊߓߊ߲ ߠߊߺߖߌ߰ ߟߊ߫ ߡߝߊ߬ߦߊ ߘߐ߫ ߕߋ߲߬ ߘߏߦߌ߲߫،ߦߏ߫ :  ߊ  ߋ   ߌ   ߍ    ߎ   ߏ  ߐ...  

ߓߊ، ߓߏ، ߛߌ،.....

    ߊ߬ ߟߊߺߞߙߐ߬ߛߌ߬ ߘߐߙߐ߲߫߸ ߊ߰  ߌߣߊߝߐ߫ ߌ ߦߺߴߊ߬ ߝߐ ߟߊ߬ ߟߋ߬ ߞߏ߫: (ߊߺߊ߬، ߋߺߋ߬،..... )  

           ߖߊ߲߬ߕߏ߬ߒ߬ߘߐ߬ ߜߍߟߍ߲: 

     ߞߊ߲ߡߊߦߟߍ ߡߝߊߣߍ߲ ߦߋ߫ ߦߋ߫ ߟߊ߫ ߒߞߏ ߞߎߡߊߺߘߋ߲ ߠߎ߬ ߝߊ߲߭߬ ߓߍ߯ ߟߋ߬ ߘߐ߫،  ߞߏ߬ߣߌ߲߫߸ ߊ߬ ߡߊ߲߬ߞߊ߲  ߦߋ߫ ߓߐ߫ ߟߺߴߊ߬ߟߎ߬ ߟߊߓߊ߲߫ ߘߐߙߐ߲߫ ߠߋ߬ ߟߊ߫، ߦߏ߫ ߕߊ߲߬ : (ߞߎߡߊߘߋ߲=ߞߎ߫ ߡߊ߫ ߘߋ߲) 

ߊ߬ ߝߟߍ߫ ߓߊ߫߸ (ߞߎ߫ ߡߊ߫) ߓߘߊ߫ ߞߍ߫ ߞߊ߲ ߠߊߓߊ߬ߙߊ ߘߌ߫߸ ߞߊ߬ ߡߊ߬ߝߊ ߕߐ߰ߡߊ߬ߛߙߋ ߕߏ߫ ߊ߬ ߟߊ߫߸ ߞߣߊ߬ (ߘߋ߲) ߡߝߊ߫ ߟߊߓߊ߲ ߠߊ߫ ߛߊ߫ ߞߏ߫ ߞߎ߫-ߡߊ߫-ߘߋ߲

 ߏ߬ ߘߐ߫߸ ߊ߬ ߕߐ߰ߡߊ߬ߛߙߋ ߦߋ߫ ߞߎߡߊߘߋ߲ ߝߊ߲߬ ߓߍ߯߸ ߊ߬ ߡߊ߲߬ߞߊ߲ ߧߋ߫ ߟߊߓߊ߲ ߘߐߙߐ߲߫ ߠߊ߫. 

      {ߞߊ߲ߡߊߦߟߍ ߟߊߓߙߊ߬ߺߣߍ߲}: (ߊ߫)  

    ߞߊ߲ߡߊߦߟߍ ߟߊߓߙߊ߬ߺߣߍ߲ ߦߋ߫ ߞߍ߬ߙߍ߲߬ߘߍ߬ ߕߋߟߋ߲ߣߍ߲ ߕߋ߭ ߟߋ߬ ߘߌ߫ ߛߌ߰ߙߊ߬ߟߊ߲߬ ߥߐߙߐ߲ߥߌ߬ߟߊ ߟߎ߬ ߣߌ߫ ߒ ߕߍߘߐ ߞߊ߲߬ ߕߊ߲߬ߘߐ : {ߊ߫  ߋ߫  ߌ߫  ߍ߫  ߎ߫  ߏ߫  ߐ߫  ߒ߫}، ߊ߬ ߝߐߣߺߴߊ߬ ߡߊ߬ ߟߋ߬ ߞߏ߫ ߞߊ߲ߡߊߦߟߍ ߟߊߓߙߊ߬ߺߣߍ߲߸ ߓߺߴߊ߬ ߡߍ߲ߞߊ߲ ߦߋ߫ ߟߊߺߦߟߍ߬ ߟߊ߫ ߟߊ߬ߓߙߊ ߘߐ߫ ߕߋ߲߬ ߥߟߊߞߌ߫، ߦߏ߫ ߕߊ߲߬ :     ߒ߫، ߓߊ߲߫، ߟߊ߫، ߝߐ߫، ߛߊ߫،.... 

                ߖߊ߲߬ߕߏ߬ߒ߬ߘߐ: 

       ߞߊ߲ߡߊߦߟߍ ߟߊߓߙߊ߬ߺߣߍ߲߫ ߕߐ߰ߡߊ߬ߛߙߋ ߕߍ߫ ߦߋ߫ ߟߊ߫ ߒߞߏ ߞߎߡߊߘߋ߲ ߠߎ߬ ߝߊ߲߬ ߛߺߴߊ߬ߺߟߎ߫ ߟߊߓߊ߲ ߞߐ߫، ߊ߬ ߡߊ߲߬ߞߊ߲ ߞߐ߬ߣߌ߲߬ ߦߋ߫ ߓߐ߫ ߟߺߴߊ߬ߟߎ߫ ߝߊ߲߬ ߓߍ߯ ߟߋ߬ ߘߐ߫ ߞߐߘߍ߫، ߦߏ߫ ߕߊ߲߬ : (ߞߊ߲ߞߊ߲߫)    ߊ߬ ߝߟߍ߫ ߓߊ߫߸ (ߞߊ߲߫) ߝߟߐߡߕߊ ߞߍߣߍ߲߫ ߟߊ߬ߺߓߙߊ ߟߋ߬ ߘߌ߫ ߝߐߟߌ ߘߐ߫߸ ߞߊ߬ ߡߊ߬ߝߊ߫ ߕߐ߰ߡߊ߬ߛߙߋ ߕߏ߫ ߊ߬ ߟߊ߫ ߛߓߍߟߌ ߘߐ߫، ߞߊ߬ ߟߊ߬ߓߙߊ ߕߐ߰ߡߊ߬ߛߙߋ ߞߍ߫ (ߞߊ߲߫) ߟߊߓߊ߲ߠߕߊ ߛߊ߫ ߞߏ߫ ߞߊ߲ߞߊ߲߫، ߏ߬ ߘߐ߫߸ (ߞߊ߲ߞߊ߲߫) ߝߕߐ ߡߍ߲ߞߊ߲ ߦߋ߫ ߞߍ߫ ߟߊ߫ (ߞߊ߲߫ ߞߊ߲߫) ߠߋ߬ ߘߌ߫߸ ߞߊ߬ ߟߊ߬ߓߙߊ ߞߺߴߊ߬ ߟߊ߫ ߞߊ߬ߣߌ߲߬، ߒ߬ߞߊ߬߸ ߣߺߴߌ ߞߊ߬ ߞߎ߲߬ߞߎ߬ߘߎ߲߬ ߞߐߣߙߊ (ߞߊ) ߣߙߊ߫ ߞߊ߲ߞߊ߲߫ ߠߊ߫ ߛߌߛߍ߲߬߸ ߌ ߘߌߣߺߵߊ߬ ߦߋ߫ ߛߍ߲ ߟߊ߬ߓߙߊ߫ ߕߐ߰ߡߊ߬ߛߙߋ ߓߘߊ߫ ߕߎߣߎ߲߫ ߕߋ߲߬ ߖߋߎ߲߫، ߦߏ߫ ߕߊ߲߬ : {ߞߊ߲ߞߊ߲ߞߊ}߸ ߏ߬ ߘߺߴߊ߬ ߟߐ߲߫ ߘߐߙߐ߲߫ ߞߏ߫ ߞߊ߲ߡߊߦߟߍ ߟߊߓߙߊ߬ߺߣߍ߲ (ߞߍ߬ߙߍ߲߬ߘߍ߬ ߕߋߟߋ߲ߣߍ߲) ߕߐ߰ߡߊ߬ߛߙߋ ߕߍ߫ ߦߋ߫ ߟߊ߫ ߒߞߏ߫ ߞߎߡߊߺߘߋ߲ ߠߎ߬ ߝߊ߲߭߬ ߛߌ߫ ߊ߬ߟߎ߬ ߟߊߓߊ߲ ߞߐ߫߸ ߤߊߟߵߊ߬ ߓߊ߯ ߞߍ߫ ߞߎߡߊߺߘߋ߲߫ ߡߍ߲ ߛߎ߲ ߘߌ߫߸ ߣߌ߫ ߜߋ߲߭ ߘߏ߫ ߣߙߊ߫ ߘߺߴߏ߬ ߟߊ߫ ߒߞߘߐ߫ ߊ߬ߟߋ߬ ߘߌ߫ ߕߎߣߎ߲߫ ߦߋ߲߬߸ ߦߏ߫ ߊ߲ ߓߟߋߣߺߴߏ߬ ߟߊ߫ ߢߊ ߡߍ߲ ߛߍ߲. 

         {ߞߊ߲ߡߊߖߌ߮ ߡߝߊߣߍ߲ (ߊ߭)} 

     ߞߊ߲ߡߊߖߌ߮ ߡߝߊߣߍ߲ ߦߋ߫ ߕߏ߲ߘߋ߲ ߛߌ߱ ߟߋ߬ ߘߌ߫ ߛߌ߰ߙߊ߬ߟߊ߲߬ ߥߐߙߐ߲ߥߌ߬ߟߊ ߟߎ߬ ߣߌ߫ ߒ ߕߍߘߐ ߞߊ߲߬߸ ߊ߬ ߕߍ߫ ߛߌ߰ ߟߺߴߊ߬ߟߎ߫ ߘߎ߰ߟߊ߫ ߘߋ߬، ߓߊ߸ ߏ߬ ߦߋ߫ ߞߊ߲ߠߊߘߌߦߊߟߊ߲ ߟߋ߬ ߘߌ߫، ߏ߬ ߘߐ߫ ߊ߰ ߛߌ߰ ߟߺߴߊ߬ߟߎ߬ ߛߊ߲ߘߐ߫ ߢߌ߲߬ ߢߊ ߟߋ߬ :(ߊ߭  ߋ߭  ߌ߭  ߍ߭  ߎ߭  ߏ߭  ߐ߭  ߒ߭)، ߊ߬ ߝߐߣߺߴߊ߬ ߡߊ߬ ߟߋ߬ ߞߏ߫ ߞߊ߲ߡߊߖߌ߮ ߡߝߊߣߍ߲߸ ߓߺߴߊ߬ ߡߊ߲߬ߞߊ߲ ߦߋ߫ ߟߊߝߟߐ߫ ߟߊ߫ ߞߊ߲ߡߊߖߌ߮ ߟߋ߬ ߟߊ߫ ߞߣߊ߬ߕߏ߫ ߟߊߓߊ߲ ߠߊߦߟߍ߬ ߟߊ߫ ߡߝߊ߬ߦߊ߬ ߘߐ߫ ߕߊ߲߬ߘߐ ߞߏ߫ (ߊ߬ߊ، ߋ߬ߋ، ߌ߬ߌ،ߍ߬ߍ،...)  

              ߖߊ߲߬ߕߏ߬ߒ߬ߘߐ :  

    ߞߎߡߊߘߋ߲߫ ߜߋ߲߬  ߛߌߦߊߡߊ߲ ߠߎ߬ ߘߐ߫߸ ߞߊ߲ߡߊߖߌ߮ ߡߝߊߺߣߍ߲ ߥߟߊ߫ ߞߊ߲ߡߊߖߌ߮  ߟߊߓߙߊ߬ߺߣߍ߲ ߠߋ߬ ߕߎ߲߰ ߠߊ߫  ߞߊ߲ߡߊߖߌ߮ ߡߝߊߺߣߍ߲ ߠߊ߫ ߞߎߘߊߦߌ߫، ߦߏ߫ ߕߊ߲߬ :       ߊ) ߞߊ߲ߡߊߖߌ߮ ߟߊߺߓߙߊ߬ߣߍ߲ ߕߊ ߟߎ߬ : (ߓߊ߭ߞߐ߬ߦߐ، ߝߎ߭ߓߊ߬ߟߌ،...)       ߊ߬ ߝߟߍ߫ ߓߊ߫߸ ߞߊ߲ߡߊߖߌ߯ ߡߝߊߣߍ߲ ߦߋ߫(ߓߊ߭) ߡߍ߲ ߠߊ߫ (ߞߐ߬) ߡߍ߲ ߣߙߊߺߣߍ߲߫ ߏ߬ ߟߊ߫߸ ߏ߰ ߞߊ߲ߡߊߖߌ߯ ߟߊߓߙߊ߬ߣߍ߲ ߠߋ߬ ߘߌ߫ ߕߊ߲߬ (ߓߊ߭ߞߐ߬ߦߐ) ߛߋ߲ߛߋߘߋ߲߫ ߝߺߴߏ߬ ߦߋ߫ ߞߍ߫ ߞߊ߲ߡߊߖߌ߮ ߟߋ߬ ߘߌ߫، ߊ߫߹ ߌߟߋ ߊ߬ ߡߊߝߟߍ߫ ߕߊ߲߬ ߓߊ߫ ߣߺߴߊ߬ ߛߓߍ߫ ߘߊ߫ ߞߏ߫ (ߓߊ߭ߞߐߞߐ) ߝߙߋߞߋ ߘߌ߫ ߛߐ߬ߘߐ߲߬ ߏ߬ ߝߐߢߊ ߣߺߴߊ߬ ߞߘߐ ߓߍ߯ ߘߐ߫، ߓߊ߸ ߒߞߏ ߞߌߙߍߘߋ߲߫ ߛߌ߫ ߕߺߴߏ߬ ߘߌ߫߸ ߊ߬ ߖߍ߬ߘߍ ߝߊ߲ ߝߐ߫ ߜߏߡߊ߲߫ ߠߋ߬ ߡߣߍ߬، ߒ߬ߓߊ߬߸ ߊ߰ ߏ߬ ߢߊ ߟߋ߬ ߞߊ߲߬ ߗߐ߫ ߝߏ߫ ߊ߬ ߢߐ߲߰ ߞߊ߲ߡߊߖߌ߯ ߘߏ߫ ߟߋ߰ ߕߎ߲߰ ߊ߬ ߟߊ߫ ߕߘߋ߫.  

  ߋ) ߞߊ߲ߡߊߖߌ߮ ߡߝߊߣߍ߲ ߕߊ ߟߎ߬ : *(ߔߏ߲߭ߔߏ߲߭߸ ߞߏ߭ߞߏ߭،... )   ߣߌ߲߬ ߝߣߊ߫ ߝߟߍ߫ ߘߐߙߐ߲߫߸ ߌ ߡߊ߫ ߞߊ߲ߡߊߖߌ߯ ߡߝߊߣߍ߲ ߕߎ߲߰ߣߍ߲߫ ߦߋ߫ ߏ߬ ߝߣߊ߫ ߟߊ߫ ߕߊ߲߬ ߞߏ߫ (ߞߏ߭ߞߏ߭)، ߏ߬ ߘߐ߫߸ ߣߺߴߊ߬ ߛߓߍ߫ ߘߊ߫ ߕߊ߲߬ ߞߏ߫ (ߞߏ߭ߞߏ߫) ߌ ߢߊ߫ ߕߍ߫ ߝߙߋߞߋ ߟߊ߫ ߏ߬ ߡߍ߲ߞߊ߲ ߖߍ߬ߘߍ ߘߐ߫ ߏ߬ ߘߌ߫߸ ߞߘߐ߫ ߘߏ߲߬ ߝߣߊ߫ ߕߺߴߊ߬ ߟߊ߫ ߝߋߎ߫. 

              {ߞߊ߲ߡߊߖߌ߮ ߟߊߓߙߊ߬ߺߣߍ߲} : 

   ߞߊ߲ߡߊߖߌ߮ ߟߊߓߙߊ߬ߺߣߍ߲ ߦߋ߫ ߞߍ߬ߙߍ߲߬ߘߍ߬ ߢߌ߲ߡߊ ߛߌ߱ ߟߋ߬ ߘߌ߫ ߛߌ߰ߙߊ߬ߟߊ߲߬ ߥߐߙߐ߲ߥߌ߬ߟߊ ߟߎ߬ ߣߌ߫ ߒ ߕߍߘߐ ߞߊ߲߬ ߕߊ߲߬ (ߊ߬   ߋ߬   ߌ߬   ߍ߬   ߎ߬   ߏ߬   ߐ߬   ߒ߬)، ߊ߬ ߝߐߣߺߴߊ߬ ߡߊ߬ ߟߋ߬ ߞߏ߫ ߞߊ߲ߡߊߖߌ߮ ߟߊߓߙߊ߬ߺߣߍ߲߸ ߓߺߴߊ߬ ߡߍ߲ߞߊ߲ ߦߋ߫ ߖߌ߰ ߟߊ߫ ߟߊ߬ߓߙߊ ߘߐ߫ ߕߋ߲߬ ߥߟߊߞߌ߫، ߦߏ߫ ߕߊ߲߬: (ߊ߬، ߊ߬ߟߎ߬، ߓߊ߬ߓߊ߬، ߣߊ߬،... ) 

                ߖߊ߲߬ߕߏ߬ߒ߬ߘߐ : 

       ߞߊ߲ߡߊߖߌ߮ ߟߊߓߙߊ߬ߺߣߍ߲ ߦߋ߫ ߦߋ߫ ߟߊ߫ ߒߞߏ ߞߎߡߊߺߘߋ߲ ߠߎ߬ ߝߊ߲߬ ߓߍ߯ ߟߋ߬ ߘߐ߫ ߞߐߘߍ߫߸  ߊ߬ ߘߊߡߌߣߊ، ߊ߬ ߕߍߡߊ߬، ߊ߬ ߣߺߴߊ߬ ߟߊߓߊ߲، ߊ߬ ߘߏ߲߬ ߓߊ߯ ߦߋ߫ ߝߊ߲߬-ߊ-ߝߊ߲߬߸ ߊ߬ ߡߍ߲ߞߊ߲ ߘߌ߫ ߓߐ߫ ߦߋ߲߬ ߕߘߋ߫، ߒ ߡߺߴߊ߬ ߝߐ߫ ߘߋ߬ ߣߌ߫ ߘߎ߰ߡߊ߬ ߞߎߡߊ ߘߏ߫ ߕߎ߲߰ ߘߺߴߊ߬ ߟߊ߫߸ ߊ߬ ߘߌ߫ ߞߍ߫ ߞߊ߲ߺߡߊߦߟߍ ߟߊߺߓߙߊ߬ߣߍ߲ ߘߌ߫ ߏ߬ ߘߐߙߐ߲߫ ߠߋ߬ ߘߐ߫(ߛߓߍߢߊ ߘߐ߫ ߥߟߊ߫ ߝߐߢߊ ߘߐ߫) ، ߦߏ߫ ߕߊ߲߬ : 

ߊ) ߣߊ߬ߣߊ߬ ߣߌ߫ ߞߎߡߊߛߓߏ߫ ߣߊ߬ ߓߊ߯ ߕߎ߲߰ ߢߐ߲߯ ߠߊ߫߸ ߊ߬ ߘߌ߫ ߞߍ߫ (ߣߊ߬ߣߊ߫ ߣߊ߬ ߘߊ߫) ߘߌ߫، ߞߊ߬ ߞߊ߲ߡߊߦߟߍ߫ ߟߊߓߙߊ߬ߣߍ߲ ߞߺߴߊ߬ ߟߊ߫ ߞߊ߬ߣߌ߲߬ ߞߏ߫ *ߣߊ߬ߣߊ߫... ߞߺߵߊ߬ ߕߘߍ߬ ߊ߬ ߛߎ߲ ߠߋ߬ ߣߊ߬ߣߊ߬ ߘߌ߫

    ߓߊ߬ߙߌ߬߸ ߣߌ߫ ߛߊ߲ߡߊ߫ ߞߎߡߊ ߘߏ߫ ߕߎ߲߰ ߘߺߴߊ߬ ߒߞߘߐ߫߸ ߊ߬ ߘߌ߫ ߕߏ߫ ߊ߬ ߢߊ ߡߊ߬ ߕߊ߲߬ : *ߣߊ߬ߣߊ߬ ߡߊ߫ ߣߊ߬...       ߋ) ߊ߬ ߣߌ߫ (ߓߊ߬ߓߊ߬) ߝߣߊ߫ ߕߋ߲߬ ߠߋ߬، ߏ߬ ߣߌ߫ ߞߏߡߊߛߓߏ߫ (ߦߟߍ߬) ߕߎ߲߰ߣߍ߲ ߘߌ߫ ߞߍ߫ (ߓߊ߬ߓߊ߫ ߦߟߍ߬ ߘߊ߫)، ߓߊ߬ߙߌ߬߸ ߣߌ߫ ߛߊ߲ߡߊ߫ ߞߎߡߊ ߕߎ߲߰ ߘߺߴߊ߬ ߟߊ߫ ߛߊ߫߸ ߊ߬ ߘߌ߫ ߕߏ߫ ߊ߬ ߢߊ ߡߊ߬ ߕߊ߲߬ : (ߓߊ߬ߓߊ߬ ߦߟߍ߫ ߘߊ߫)، ߘߐ ߣߌ߲߬ ߘߏ߲߬ ߦߋ߫ ߓߊ߬ߓߊ߫ ߦߟߍ߬ ߘߊ߫ ߟߋ߬ ߘߌ߫.  

ߏ߬ ߘߐ߫߸ ߊ߰ ߕߋ߲߬ ߠߋ߬ ߗߐ߫. 

         { ߞߊ߲ߡߊߦߟߍ ߡߝߊߣߍ߲ ߛߊ߬ߡߊ߲߬ߣߍ߲} 

      ߞߊ߲ߡߊߦߟߍ ߡߝߊߣߍ߲ ߛߊ߬ߡߊ߲߬ߣߍ߲ ߦߋ߫ ߝߎ߯ߟߊ ߛߌ߱ ߟߋ߬ ߘߌ߫ ߛߌ߰ߙߊ߬ߟߊ߲߬ ߥߐߙߐ߲ߥߌ߬ߟߊ ߟߎ߬ ߣߌ߫ ߒ ߕߍߘߐ ߞߊ߲߬ ߕߊ߲߬ : (ߊ߮   ߋ߮   ߌ߮   ߍ߮   ߎ߮   ߏ߮   ߐ߮   ߒ߮)، ߊ߬ ߝߐߣߺߴߊ߬ ߡߊ߬ ߟߋ߬ ߞߏ߫ ߞߊ߲ߡߊߦߟߍ ߡߝߊߣߍ߲ ߛߊ߬ߡߊ߲߬ߣߍ߲߸ ߓߺߴߊ߬ ߡߍ߲ߞߊ߲߫ ߘߊߡߌߣߊ ߦߋ߫ ߟߊߦߟߍ߬ ߟߊ߫ ߟߋ߬ ߞߣߊ߬ߕߏ߫ ߊ߬ ߟߊߓߊ߲ ߠߊߖߌ߰ ߟߊ߫ ߡߝߊ߬ߦߊ߬ ߘߐ߫ ߛߊ߬ߡߊ߲߬ߠߌ߲߬ ߓߟߏߡߊ߬ ߕߊ߲߬ߘߐ : (ߊߺߊߺߊ߬ߺߊ߬، ߋߺߋߺߋ߬ߺߋ߬،...)، ߏ߬ ߘߐ߫߸ ߊ߬ ߛߊ߬ߡߊ߲߬ߓߊߟߌ ߛߊ߬ߡߊ߲߬ߣߍ߲ ߠߋ߬ ߦߺߴߊ߬ ߘߌ߫ ߕߊ߲߬ : ߊ߮، ߡߙߊ߬ߓߊ߮، ߛߋߕߌ߮، ߕߍ߮،...       ߞߎߡߊ߫ ߟߊߜߐߞߎߦߊ߫ ߘߐ߫߸ ߊ߬ߟߋ߬ ߝߎ߯ߟߊߣߍ߲ ߧߋ߫ ߝߐߢߊ߫ ߝߌ߬ߟߊ ߛߓߍߢߊ߫ ߞߋߟߋ߲ ߠߋ߬ ߘߌ߫، ߊ߬ ߝߐߢߊ߫ ߝߟߐ ߟߋ߬ ߛߊ߬ߡߊ߲߬ߠߌ ߘߌ߫ ߦߏ߫ ߊ߲ ߓߟߋߣߍ߲߫ ߏ߬ ߢߊ ߡߍ߲ ߛߊ߲ߘߐ߫،       ߊ߬ ߢߊ߫ ߝߌߟߊߣߊ߲ ߠߋ߬ ߛߌ߰ߙߊ߬ߟߊ߲ ߠߎ߬ ߓߊߟߌ ߘߌ߫ ߞߊ߬ (ߞ) ߘߏ߲߬ ߏ߬ ߟߎ߬ ߕߍ߫ ߛߊ߫ ߦߏ߫ ߕߊ߲߬ : (ߊ߮=ߊߞߊ،   ߋ߮=ߋߞߋ،    ߌ߮=ߌߞߌ،    ߍ߮=ߍߞߍ،... )، ߣߌ߲߬ ߠߺߵߊ߬ ߕߏ߫ ߟߊ߫߸ ߊ߰ ߝߐ߫ ߟߊ߫ ߞߏ߫ (ߕߍ߮) ߊ߬ ߣߌ߫ (ߕߞߍ)، (ߛߋߕߌ߮) ߊ߬ ߣߌ߫ (ߛߋߕߞߌ)، (ߡߙߊ߬ߓߊ߮ = ߡߙߊ߬ߓߞߊ)، ...       ߒ߬ߓߊ߬߸ ߊ߬ߟߋ ߛߓߍߢߊ߫ ߞߋߟߋ߲ ߝߐߢߊ߫ ߝߌ߬ߟߊ ߟߋ߬ ߘߌ߫ ߏ߬ ߢߊ.  

               ߖߊ߲߬ߕߏ߬ߒ߬ߘߐ: 

    ߞߊ߲ߡߊߦߟߍ ߡߝߊߺߣߍ߲ ߛߊ߬ߡߊ߲߬ߺߣߍ߲ (ߝߎ߯ߟߊߺߣߍ߲ ߥߟߊ߫ ߛߊ߬ߡߊ߲߬ߺߠߊ߲ : [ ߊ߮ ] ) ߕߍ߫ ߦߋ߫ ߟߊ߫ ߒߞߏ ߞߎߡߊߺߘߋ߲ ߠߎ߬ ߘߊߡߌߣߊ ߣߺߴߊ߬ߟߎ߬ ߕߍߡߊ߬ ߝߋߎ߫߸ ߊ߰ ߞߍ߫ ߟߺߴߊ߬ߟߎ߬ ߟߊߓߊ߲ ߠߋ߬ ߘߐ߫ ߞߎߘߊߦߌ߫، ߦߏ߫ ߕߊ߲߬ : ߛߋߓߊ߮، ߡߙߊ߬ߺߓߊ߮، ߞߎ߲߬ߺߕߌ߮، ߊ߬ ߣߌ߫... 

    ߓߊ߬ߙߌ߬߸ ߞߎߡߊߺߘߋ߲ ߠߎ߬ ߕߍߡߊ߬ ߣߺߴߊ߬ ߕߎ߲߰ ߘߊ߫ ߞߊ߲ߡߊߦߟߍ ߟߊ߫߸ ߊ߬ ߘߌ߫ ߞߍ߫ ߞߊ߲ߡߊߦߟߍ߫ ߟߊߓߙߊ߬ߺߣߍ߲ ߦߏ߫ ߕߊ߲߬ ߞߙߊߞߏ:ߛߋߓߊ߮=ߛߋߓߊ߯ߦߊ، ߞߊ߲ߕߌ߮=ߞߊ߲ߕߌ߯ߦߊ       ߊ߬ ߝߟߍ߫ ߓߊ߫߸ (ߛߋߓߊ߮) ߓߘߊ߫ ߦߟߍ߬ߡߊ߲߬ ߞߊ߲ߠߊߓߙߊ߬ߺߣߍ߲ ߘߌ߫ ߕߊ߲߬ ߞߏ߫: (ߛߋߓߊ߯ߦߊ) ߓߊ߸ ߊ߬ ߕߎ߲߰ߺߣߍ߲߬ (ߛߋ) ߡߍ߲ ߠߊ߫߸ ߏ߰ ߞߊ߲ߡߊߦߟߍ ߘߌ߫.    ߞߙߊߞߏ:ߞߊ߲ߕߌ߮ ߝߣߊ߫ ߞߍߣߍ߲߫ ߞߙߊߞߏ:ߞߊ߲ߕߌ߯ߦߊ ߘߌ߫ ߢߊ߫ ߞߋߟߋ߲ ߏ߬ ߟߋ ߡߊ߬.  

       ߣߺߴߊ߬ ߘߏ߲߬ ߕߎ߲߰ ߘߊ߫ ߞߊ߲ߡߊߖߌ߮ ߟߊ߫ ߕߎ߲߯߸ ߊ߬ ߘߌ߫ ߞߍ߫ ߞߊ߲ߡߊߖߌ߮ ߟߊߓߙߊ߬ߺߣߍ߲ ߘߌ߫ ߕߍߡߊ߬، ߦߏ߫ ߕߊ߲߬ :  

ߞߙߊߞߏ:ߡߙߊ߬ߓߊ߮=ߡߙߊ߬ߓߊ߰ߕߐ، ߞߎ߲߬ߕߌ߮=ߞߎ߲߬ߕߌ߰ߦߊ.

    ߊ߬ ߝߟߍ߫ ߓߊ߫߸ (ߞߎ߲߬ߕߌ߮) ߓߘߊ߫ ߞߍ߫ (ߞߎ߲߬ߕߌ߰ߦߊ) ߘߌ߫، ߓߊ߸ ߞߊ߲ߡߊߖߌ߮ ߟߋ߫ ߞߐ߲߬ ߘߺߴߊ߬ ߢߍ߫ ߣߺߴߏ߬ ߦߋ߫ (ߞߎ߲߬) ߘߌ߫ ߏ߬ ߟߋ ߞߊ߬ (ߕߌ߮) ߞߍ߫ (ߕߌ߰) ߘߌ߫ ߕߍߡߊ߬. 

   ߏ߬ ߘߐ߫ ߡߍ߲ ߧߋ߫ ߘߐߙߐ߲߫߸ ߞߎߡߊߺߘߋ߲ ߠߎ߬ ߕߍߡߊ߬߸ ߣߌ߫ ߛߊ߬ߡߊ߲߬ߠߊ߲ (ߞߊ߲ߡߊߦߟߍ ߡߝߊߺߣߍ߲߫ ߛߊ߬ߡߊ߲߬ߺߣߍ߲) ߕߎ߲߰ ߘߊ߫ ߞߊ߲ߡߊߦߟߍ ߟߊ߫߸ ߊ߬ ߘߌ߫ ߞߍ߫ ߞߊ߲ߡߊߦߟߍ ߟߊߓߙߊ߬ߺߣߍ߲ ߛߊ߬ߡߊ߲߬ߺߣߍ߲ ߘߌ߫ ߦߏ߫ (ߛߋߓߊ߮=ߛߋߓߊ߯ߦߊ)      ߣߺߴߊ߬ ߘߏ߲߬ ߕߎ߲߰ ߘߊ߫ ߞߊ߲ߡߊߖߌ߮ ߟߊ߫߸ ߊ߬ ߘߌ߫ ߞߍ߫ ߞߊ߲ߡߊߖߌ߮ ߟߊߓߙߊ߬ߺߣߍ߲߫ ߛߊ߬ߡߊ߲߬ߺߣߍ߲ ߘߌ߫ ߕߍߡߊ߬ ߕߊ߲߬ : (ߣߊ߬ߓߊ߮=ߣߊ߬ߓߊ߰ߕߐ) 

        (ߞߊ߲ߡߊߦߟߍ ߟߊߓߙߊ߬ߺߣߍ߲ ߛߊ߬ߡߊ߲߬ߺߣߍ߲) : 

       ߞߊ߲ߡߊߦߟߍ ߟߊߓߙߊ߬ߣߍ߲ ߛߊ߬ߡߊ߲߬ߣߍ߲ ߦߋ߫ ߝߎ߯ߟߊߣߍ߲ ߢߊߛߌ߲ ߠߋ߬ ߘߌ߫ ߡߊ߬ߙߊ߲ ߝߍ߬ ߛߌ߰ߙߊ߬ߟߊ߲߬ ߥߐߙߐ߲ߥߌ߬ߟߊ ߟߎ߬ ߣߌ߫ ߒ ߕߍߘߐ ߞߊ߲߬ ߕߊ߲߬ : (ߊ߯   ߋ߯   ߌ߯   ߍ߯   ߎ߯   ߏ߯   ߐ߯   ߒ߯)، 

ߊ߬ ߝߐߣߺߴߊ߬ ߡߊ߬ ߟߋ߬ ߞߏ߫ ߞߊ߲ߡߊߦߟߍ ߟߊߓߙߊ߬ߣߍ߲ ߛߊ߬ߡߊ߲߬ߣߍ߲߸ ߓߺߴߊ߬ ߡߍ߲ߞߊ߲ ߦߋ߫ ߟߊߦߟߍ߬ ߟߊ߫ ߟߋ߬ ߟߊ߬ߓߙߊ ߘߐ߫ ߛߊ߬ߡߊ߲߬ߠߌ߲߬ ߓߟߏߡߊ߬ ߕߊ߲߬ߘߐ : ߊ߯ ߋ߯..

              ߖߊ߲߬ߕߏ߬ߒ߬ߘߐ : 

       ߞߊ߲ߡߊߦߟߍ ߟߊߓߙߊ߬ߣߍ߲ ߛߊ߬ߡߊ߲߬ߣߍ߲ ߦߋ߫ ߦߋ߫ ߟߊ߫ ߒߞߏ ߞߎߡߊߘߋ߲ ߠߎ߬ ߝߊ߲߭߬ ߓߍ߯ ߟߋ߬ ߘߐ߫ ߞߐߘߍ߫، ߊ߬ ߘߊߡߌߣߊ، ߊ߬ ߕߍߡߊ߬، ߊ߬ ߣߺߴߊ߬ ߟߊߓߊ߲، ߦߏ߫ ߕߊ߲߬ : ߊ߯، ߓߊ߯ߙߊ،  ߛߟߊߕߌ߯ ߓߘߍ،...      ߊ߬ ߘߏ߲߬ ߓߊ߯ ߦߋ߫ ߝߊ߲߬-ߊ-ߝߊ߲߬߸ ߊ߬ ߡߊ߲߬ߞߊ߲ ߦߋ߫ ߓߐ߫ ߟߊ߫ ߦߋ߲߬ ߠߋ߬ ߕߘߋ߫.  

ߒ߬ߓߊ߬߸ ߊ߰ ߕߋ߲߬ ߠߋ߬ ߖߐ߫߹

       ߞߊ߲ߡߊߖߌ߮ ߡߝߊߣߍ߲ ߛߊ߬ߡߊ߲߬ߺߣߍ߲ : (ߊ߱) 

   ߞߊ߲ߡߊߖߌ߮ ߡߝߊߣߍ߲ ߛߊ߬ߡߊ߲߬ߺߣߍ߲ ߧߋ߫ ߝߎ߯ߟߊߣߍ߲ ߢߍߛߌ߲ ߠߋ߬ ߘߌ߫ ߞߌߣߌ߲ ߝߍ߬ ߛߌ߰ߙߊ߬ߟߊ߲߬ ߥߐߙߐ߲ߥߌ߬ߟߊ ߟߎ߬ ߣߌ߫ ߒ ߕߍߘߐ ߞߊ߲߬ ߕߊ߲߬ : {ߊ߱   ߋ߱   ߌ߱   ߍ߱   ߎ߱   ߏ߱   ߐ߱   ߒ߱}، ߊ߬ ߝߐߣߺߴߊ߬ ߡߊ߬ ߟߋ߬ ߞߏ߫ ߞߊ߲ߡߊߖߌ߮ ߡߝߊߣߍ߲ ߛߊ߬ߡߊ߲߬ߺߣߍ߲߸ ߓߺߴߊ߬ ߡߍ߲ߞߊ߲ ߘߊߡߌߣߊ ߦߋ߫ ߟߊߖߌ߰ ߟߊ߫ ߟߋ߬ ߞߺߵߊ߬ ߕߍߡߟߊ ߟߊߦߟߍ߬ ߞߣߊ߬ߕߏ߫ ߊ߬ ߟߊߓߊ߲ ߠߊߖߌ߰ ߟߊ߫ ߡߝߊ߬ߦߊ ߘߐ߫ ߛߊ߬ߡߊ߲߬ߠߌ߲߬ ߓߟߏߡߊ߬ ߕߊ߲߬ߘߐ : {ߊ߬ߺߊߺߊ߰، ߋ߬ߺߋߺߋ߰، ߍ߬ߺߍߺߍ߰،...}  

                  ߖߊ߲߬ߕߏ߬ߒ߬ߘߐ : 

  ߞߊ߲ߡߊߖߌ߮ ߡߝߊߣߍ߲ ߛߊ߬ߡߊ߲߬ߓߊߟߌ ߦߋ߫ ߢߊ ߡߍ߲ ߗߐ߫߸ ߊ߬ ߛߊ߬ߡߊ߲߬ߣߍ߲ ߢߌ߲߬ ߝߣߊ߫ ߦߋ߫ ߕߋ߲߬ ߠߋ߬ ߞߊ߲ߡߊߦߟߍ ߣߓߊ߬ߟߌ߬ߦߊ ߘߐ߫ ߊ߬ߟߎ߬ ߞߐߝߍ߬ ߞߎߡߊߘߋ߲ ߠߎ߬ ߣߙߊ߬ ߢߐ߲߰ ߠߊ ߘߐ߫ ߞߊ߬ߣߌ߲߬، ߦߏ߫ ߕߊ߲߬ : ߟߊ߱ߖߌ߬ ߞߊ߱ߟߊ߭ ߞߊ߱ߓߌ߬ߣߍ߬ ߛߐ߱ߛߐ߱ ߛߊ߱ߡߏ߬ߙߌ߬ ߛߐ߱ߡߊ߬، ߊ߬ ߝߟߍ߫ ߞߍ߫߸ ߌ ߡߊ߫ ߞߊ߲ߡߊߖߌ߯ ߣߊ߬ߣߍ߲ ߦߋ߫ ߊ߬ ߞߐ߫ ߟߊߒߡߊ ߢߌ߲߬ ߠߎ߬ ߓߍ߯ ߘߐ߫ ߣߌ߲߬، ߏ߬ ߘߐ߫߸ ߊ߬ߟߋ߬ ߝߣߊ߯ ߕߋ߲߬ ߠߋ߬، ߝߣߊ߫߸ ߞߎߡߊߘߋ߲߫ ߝߊ߲߬ ߛߌ߫ ߕߺߴߊ߬ ߕߣߊ߬ ߘߌ߫، ߊ߬ ߘߏ߲߬ 

ߕߐ߰ߡߊ߬ߛߙߋ ߓߊ߯ ߦߋ߫ ߝߊ߲߬-ߊ-ߝߊ߲߬߸ ߊ߬ ߡߍ߲ߞߊ߲ ߦߋ߫ ߓߐ߫ ߟߊ߫ ߦߋ߲߬ ߠߋ߬ ߕߘߋ߫.

        ߏ߬ ߘߐ߫߸ ߞߊ߲ߡߊߖߌ߮ ߡߝߊߣߍ߲ ߛߊ߬ߡߊ߲߬ߺߣߍ߲ ߣߺߴߊ߬ ߛߊ߬ߡߊ߲߬ߓߊߟߌ ߓߍ߯ ߞߊ߫ ߞߊ߲߫ ߞߎ߬ߙߎ߲߬ߘߎ ߘߐ߫،ߝߏ߫ ߘߐߙߐ߲߫߸ ߛߊ߬ߡߊ߲߬ߠߌ߲ ߣߌ߫ ߛߊ߬ߡߊ߲߬ߓߊߟߌߦߊ ߡߍ߲ ߧߺߴߊ߬ߟߎ߬ ߕߍ߫. 

         ߞߊ߲ߡߊߖߌ߮ ߟߊߓߙߊ߬ߺߣߍ߲ ߛߊ߬ߡߊ߲߬ߺߣߍ߲ (ߊ߰) :  

   ߞߊ߲ߡߊߖߌ߮ ߟߊߓߙߊ߬ߺߣߍ߲ ߛߊ߬ߡߊ߲߬ߺߣߍ߲ ߧߋ߫ ߞߍ߬ߙߍ߲߬ߘߍ߬ ߢߌ߲ߡߊ ߛߌ߱ ߟߋ߬ ߘߌ߫ ߛߌ߰ߙߊ߬ߟߊ߲߬ ߥߐߙߐ߲ߥߌ߬ߟߊ ߟߎ߬ ߣߌ߫ ߒ ߕߍߘߐ ߞߊ߲߬، ߊ߬ ߕߍ߫ ߦߏ߫ ߊ߬ ߛߊ߬ߡߊ߲߬ߓߊߟߌ ߕߊ ߘߋ߬، ߓߊ߸ ߏ߬ ߕߊ ߦߋ߫ ߜߊߟߋ߫ ߟߊ߫ ߛߊ߲ߝߍ߬ ߟߋ߬ ߞߺߵߊ߬ ߞߎ߲߭ ߠߊߺߓߌߘߌ߲߫ ߘߎ߱ߡߊ߬ ߟߊߓߊ߲ ߠߊ߫ ߛߊ߫، ߛߊ߲߬ߡߊ߲߬ߣߍ߲ ߣߌ߲߬ ߘߏ߲߬ ߕߊ ߦߺߴߏ߬ ߛߌ߬ߣߊ ߟߋ߬ ߘߌ߫ ߞߺߵߊ߬ ߟߜߊߟߋ߫ ߘߎ߱ߡߊ߬ ߝߟߐ߫ ߞߺߵߊ߬ ߟߊߓߊ߲ ߠߊߖߊ߲߫ ߛߊ߲ ߡߊ߬ ߔߊ߫، ߊ߬ ߝߟߍ߫ ߛߌ߰ߙߊ߬ߟߊ߲ ߠߎ߬ ߣߌ߫ ߕߍߘߐ ߛߊ߲ߘߐ߫ ߣߌ߲߬ : (ߊ߰   ߋ߰   ߌ߰   ߍ߰   ߎ߰   ߏ߰   ߐ߰   ߒ߰).  

                ߖߊ߲߬ߕߏ߬ߒ߬ߘߐ : 

ߣߌ߫ ߞߊ߲ߡߊߖߌ߮ ߟߊߓߙߊ߬ߺߣߍ߲ ߛߊ߬ߡߊ߲߬ߺߣߍ߲ ߞߐ߲߬ ߘߊ߫ ߞߎߡߊߺߘߋ߲߫ ߡߛߏ߬ߡߊ߲ ߢߍ߫ (ߘߎ߰ߡߊ߬ ߞߎߡߊ ߞߊ߬ߣߌ߲߬)߸  ߊ߬ ߘߊߡߌߣߊ ߘߌ߫ ߡߊߖߌ߰ ߞߣߺߵߊ߬ ߟߊߓߊ߲  ߞߍ߫ ߞߊ߲ߡߊߦߟߍ ߟߊߓߙߊ߬ߺߣߍ߲ ߘߌ߫ ߕߊ߲߬ : 

( ߊ߰ ߕߋ߲߬ ߠߋ߬)

    ߊ߬ ߝߟߍ߫ ߓߊ߫߸ ߊ߰ ߦߏ߫ ߌ ߦߺߴߊ߬ ߝߐ ߟߊ߫ ߟߋ߬ ߞߏ߫ : 

( ߊ߬ߺߊ߫ ߕߋ߲߬ߋ߲߫ ߠߋ߬) ߞߊ߬ߘߕߍ߬ ߊ߬ ߛߓߍߺߣߍ߲߫ ߠߋ߬ ߞߏ߫ : ߊ߰ ߕߋ߲߬ ߠߋ߬ .

   ߊ߬ ߣߌ߫ (ߡߐ߰ ߝߍ߬ߕߐ)߸ ߏ߬ ߡߍ߲ߞߊ߲ ߝߣߊ߫ ߘߐߜߍ߫ ߞߍ߬ ߞߏ߫ : (ߡߐ߬ߐ߫ ߝߍ߬ߕߐ) ߞߊ߬ߛߐ߬ߘߐ߲߬ ߏ߬ ߡߊ߫ ߛߓߍ߫ ߝߋߎ߫، ߒ߬ߓߊ߬߸ ߊ߬ ߛߌߦߊߡߊ߲ ߘߐ߫ ߊ߰ ߏ߬ ߢߊ ߟߋ߬ ߞߊ߲߬߸ ߘߎ߰ߡߊ߬ ߞߎߡߊ ߡߣߊ߫ ߣߺߵߊ߬ ߞߐ߫ ߕߎ߲߫߸ ߊ߬ ߡߍ߲ߞߊ߲ ߘߌ߫ ߦߟߍ߬ߡߊ߲߫ ߏ߬ ߢߊ.        ߏ߬ ߘߐ߫߸ ߊ߬ߟߋ߫ ߛߊ߬ߡߊ߲߬ߓߊߟߌ ߦߋ߫ ߢߊ߫ ߞߋߟߋ߲ ߏ߬ ߟߋ ߡߊ߬ ߕߊ߲߬، ߓߊ߬ߓߊ߬= (ߓߊ߬ߓߊ߫ ߣߊ߬ ߘߊ߫) ߝߏ߫ ߘߐߙߐ߲߫߸ ߊ߬ߟߋ߬ ߕߊ ߟߊߕߌ߲ ߧߋ߫ ߦߋ߫ ߟߺߵߊ߬ ߝߕߐ ߡߍ߲ߞߊ߲ ߠߋ߬ ߝߍ߬.     ߊ߬ ߞߏ߬ߣߌ߲߬߸ ߒߞߏ ߞߎߡߊߘߋ߲ ߠߎ߬ ߝߊ߲߬ ߛߌ߫ ߕߺߴߊ߬ ߕߣߊ߬ߡߊ߬ ߦߙߐ߫ ߘߌ߫، ߊ߬ ߘߏ߲߬ ߓߊ߯ ߞߍ߫ ߝߊ߲߬-ߊ-ߝߊ߲߬߸ ߊ߬ ߡߊ߲߬ߞߊ߲ ߧߋ߫ ߓߐ߫ ߟߊ߫ ߦߋ߲߬ ߕߘߋ߫ ߝߏ߫ ߣߺߴߊ߬ ߞߐ߲߬ ߘߊ߫ ߘߎ߰ߡߊ߬ ߞߎߡߊ߸ ߏ߬ ߟߋ ߢߌ߲߬ߠߊ߬ߓߐ߬ߕߊ ߘߌ߫ ߕߎ߬ߡߊ ߘߏ߫ ߟߎ߫ ߟߊ߫. 

      ߊߟߎ߫ ߣߌ߫ ߢߊߦߋߟߌ߫ ߞߏߢߌߡߊ.