ߞߊ߬ߡߌ߬ߛߊ߫ ߖߊ߬ߙߊ߫ ߥߟߊ߫ ߘߏ߫-ߞߊ߬ߡߌ߬ߛߊ ߕߘߍ߬ ߦߋ߫ ߘߏ߫ ߡߊ߲߬ߛߊ߬ߓߏ߲ ߞߣߐߡߐ߮ ߘߏ߫ ߛߋ߬ ߘߌ߫ ߡߍ߲ ߦߟߍ߬ߡߊ߲ ߕߘߍ߬ ߦߋ߫ ߣߊ߰ߛߊ߫ (ߛߌ߬ ߡߛߏ߬) ߘߌ߫߸ ߡߍ߲ ߝߊ߰ ߘߊ߫ ߕߎߙߊߡߊ߲߫ ߣߌ߫ ߞߊ߲ߞߋߖߊ߲߫ ߠߎ߫ ߓߟߏ߫.
ߛߏ߰ߟߏ߲߬ ߞߐ߲ߘߍ߫ ߡߐ߬ ߘߴߊ߬ߟߋ ߟߋ߬ ߓߟߏ߫߸ ߏ߬ ߡߍ߲ ߞߊ߬ ߡߊ߲߬ߘߋ߲߫ ߣߊ߲߬ߞߌ߲ ߥߟߏ߫ ߡߍ߲ ߞߊ߬ ߛߎߡߊߥߙߏ߫ ߞߊ߲ߕߍ߫ ߘߊ߬ߘߌ߬ ߞߙߌߣߊ߬ ߞߟߊߓߍ߲ ߘߐ߫.
ߞߊ߬ߡߌ߬ߛߊ߬ ߡߊߟߐ߲߫ ߘߊ߫ ߘߐ߬ߝߐ ߘߐ߫ ߞߎ߲߬ ߓߟߋߓߟߋ߫ ߝߌ߬ߟߊ߬ ߟߎ߫ ߟߋ߬ ߞߏߛߐ߲߬߸ ߘߏ߫ ߛߌ߰ߞߏ ߣߌ߫ ߛߏ߰ߟߏ߲߬ ߞߐ߲ߘߍ߫ ߟߊߡߐ߭ ߊ߬ ߓߟߏ߫ ߏ߬ ߡߍ߲ ߓߐ߲ߛߐ߲ ߦߋ߫ ߡߊ߲߬ߘߋ߲߫ ߡߊ߲߬ߛߊ߬ ߛߌ ߟߎ߬ ߘߌ߫.
ߘߏ߫ ߡߊ߲߬ߛߊ ߟߋ߬ ߛߊ߬ ߘߊ߫ ߞߵߊ߬ ߕߘߍ߬ ߊ߬ ߘߋ߲߫ ߝߟߐ ߦߋ߫ ߞߊ߬ߡߌ߬ߛߊ߫ ߟߋ߬ ߘߌ߫߸ ߞߏ߬ߣߌ߲߬ ߞߊ߬ ߓߍ߲߬ ߘߏ߫ ߟߊ߲߬ߘߊ ߡߊ߬ ߏ߬ ߟߏ߲ ߞߊ߬ߣߊ߫߸ ߡߏ߬ߛߏ ߕߎ߲߬ ߕߴߛߋ߫ ߞߍ߫ ߟߊ߫ ߡߊ߲߬ߛߊ߬ ߘߌ߫, ߊ߬ ߝߣߊ߫ ߞߵߊ߬ ߝߴߊ߬ ߡߊ߬ߞߍ ߟߎ߬ ߢߍ߫ ߞߏ߫ ߊ߬ߟߎ߫ ߦߴߊ߬ߟߋ߬ ߛߐ߫ ߣߊ߲߬ߝߟߏ߬ߣߍ߲߬ ߠߴߊ߬ ߝߊ߬ ߗߍ ߘߐ߫. ߏ߬ ߟߎ߫ ߞߊ߲߫ ߞߏ߫ ߡߏ߬ߛߏ ߦߋ߫ ߣߊ߲߬ߝߟߏ ߟߋ߬ ߘߌ߫ ߞߴߊ߬ ߕߊ߫ ߕߍ߫ ߗߍ ߘߐ߫. ߊ߬ ߞߵߊ߬ ߝߐ߫ ߞߏ߫ ߣߴߊ߬ߟߎ߫ ߡߴߊ߬ ߛߐ߫ ߊ߬ ߝߊ߬ ߗߍ ߘߐ߫߸ ߞߴߊ߬ ߘߴߊ߬ߟߎ߫ ߘߋ߲ߢߋߙߌ߲߫ ߞߎ߲ߛߌ ߦߌ߬ߘߊ߬ ߊ߬ߟߎ߫ ߟߊ߫߸ ߊ߬ߟߎ߫ ߡߊ߫ ߛߐ߲߬, ߞߏ߫ ߣߴߊ߬ߟߎ߫ ߡߊ߫ ߛߐ߲߬߸ ߒ ߘߴߊߟߎ߫ ߘߋ߲ߢߋߙߌ߲߫ ߓߘߊߖߟߎ ߦߌ߬ߘߊ߬ ߊߟߎ߫ ߟߊ߫߸ ߊ߬ߟߎ߬ ߡߊ߫ ߛߐ߲߬ ߏ߬ ߛߌ-ߌ߯-ߛߌ߫ ߘߐ߫; ߞߊ߬ߡߌ߬ߛߊ߫ ߞߵߊ߬ ߓߌ߬ߟߵߊ߬ ߔߘߋߞߋ߬ߟߋ ߘߐ߫ ߞߊ߬ ߞߊ߲߬ߞߊ߬ߘߌ߬ߡߊ߬ߟߊ ߞߍ߫ ߞߏ߫ ߣߴߊ߬ߟߎ߫ ߡߴߊ߬ ߣߌ߭ ߘߴߊ߬ ߡߵߊ߬ ߝߊ߬ ߗߍ ߘߐ߫߸ ߞߏ߫ ߊ߬ ߘߌ߫ ߞߏ߲ߞߏ߫ ߛߏ߬ߓߏ ߟߎ߬ ߓߌ߬ߟߵߊ߬ߟߎ߫ ߟߊ߫ ߞߵߊ߬ߟߎ߫ ߣߴߊ߬ߟߎ߫ ߡߏ߬ߛߏ ߟߎ߫ ߕߊ߬ߣߊ ߞߍ߫ ߞߏ߲ߞߏ ߘߌ߫߸ ߊ߬ߟߎ߫ ߡߊ߫ ߛߐ߲߬ ߝߋߎ߫.
ߏ߬ ߟߋ ߞߐ ߞߍ߫ ߘߴߊ߬ ߝߐ ߘߊߡߌ߬ߣߊ ߘߌ߫ ߞߏ߫ ߛߌ߬ ߡߛߏ ߘߏ߫ ߓߘߊ߫ ߡߐ߰ ߝߊ߮ ߘߊߡߌ߬ߣߊ߬ ߘߏ߬ ߞߏ߲ߞߏ߫ ߞߣߐߟߊ ߟߎ߬ ߘߐ߫߸ ߥߊߟߊ߫ ߞߣߐߟߊ ߣߌ߫ ߓߊߞߊ߲ ߣߌ߫ ߛߏ߫ ߖߎߝߍߟߊ ߟߎ߬ ߘߐ߫߸ ߦߙߐ߫ ߛߌ߫ ߕߍ߫ ߟߊߝߘߏ߬ ߟߊ߫. ߏ߬ ߞߍ߸ ߘߏ߲߬ߛߏ ߟߎ߬ ߝߣߊ߫ ߣߊ߭ ߘߊߡߌ߬ߣߊ߬ ߘߊ߫ ߛߌ߭ ߣߌ߲߬ ߝߊ߰ ߞߊ߲ ߡߊ߬߸ ߊ߬ ߞߵߏ߬ ߟߎ߬ ߛߘߍߡߊ߲߫ ߝߊ߰ ߞߊ߬ ߛߌߦߊߡߊ߲߫ ߖߐߞߌ߫. ߒ߬ߓߊ߬ ߘߏ߫ ߞߊ߬ ߛߊ߲߬ ߞߋߟߋ߲ ߖߊ߬ߣߍ߲ ߠߋ߬ ߞߍ߫ ߖߘߐ߬ ߛߎ߮ ߏ߬ ߘߐ߫߸ ߡߐ߰ ߛߌ߫ ߡߊ߫ ߛߋ߫ ߛߌ߭ ߣߌ߲߬ ߝߊ߰ ߟߊ߫ ߡߎ߰ߡߍ߫.
ߕߙߊߥߟߋ߫ ߞߊߡߋߙߋ߲߫ ߝߌ߬ߟߊ߫ ߞߵߏ߬ ߟߋ ߡߍ߲߫ ߞߊ߬ ߓߐ߫ ߞߋ߬ߟߊ߫ ߸ߞߊ߬ ߥߟߌ߬ ߝߏߓߐ ߟߊ߫ ߞߊ߬ ߥߊ߫ ߘߊߟߌߡߊߛߌ߮ ߟߊ߫ ߦߋ߲߬߸ ߏ߬ ߟߎ߫ ߟߋ߬ ߦߋ߫ ߕߎߙߊߡߊ߲߫ ߣߌ߫ ߞߊ߲߬ߞߋ߬ߖߊ߲߫ ߠߎ߫ ߘߌ߫߸ ߊ߬ ߝߐߢߊ߫ ߜߘߍ߫ ߘߐ߫ ߞߏ߫ ߘߊߡߊ߲߬ߛߊ߫ ߥߎߟߊ߬ߣߍ߲߫ ߣߌ߫ ߘߊߡߊ߲߬ߛߊ߬ ߥߎ߬ߟߊ߲߬ߕߊ߲߬ߓߊ߫߸ ߛߴߊ߬ߟߎ߫ ߘߌ߫ ߝߋ߲ߣߍ߲߫ ߛߐ߬ߘߐ߲߫ ߞߊ߬ ߝߘߎ߫ ߞߍ߫. ߏ߬ ߟߎ߫ ߟߋ߬ ߣߊ߬ ߘߊ߫ ߕߏ߲ ߖߌ߰ ߞߊ߬ߡߌ߬ߛߊ߫ ߓߘߊ ߞߊ߬ ߛߐ߰ ߊ߬ ߡߊߓߏ߬ߢߊ ߣߴߊ߬ ߜߟߌߦߊ ߟߎ߫ ߡߊ߬ ߡߎߣߎ߲߬ ߖߐ߫߸ ߞߊ߬ ߣߊ߬ ߕߏ߫ ߊ߬ߟߎ߫ ߘߊ߲߬ߕߍ߰ ߟߴߊ߬ ߢߍ߫.
ߞߊ߬ߡߌ߬ߛߊ߫ ߝߣߊ߫ ߞߊ߬ ߞߏ ߞߍߢߊ ߣߌ߲߬ ߓߍ߯ ߘߊ߲߬ߕߍ߰ߟߌ ߞߴߊ߬ߟߎ߫ ߢߍ߫߸ ߞߵߊ߬ ߡߊ߬ߞߍ ߟߎ߬ ߟߊ߫ ߓߐ߬ߘߍ߬ߓߐ ߝߣߊ߫ ߢߊߝߐ߫߸ ߞߊ߬ ߓߊ߲߫ ߞߵߊ߬ ߝߴߊ߬ߟߎ߫ ߢߍ߫ ߞߏ߫ ߡߊ߲߬ߛߊ߬ ߢߍߡߐ߯ ߖߊߙߊ߫ ߞߊ߲߫ ߠߋ߬ ߞߏ߫ ߡߐ߱ ߡߍ߲ ߓߊ߯ ߛߌ߭ ߣߌ߲߬ ߝߊ߰ ߞߴߊ߬ ߘߌ߫ ߡߛߏ߬ ߘߴߏ߬ ߡߊ߬߸ ߏ߬ ߘߐ߫ ߣߴߊ߬ߟߎ߫ ߘߌ߫ ߒ ߡߊ߬ߡߊ߬ߙߋ߲߬ ߡߛߏ߫ ߛߜ߭ߏ߬ߟߏ߲߫ ߞߐ߲ߘߍ߫ ߣߌ߲߬ ߝߘߎ߫߸ ߒ ߘߌ߫ ߒ ߖߘߍ߬ ߟߊߓߌ߬ߟߊ߬ ߊߟߎ߫ ߢߍ߫: ߊ߬ߟߎ߬ ߝߣߊ߫ ߞߵߏ߬ ߟߊ߬ߤߘߌ ߘߐߖߊ߬ ߜߘߋߜߘߋ߫߹ ߏ߬ ߞߍ ߊ߬ ߞߵߊ߬ ߝߊ߰ ߝߙߍ ߟߎ߬ ߟߊߓߌ߬ߟߊ߬ ߊ߬ߟߎ߬ ߟߊ߫.
ߞߊߡߋߙߋ߲߫ ߝߌ߬ߟߊ ߏ߬ ߟߎ߫ ߘߏ߲߬ ߘߊ߫ ߥߎߟߊ ߞߣߐ߫߸ ߊ߬ߟߎ߫ ߥߊ߫ ߘߴߊ߬ ߕߘߍ߬ ߥߎ߬ߙߊ߲߬ߕߊ߲߬ߓߊ߬ ߥߎߟߊ ߞߣߐ߫. ߊ߬ߟߎ߫ ߞߵߊ߬ ߝߊ߰ ߞߵߊ߬ ߞߏ ߕߍ߰ ߞߊ߬ ߥߴߊ߬ ߘߊ߲߬ߕߍ߰ ߢߍߡߐ߯ ߖߊߙߊ߫ ߢߍ߫߸ ߏ߬ ߛߐ߰ ߘߊ߫ ߞߎߛߎ߲ ߠߋ߬ ߡߎߣߎ߲߬߸ ߘߊ߬ߡߊ߲߬ߛߊ߬ ߊ߬ ߣߊ߬ ߘߊ߫ ߝߴߊ߬ ߢߍ߫ ߞߴߊ߬ ߞߘߐ߬ ߡߛߏ߫ ߞߊ߬ߡߌ߬ߛߊ߫ ߓߘߊ߫ ߛߊ߬. ߞߊ߬ߡߌ߬ߛߊ߫ ߛߎ߬ߞߏ߬ߦߊ ߓߊ߲ߣߍ߲߸ ߡߊ߲߬ߛߊ ߞߊ߬ ߦߋ߲߬ ߛߎ߲ߞߎߘߎ߲߫ ߗߋ߲߭ ߓߍ߯ ߟߊߓߐ߫ ߞߏ߫ ߊ߬ߟߎ߫ ߦߴߊ߬ߟߎ߫ ߢߣߊߕߊ߬߸ ߊ߬ߟߎ߫ ߞߵߊ߬ߟߎ߬ ߞߎߡߊߞߊ߲ ߠߊߕߋߟߋ߲߫ ߞߊ߬ ߛߏ߰ߟߏ߲߬ ߕߊ߬߸ ߊ߬ߟߎ߫ ߥߊ߫ ߘߴߏ߬ ߘߌ߫ ߞߵߊ߬ ߛߊ߲߬ߓߊ߫ ߡߊ߲߬ߘߋ߲߫ ߡߊ߲ߛߊ ߡߊ߬ ߢߊ߬ߣߌ߲߬ߓߊ߫.
ߕߎ߬ߢߊ ߟߋ߬ ߦߋ߫ ߝߋߎ߫ ߞߏ߫ ߛߌ߬ߟߊ߬ߡߊ ߟߎ߬ ߣߌ߫ ߌߛߟߊߞߦߊ ߟߎ߬ ߣߌ߫ ߞߊ߬ߞߎ߬ߘߊ߬ߦߊ ߛߌ߫ ߟߊߣߍ߲߫ ߕߍ߫ ߦߟߍ߬ߡߊ߲߬ߞߏ ߣߌ߫ ߛߎߓߊ߯ߦߊ ߟߎ߬ ߟߊ߫߸ ߞߏ߬ߣߌ߲߬ ߏ߬ ߓߍ߯ ߣߴߊ߬ ߕߊ߫ ߞߓߊߞߏ߫ ߛߌߦߊߡߊ߲߫ ߠߎ߫ ߟߋ߬ ߦߋ߫ ߞߍ߫ ߟߊ߫ ߒ߬ ߓߘߊ߫ ߝߘߊ߬ߝߌ߲߬ߠߊ߫ ߥߎߟߊ߫ ߞߣߐߟߊ ߟߎ߬ ߘߐ߫ ߘߊߞߎ߲ ߏ߬ ߘߐ߫ ߡߎߣߎ߲߬ ߤߊ߲߯ ߓߌ߬.
ߞߎߡߊ ߣߌ߲߬ ߠߊߛߎ߬ߘߎ߲߬ߧߊ ߘߐ߫ ߛߊ߫߸ ߒ߬ ߓߘߊ ߥߎߟߊ߫ ߞߣߐ߫ ߡߐ߮ ߟߎ߬ ߟߊߣߍ߲߫ ߞߏ߫ ߛߎ߮ ߣߌ߲߬ ߠߊ߫ ߡߎߣߎ߲߬ ߜߘߋߜߘߋ߫ ߸ ߏ߬ ߘߐ߫ ߒ߬ ߧߋ߫ ߡߍ߲ ߘߐߙߐ߲߫ ߝߐ߫ ߟߊ߫ ߦߊ߲߬߸ ߏ߬ ߟߋ ߦߴߊ߬ ߝߐ ߘߌ߫ ߞߏ߫ ߒ߬ ߓߍ߯ ߦߴߊ߬ ߡߌ߬ߘߊ߬ ߏ߬ ߓߐ߬ߟߐ ߟߊ߫ ߕߋ߲߬.
This article uses material from the Wikipedia ߒߞߏ article ߞߊ߬ߡߌ߬ߛߊ߫ ߖߊ߬ߙߊ߫, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ߞߣߐߘߐ ߦߋ߫ CC BY-SA 4.0 ߟߊ߫ ߓߌ߬ߟߊ ߟߋ߬ ߘߐ߫߸ ߝߴߊ߬ ߛߌ߬ߣߊ߬ߦߊ߫ ߢߊߝߐߟߌ ߘߋ߬. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ߒߞߏ (DUHOCTRUNGQUOC.VN) is an independent company and has no affiliation with Wiki Foundation.